CHWEKETIN 37
37
Kejozenkelo Khinpha Gü Kethyü
(Chw 25:10-25)
1Bezalel le akakia sen pe Kejozenkelo Khinpha gü thyülo, kethon tsu hvu-o peha, keda tsu me-o peha lo ketetso tsu me-o peha. 2A-le suna ketsin pe a-nyuzin lo a-sozin-e jeh la lo suna pe a-te aphu hunla. 3A-le suna pe pen nrün raho pezi thyüpe a-qün pezi dan ge senla, pehazin kenyhunyhun tseo. 4A-le akakia sen pe kepenvü thyülo suna pe jeh la, 5tson-o pe khinpha lizin hizin raho günyu nnala. 6A-le suna ketsin pe shwikenjün bin nme thyülo, kethon tsu hvuo peha lo keda tsu meo peha. 7A-le kejonvü lo suna jon pe cherubim kenyhun thyülo, 8nmeme no shwikenjün bin te lizin hizin shü shü. A-le tsühvu thyüpe shwikenjün bin gü zen thyüme thyüshü. 9Cherubim hvu mhun le kentsun lo au sekin sükhun pe shwikenjün bin gü hen.
Tensü pe Sunggigü Ketsü Miz Gü Kethyü
(Chw 25:23-30)
10A-le akakia sen pe miz gü thyülo, kethon tsu hvu, keda tsu me lo ketetso tsu meo peha. 11A-le suna ketsin pe tsü jeh la lo suna pe a-te hunla. 12A-le a-te kehun nbenje kho thyüpe hunshüo suna pe a-tesü la. 13A-le kepenbin suna raho pezi thyüpe a-pha dan le kebin qün zi ka shüla. 14Kepenvü pe shüo miz gü pen nrün raho dan pe a-tekehun khoka shüla. 15A-le akakia sen pe kepenvü thyülo-o suna pe jeh la. 16A-le suna ketsin pe miz gü ge kesen thakhin dan thyülo: khun, honpen, nja lo zu pe kerüshvu ka senkehü khun dan.
Makenben Bin Gü Kethyü
(Chw 25:31-40)
17A-le suna ketsin pe makenben bin gü thyülo. Kejenvü suna jon pe a-pha lo a-kejenbin thyülo: gwenkezegwa kethyü nyedan, a-kengen lo a-kon kesin-o tsü zenkesü nme thyü
18Lizin hizin kenshen shen thyüo, a-teki a-ro tsero le chwiryü. 19A-ro tsero tsü nmeme tse gwenkezegwa kethyü almond le poun lo nngen kebin hontse kethyü kenshen le bin. 20Makenben bin gü le gwenkezegwa kethyü almond le poun lo nngen kebin hontse kethyü pezi le bin. 21A-ro kenyhun kepen chwikeryü kenshen tsü hensin a-kengen nme le bin kü. 22A-kengen, a-rodan, lo makenbenbin tsüle kejonvü lo suna jon kesü pe kethyü nme. 23A-le makenbenbin tsenyü genyu makhin tsenyü, tsü ketsevü lo kepenkhun dan suna ketsin pe thyülo. 24A-le suna kilogram shenryü pvün pe makenbenbin lo tsü kanyü aphu thyülo.
Tharünkegwa Ro Nrün Kershvubin Kethyü
(Chw 30:1-5)
25A-le akakia sen pe tharünkegwa rope kershvubin nme thyü lo. Tsüle kethon keda ketun, kethon tsu me, keda tsu me, lo ketetso tsu hvu. A-qün pezi ka a-to dan kesü pe thyü me. 26A-le suna ketsin pe a-so, a-te lizin hizin lo a-to dan a-phu jeh la lo suna pe a-tehun küla. 27Lo suna raho kenyhun thyü pe a-tekekho hensin lizin hizin senshüo pen nrün genyu kepenvü pe tsünyu shü. 28A-le akakia sen pe kepenvü thyüo suna pe jeh la.
Yün kehü terzü lo Tharünkegwa Kethyü
(Chw 30:22-23)
29A-le yün kehü kenshün terzü lo tharün kegwa kerhün pe tharün ketehi hontse thyülo.
Currently Selected:
CHWEKETIN 37: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
