EZEKIEL 14
14
Sunggigü le Teromen Kerüshvu Nmu Hünyo
1Israel nyu sharhi peha le Npugü kenda ketso titse a nthon ryü. 2Tsüselo Npugü le a nthon. 3“Silakehü temi gü, temi hidan le anyugun nyun pe teromen tsü lao teromen no anyugun tsontsin zen-o kemu nyu gü la hü nyo. Anyugun we ale kenikeshü jo khipe anyugun tsü titse rüchün hü le?”
4“Tsügenyu Aphu sokekvu Npugü a higü le zo kebin jo hi lope anyugun ka zoshü lo: Israel temi a-nyun pe teromen tsüo tsüdan no a-tsontsin zen-o kemu nyu güla, tson-o ryü sidyükeshanyu nthon kehü nyu le aka kenikeshü jo hyu loti-kenikeshü jo tsü gü le teromen kechon le hyulo zü! 5Teromen tsü dan aphu genyu Israel nyu le a kipon rani tin laso, ai ajo gü genyu anyugun no jokezen nyu ryükelo nrin bin.
6“Tsügenyu, Israel temi ka Aphu sokekvu Npugü a higü le zo kebin hi lope zoshülo: Kentsükenchen teromen dan khelao rani ryülo.
7“Lihi gwünkho kae Israel temi nme nmvue Israel temi dan nyu yhun kebin sinrünyi nyu nme-e a kipon rani gü teromen rüshvu tinla, tson-o gü sidyükeshanyu nthon yatselo Npugü a higü le a jokenishü ti! 8Ale a-ntsun ti. Ale a-khipe tsinhi nme thyü ti. Ale a temi dan nyu a-khi lati, tson-o hagun le ale Npugü letse sha loti.
9“Sidyükeshanyu nmele mele sa pe kenku zola yatselo, tsü le Npugü a higü le a-sa kela genyu. Ale Israel temi dan nyu a-khi lati. 10Sidyükesha gü lo a-nthon kethyü güe shaja kenme hyu ti. 11Israel temi no a khela nmvue anyugun kemu pe anyugun nrhu lalo kegwa nyu anyugun ntsenlo nrün genyu ale higü thyü ti. Anyugun le a temi lo ale anyugun Sunggigü thyü ti.” Aphu sokekvu Npugü ale zo laso.
Noah, Daniel, lo Job
12Npugü le aka zo, 13“Silakehü temi gü, tsipwen nme le muo aka joketsin sen mvulo, ale aben penso-o anyugun ketyüketsü khikeshü nke lati. Ale chenda nishüo temi lo senru metse nke lati. 14Noah, Daniel lo Job anyugun mishen nren tsünyu yhun bin yatse-e anyuugun kegwa le anyugun nti keni loti.” Aphu sokekvu Npugü le zo laso.
15“Nmvue ale tehen thyü nishüo temi tün-o kazü gü le nshvuo njwen gülo keshvu thyüla, 16lo temi hidan mishen le tsünyu yhun bin yatse-e anyugun le anyugun nyenyu dan-e keni loho- Aphu sokekvu Npugü, ale rhün kebin hontse. Anyugun le anyugun npvü anyugun keyhun kenilo lo kazü gü le temi le yhun kemvu bin thyü lati.
17“Nmvue ale teri zen ryüo kazü tsü ge shülo kenke terikanyü nishüo temi lo senru metse nkebu la, 18lo temi mishen dan tsü le tsünyu yhun bin yatse-e anyugun le anyugun npvü anyugun nyenyu dan-e kenilo ho, ai anyugun npvü anyugun keyhun keni loti. Aphu sokekvu Npugü, ale rhün kebin hontse.
19“Ale kenpen nme nipe kazü tsü nyu shü lo anyunkenta nyu temi lo senru keyhun kechon nke lao, 20Noah, Daniel lo Job dan le tsünyu yhun bin yatse-e temi tsü dan le anyugun nyenyu dan-e keni loho. Anyugun kegwa le anyugun keyhun nti kenilo ti.“ Aphu sokekvu Npugü, ale rhün kebin hontse.”
21Hile Aphu sokekvu Npugü le zobin: “Ale shaja gwakemvu tsin pezi nipe Jerusalem ge shü ti- tsü le teri, chenda, tehenthyü, lo kehokenyü no temi lo senru metse nke lati. 22Temi peha le rhün lo-o a-nyenyu kenilo yatselo, tsü dan le nki keryü ka anyugun nrishü. Anyugun le gwamvu pe dihontse yo nrishü, lo ale shaja zen-o Jerusalem ge ryü kejü tsü le tsonzü letse shatsentsü lo; ” 23tsüsiki nle ale thyükeshü kon aphu gwa letse shati.” Aphu sokekvu Npugü le zo laso.
Currently Selected:
EZEKIEL 14: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
