CHWEKETIN 36
36
1“Bezalel, Oholiab lo Npugü le thathyükesha lo thakesha pe tsü kela dihontse kenshün Phika gü nyu senmvu lo keshvu lihi-e thyü tiyo sha kebin nyu dan le Npugü le johokeshü gwenzin tse lihi-e thyüti.”
Temi Dan Le Kenrunnyu Thakechon Senryü
2Mosa le Bezalel, Oholiab lo Npugü le thathyülo kegwa pe tsükela, keche shünyü kebin thathyü kesha kechanyu dan koshüo anyugun no thathyü so gwenlo tseshü. 3Anyugun le Mosa ka Israel nyu le kenshün Phika gü thyü nrün genyu thaho keshü aphu khilo. Ai Israel temi dan le lonyütsen thakhisen-o Mosa ki ryübin. 4Tsontsin thathyü kebin temi thathyükesha dan le gü 5Mosa ka zoshü, “Npugü le agun no thyüshü lotse johokeshü gü genyu senmvulo keshvu nyeki kerüche temi dan le sen ryü bin laso,” tsonshü.
6Tsügenyu Mosa le ahza nipe kensenbin aphu ka temi nme no kenshün phika gü genyu tha hoshü nya gwenlo tse shü; tson-o temi dan le tha sen niryü mvula. 7Senryü kela tsüle thatho aphu thyülo kegwa nye rüche kela genyu.
Npugü Kehü Phika Kethyü
(Chw 26:1-37)
8Thatho gü thyükebin dan nyu thathyükesha tsin dan le Npugü kehü Phika gü thyüshü. Anyugun le linen kegwa kenzi, kemeren lo thyühü pe do-o a-ge cherubim men zü kethyü tseryü pe thyülo. 9A-phu kethon keda le ketun kü, kethon tsu nkio tetse lo keda tsu zi. 10Anyugun le pvün rikesü pe nme thyü lo kecha pvün ko tsühontse thyü. 11Anyugun le phi kenzi pe rükesü lo kegwa ron thyüpe a-mhun tegwenzin shü. 12Rikesü lo kegwa ron henpvün pe nme ge shü lo tsü kendyü to henpvün pe phi kecha gü ge koshü. 13Anyugun le phi kenyhun tsü sükerhün pe nme thyü nrün genyu suna hükesü henpvün thyülo.
14Tson-o anyugun le phika gü kehen genyu tenyü hü pe phi tseryü nme dolo. 15Aphu kethon keda no ketun kü, kethon tsu shenryü keda tsu zi. 16Anyugun le pvün rikesü pe nme thyü lo kecha tsero pe nme thyü tselo. 17Rikesü lokegwa ron henpvün le phimhun nme ge shü lo henpvün pe kecha gü ge shü. 18Anyugun le phi kenyhun sükerhün pe a-so kehen nme thyülo nrün genyu lazo hükesü henpvün thyülo. 19Anyugun le tegwen zin kehen genyu tenyü gi rün nhon kela lo thyügi kegwa pe kehen phi kenyhun thyü sinlo.
20Tson-o anyugun le akakia sen pe phika gü genyu a-run dan thyü ndun lo. 21A-run nme le ketetso tsu tseryü lo keda tsu meo peha, 22A-run dan sükerhün lo kegwa thyü nrün genyu a-to kendyü to kethyü kenyhun no shü. A-run aphu ge a-to hidan pe shü. 23Tesin zin genyu a-run nki thyüshü, 24lo a-pha ketun a-run nme genyu kenyhun yhun pe a-hensin a-to hvu tun nrün rakagi pe henzi thyüshü. 25Phika gü tesozin genyu anyu gun le a-run nki thyüshü, 26lo a-run nme hensin kenyhun thyüo rakagi pe a-pha ketun henzi thyüshü. 27Phika gü sizin, nkhün kipon anyugun le a-run tsero thyüshü 28a-qün hvu genyu a-run kenyhun. 29A-qün ka a-run dan le a-phaka sükerhün lo-o kehüsü gü a-ra ti. A-qün ka a-run hvu genyu hihontse thyülo. 30Tson-o a-run nme hensin kenyhun thyüo a-run tetse genyu rakagi pe kethyü ketun tseryüo tsero le bin.
31A-nyugun le akakia sen pe kenpere tseryüpvün thyülo, Phika gü pehazin karun dan genyu pvün, 32kecha zin a-run dan genyu pvün, lo pvün le ka sizin nkhün kipon genyu tse. 33A-lvu ka kenpere gü no a-run gü nenyu phika gü te nme zin gü kecha kipon a-te ti. 34Anyugun le suna pe a-run dan lo kenpere dan ko jeh kü lao suna raho pe phinkesü küla.
35Anyugun le linen phi kegwa kenzi, kemeren, lo thyühü kenhon pe do-o cherubim men züpe a-ge keshü kesunphi thyülo. 36Kesunphi gü senshon nrün genyu akakia sen pe kachon pezi thyülo-o suna pe jeh la, lo suna hükesü pe a-ge shü küla. Tson-o kachon dan run nrün rakagi pe kachon pha ketun pezi thyülo. 37Phika günyu keyü khenpvü kesun genyu linen kegwa kenzi, kemeren, lo thyühü kenhon pe do-o a-ge a-jvüzü kezegwalo. 38Kesunphi higü genyu anyugun le kachon pvün thyülo-o hükesü pe a-ge shü, suna pe a-ra lo a-thin jeh la, lo kachon dan genyu lazo pe aketun pvün thyülo.
Currently Selected:
CHWEKETIN 36: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
