EZEKIEL 13
13
Sidyüjo Pe Pechenyu Sidyükesha Kenkunyu Ntsun Keshü
1Npugü le aka zo, 2“Silakehü temi gü, Israel sidyükeshanyu le anyugun npvü anyugun sidyüjo pe zokehü dan nkhin shülo. Anyugun no Npugü jo nyü lotse zoshü lo.”
3Hile Aphu sokekvu Npugü zo: “Sidyükesha kepho dan we thyü lo tiso! Anyugun le anyugun npvü thu keyhun lo rüchün kelo tsemin dan zohü. 4Israel temi dan, hagun sidyükeshanyu le nyida kenke nyu yhun kehü lihie kemvu mesükerun hontse laso. 5Anyugun le chwida nla kela-e rikhun mvu, nmvue chwida khwen nimvu, tsügenyu Npugü jon nyü teri le keryü ka Israel nyu nolo kemvui so. 6Anyugun tsemin kenku, lo anyugun le ryü kejü zo kehü dan-e a-kemvu. Anyugun le ajo zohü letse hü nyo, ai ale anyugun nishü mvu. Tson yatse-e anyugun le kezo jodan tsü le thyü pen titse nrin hü nyo! 7Ale anyugun ka zo: Hagun tsemin kehyu dan tsü le kenku, lo zokenjü dan tsüe a-kemvu. Hagun le tsüdan tsü le ajo letse hü ,ai ale hagun ka zomvu!”
8Tsügenyu Aphu sokekvu Npugü le tsü dan ka zo, “Hagun jo dan le kenku lo hagun tsemin dan-e a-kemvu. Ale hagun ntsun bin nyo. 9Ale shaja pe hagun sidyükeshanyu ketsinkemvu tsemin lo ryü kejü rüla zope me tsontsin zü kehü tsü ti. Hagun no a temi dan le tha rhi titse kequen kelo ka tsü bin loho; hagun zan lope Israel temi zan kethu nyu kesin mvulati; hagun le hagun kazü nyu niryü mvu lati. Tsüsiki hagun le ale Aphu sokekvu Npugü letse sha loti.
10“Sidyükeshanyu le aphu gwa bin letse zo-o a temi tsontsin zühü. Aphu ketsin gwa bin mvu! A temi dan le tsophen pe chwida khwen, lo tsüsiki sidyükezonyu le ryüo kechon pe nye. 11Sidyükeshanyu dan ka anyugun chwida le che güjüla sele tse zoshülo. Ale tsang no risa shüti. Tegwün che pe jon, lo terhi thyü pe tsü whün ti. 12Chwida le nla lati, lo temi aphu hagun ka kechon pe nye kethyü le dihontse gwa layo shün ti.”
13Hile Aphu sokekvu Npugü le hi zo, “A nyunkenta nyu tsangkenbu terhi, tsangri, lo tegwün no chwida nke lati. 14Anyugun le kechon pe nye kenjü tsü chwida boren lo kenyikho lao bin kezen tso no ndo lati tse nda bin. Tsü le nlao hagun jon shvu kü lati. Tsüselo temi aphu ale Npugü letse sha ti.
15“Chwida kekhwen lo kechon pe tsü nye keshü nyu le anyunkenta kekvu sha ti. Tsüselo ale chwida lo kechon pe nye kenjü-e nke laso tse zoshü ti- 16Tsü dan tsü le aphu gwa bin mvu-e aphu gwabin letse Jerusalem ka kezo sidyükesha dan.” Aphu sokekvu Npugü le zo laso.
Sidyüjo Pe Sidyükezo Tenudan Ntsun Keshü
17Npugü le zo, “Silakehü temi gü, ntemi dan nyu tenunyu ryü kejü rüla zo kehü dan nri shü. Anyugun nkhin shü. 18Lo Aphu sokekvu Npugü le anyugun ka zokebin jo pe zoshü lo:
“Hagun tenunyu dan we thyü loso! Hagun le temi dan no kechanyu so kekvu bin lo nrün genyu jadu nyu bengun kekhin ri lo pekesun phi da hü nyo. Hagun le a temi dan ge kerhün lo kesi kekvu khilo-o pe hagun kechwi thyü titse hü nyo. 19Hagun le barley jenthün gwa lo tensü pon me ponhvu hyulo nrün genyu a temi dan mhundyü nyu arühvu mvu lahü. Hagun le sila kü kemvu boshvula, lo yhunlo kü kemvu temi no yhun hü nyo. Tsü hontseo hagun le a temi dan sao anyugun le hagun tenyen hü nyo.”
20Higü hile Aphu sokekvu Npugü le zo, “Hagun le sen-o kerhün lo kesi kekhe titse kehü bengun kekhin tsü ale ntsü hü nyo. Ale hagun ben nyu tsü dan süthü pe shwen lao hagun le khin sen kehü a temi dan hoshü lati. 21Ale hagun mhun kesunphi dan süyhün lao a temi dan no hagun kekvu nyu bin mvu shü lati.Tsonlo hagun le ale Npugü letse sha ti.
22“Hagun kenku genyu temi kegwa nyu, ale nthyüla nyü hü kemvu dan no shese lahü. Hagun le temi gwakemvu nyu no a-tho gwakemvu khekela khin-o anyugun kenishü hünyo. 23Tsügenyu hagun tsemin kenku lo ryü kejü rüla zope me tsontsin zü kehü tsü le ndi so. Hagun no ale Npugü letse shalo nrün genyu ale hagun kekvu nyu a temi dan kenishwi shü bin nyo.”
Currently Selected:
EZEKIEL 13: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
