CHWEKETIN 8
8
1Tsontsin Npugü le Mosa ka, “Raja ki gü a-ka, ‘Npugü le, atemi dan no chwila lo, anyugun no arüshvu nrün genyu, tsonzo bin nle tse zoshülo. 2Ai nle nmvu yatselo ale tsegu pe nkazü hen-o nno kenjün thyüti. 3Tsegu no Nile züri kesü thyüo no chwiryü nrajaka, nzhütsen, nnoge, nhensin kedanyu dan lo ntemi kanyu, tsü ntimvu le maphun lo tensü kerobin-e süti. 4Tsegü no wheo nge, ntemi ge lo nhensin kedanyu aphu ge kü ryüti.’ ”
5Npugü le Mosa ka, “Aaron no a-thün penketape züri, zünyetson lo züboun dan sa shüo tsegu dan thyü pe no chwiryü Ijipt kazü jeh shülo tsonshü.” 6Tson-o Aaron le a-thün ketape zü aphu so shüo tsegu no chwiryü kazü jeh lola. 7Ai temvunyu dan ko temvuo tsegu dan thyüpe kazü soge shüla.
8Raja gü le Mosa lo Aaron au koshüo au ka, “Npugü ka hishüo no tsegu dan hi sentin lalo, lo ale ntemi dan no kerüshvu thyüpe Npugü tsü nrün genyu hoshü lati le.”
9Mosa le, “Ale ngenyu kehi thyü nrün asherhün le. Ano dicheka ngenyu, nhensin kedanyu, lo ntemi genyu kehithyü tiyo gwenkho tho shüta. Tson yatselo Nile Züri nyu kemvu we tsegu nme ndi la-o hagun le rüyü loti.”
10Raja güle, “senduki agenyu kehi thyü shülo tsonshü.”
Mosa le, “Nkehi hontse ale thyüshüti, tson-o nno Npugü, agun Sunggigü hontse kethyü terokecha nme kendi sha loti, 11Nle, nhensin kedanyu, lo ntemi dan no rüyü loti, tsegu no Nile züri nyu kemvu we kecha nme ka binmvu lati.” 12Tson-o Mosa lo Aaron au le raja kanyu chwila, lo Mosa le Npugü no tsegu senryü raja gü ge shükenjü tsü sen tinla lotse kehi thyüshü. 13Npugü le Mosa kehi thyüshüo kanyu, katekho, lo lonyu tsegu le sila. 14Ijipt nyu le tsü jünkequen pe athun thun thyüo tenpe arün le kesü thyüla. 15Raja güle tsegu dan le sikela hyushüo, Npugü le zokeshü hontse a-nyu rünila-o Mosa lo Aaron au khwenyü shü mvula.
Tekhvu
16Npugü le Mosa ka, “Aaron no a-thün pe kazü vüshülo tse zoshü, lo Ijipt kazü aphu nyu kenphü le tekhvu ngwa lati.” 17Tson-o Aaron le a-thün pe kazü vüshü laryü Ijipt nyu kenphü aphu tekhvu ngwala, tsüle temi lo nyukhu aphu jeh la. 18Temvu nyu dan ko tekhvu no chwiryü titse thyü kendi la. Tekhvu le lika hika süla, 19lo temvunyu jule gü raja güka, “Hile Sunggigü le thyü shü laso.” Tson-e Npugü le zokeshü hontse raja güle anyun rüla-o Mosa lo Aaron au khwenyü shü mvula.
Temhou
20Npugü le Mosa ka, “Sendu ki lonyü nshwe gü raja gü le züri ki gü kejü teno-o a-ka, Npugü le zobin nle. ‘Atemi dan no chwila lo, anyugun no arüshvu nrün genyu tsonshülo. 21Nle nmvu yatselo ale shaja temhou nipe nge, nhensin kedanyu, lo ntemi ge shüti. Ijipt nyu ka lo a-kazü aphunyu temhou no jeh lati. 22Ai ale atemi le yhun kebin Goshen lojvü pe kecha thyülo la-o tsünyu temhou no bin loha. Ale hi thyüshüo nno, ale Npugü, ale kazü higünyu thathyü bin tse kethyü sha loti. 23Ale atemi lo ntemi tse jaka kecha thyüshüti. Nduntho higü hi sendu ki thyüso ti.’ ” 24Npugü le temhou danda nipe raja gü ka lo a-hensin kedanyu ju kanyu shü. Temhou genyu Ijipt kazü aphu bo nshvula.
25Tsüselo Raja güle Mosa lo Aaron au koshüo au ka, “Gü kazü higünyu kerüshvu thyüpe hagun Sunggigü ki shülo.”
26Tsontsin Mosa le, “Tsühontse kethyü le a-zü kemvui,” “agun le nyukhu pe Npugü agun Sunggigü rüshvu kethyü tsü Ijipt nyu le a-kenyümvu kelai. Agun le Ijipt nyu le hyu kebin ka nyukhu dan dushvu pe kerüshvu thyüshülo anyugun le a-nyu kenyü mvuo tso pe agun jonshvu kelai le. 27Npugü Sunggigü le ahza pe agun ketsü hontse agun le jonshen njwe gü tehenyhunkemvu bin nyu kerüshvu thyüpe a-tsümvu lo shvu le.”
28Raja güle, “Hagun le nithen ri gü kemvui yatselo ale hagun no tehenyhunkemvu bin ki gü kerüshvu thyü pe Npugü, hagun Sunggigü tsü tile. Agenyu hi shülo.”
29Mosa le, “Ale nnkentinlo, senduki temhou no nge, nhensin kedanyu, lo ntemi dan ge tinlalo tse Npugü ka hishüti. Ai nle agun sa, lo temi dan no kerüshvu thyüpe Npugü ki keshü khinni nyalo.”
30Tson-o Mosa le raja gü nkentin gü Npugü ka kehi thyü shü, 31lo Npugü le Mosa kehi hontse thyüshü. Temhou le raja gü, a-hensin kedanyu lo a-temi dan ge tinla, nme nti-e bin mvula. 32Ai higü gwenkho ka-e raja gü le anyurüo a-le temi dan no gümvu nila.
Currently Selected:
CHWEKETIN 8: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
