CHWEKETIN 38
38
Kero Kershvubin Kethyü
(Chw 27:1-8)
1A-le akakia sen pe rope kershvubin nme thyülo. Tsüle kethon keda ketun, kethon tsu pvün, keda tsu pvün lo ketetso tsu hvu. 2A-le a-qün pezi ka a-sozin a-to thyüshü, tson-o tsüdan no kershvubin gü zen kesü thyüme thyü. Lo lazo pe tsü aphu jeh la. 3A-le kershvubin gü ka kanyü aphu thyüshü: khun, kekinvü, khunda, pharo lo makekhükhun. Kanyü hidan aphu lazo pe thyü. 4A-le lazo pe kekhen nme thyü pe kershvubin tekehun hensin shüo tsüno kershvubin gü neka bin. 5A-le raho pezi thyü pe qünzi ka tsü shü. 6A-le akakia sen pe kepenvü thyü lo-o lazo pe jeh la, 7tson-o pe kershvubin te lizin hizin raho nyu shüla. Kershvubin güle senpon pe thyü lo tsüle a-lvu nkun.
Lazo Khunda Gü Kethyü
(Chw 30:18)
8A-le lazo khunda lo tsü kedunbin le Npugü kehü phika gü khenpvü ka lothyü kehü tenunyu ju shyeshwi dan pe thyülo.
Npugü Kehü Phika Gü Kamhun
(Chw 27:9-19)
9Npugü kehü Phika gü kamhun kehun genyu a-le linen kegwa pe kesunphi thyülo. Tesin zin kesunphi gü kethon le tsu tsi me, 10Kachon nki lo a-pha ketun nki tsüle lazo pe thyü, ai hükesü lo kephin ron we suna gi pe thyü. 11Lo kamhun teso zin ko tsü keme. 12Nkhün zin le kethon tsu henpvü, kachon tseryü lo a-pha ketun tseryü lo rakagi pe hükesü lo kephin ron thyü. 13Nphozin, khenpvü le kebin kipon ka kamhun le tsu henpvün le bin. 14-15Khenpvü lizin hizin kesunphi tsu tseryü pvün lo kachon kenshen lo a-pha ketun kenshen tse pe thyü. 16Kamhun kehun kesunphi aphu linen kegwa pethyü. 17Kachon phaketun dan le lazo pe thyü lo hükesü, kephin ron lo kachon pesun kehen le rakagi pethyü. Kamhun kehun kachon aphu rakagi pe phinkesü. 18Kamhun nyu keyü khenpvü kesunphi le linen kegwa kenzi, kemeren lo thyühü kenhon pe dao a-ge tha zü pe shü. Tsüle kamhun kesunphi hontse kethon tsu nki lo keda tsu pvün. 19Tsüle lazo kachon pvün pe a-pha ketun pvün nyu shüpe run lo hükesü, a-pesun kehen lo kephin ron dan le rakagi pe thyü. 20Phika gü lo kamhun kehun aphu tsekesü le lazo pe thyü kü.
Npugü Kehü Phika Kethyü Ka Kesen Kanyü
21Npugü kehü phika, johokeshü kon tseryü pe a-ge thu kenjü tsopon hvu pe shü kebin gü kethyü ka sen kela kanyü dan le hihontse. Mosa le ahza khishüo Aaron püshükeda gü nyugü Ithamar hensin thatho kethyünyu dan le thushü.
22Juda tsipwe Hur nyu Uri nyugü Bezalel le Npugü le zokeshü hontse tha aphu thyülo. 23A-kechegü, Dan tsipwe Ahimasak nyugü Oholiab le thathyükesha, zükesha lo linen kegwa sen-o kenzi, kemeren, lo thyühü kenhon sen-o phi do keshanyu nme.
24Kenshün Phika gü genyu khikho pe Npugü tsü kela suna aphu le kilogram yieme tsü gwenkho ka senkehü pe ndo kethyü. 25Lo temi swü kethyü ka hyukelo rakagi le kilogram yie shen-o tsizio shenryü. 26Hile temi keswü ka a-zan thu kelonyu aphu nmeme tse dikho shülo tseyo khikeshü le tsonla. Pechenyu chen nki sole 603,550 swülo. 27Rakagi kilogram 3,400 pe kenshün phika gü lo kesunphi kachon dan pha ketun thyü, nmeme le kilogram 34 pe thyü. 28Lo rakagi nsenkebin kilogram shenryü tsü Bezalel le pe kachon dan ka hükesü, kephinron lo kachon pe kehen dan thyü. 29Khikho pe Npugü tsü kela lazo le kilogram 2,425. 30A-le tsüpe Npugü kehü phika günyu keyü khenpvü kapha ketun, lazo kershvubin gü lo tsü pha kekhen, lo Kershvubin gü nyu kanyü dan aphu thyülo, 31Kamhun kehun lo kamhun nyu keyü khenpvü lo phika günyu tsekesü dan aphu thyü.
Currently Selected:
CHWEKETIN 38: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
