CHWEKETIN 35
35
Sabbath Tejvü
1Mosa le Israel temi aphu ko kequen lo-o anyugun ka zoshü, “Npugü le hagun no thyü lotse johokeshü le hi: 2Hagun no hagun tho thyülo nrün jon tsero le bin ai jon tsenyü gü pe kenshün jon thyüo, thyü kenshün pe Npugü, ahigü tsükela kerüyü jon nme thyüti. Lihigü tsünyü thatho lihi thyülo no silati. 3Sabbath jon nyü nkanyu mah-e thyü nya.”
Phika Kenshün gü Genyu Tha hokeshü
(Chw 25:1-9)
4Mosa le Israel temi aphu ka zoshü, “Npugü le johokeshü le hi: 5Thape Npugü kerüshvu nme thyülo. Lihigü tson kenyü güle suna, rakagi nmvue lazo; 6linen phi kegwa; thyühü phi, kenzi, kemeren, lo kenhon; tenyü hü pe kedophi; 7tenyü tse gi rün nhon kela; thyügi kegwa; akakia sen; 8makhin ka kesen terzü; yün kehü terzü lo ro nrün genyu tharün kegwa dan; 9Püshükeda gü mirün lo a-shüntyü ka keshü karnelian lo tso minketsen kecha dan sen ryülo.
Npugü Kehü Phika Gü Genyu Kanyüdan
(Chw 39:32-43)
10“Hagun dan nyu thathyü keshanyu aphu no ryü lihi-e Npugü le johokeshü gü tsü thyüti: 11Phika gü, tsü kesun, lo tsü tegwenzin kesun, hükesü, lo a-run, kenpere, kachon lo a-ketun; 12Kejozenkelo Khinpha gü, tsü kepenvü, shwikenjün bin gü, lo sen nshon pe tsü sun nrün phi; 13miz gü, tsü kepenvü, lo tsü kanyü aphu pe Npugü tsükela tensü gü, 14makenben genyu makhin kedunbin lo tsü kanyü dan makhin dan lo terzü. 15Tharün kegwa ro nrün kershvubin lo tsü kepenvü; yün kehü terzü; tharün kegwa; Phika günyu keyü khenpvü kesunphi gü; 16rope rüshvu nrün kershvubin gü, lazo pe kedyübin thyü pe senshü, tsü kepenvü lo a-kanyü aphu; sükehü khunda lo tsü kedunbin; 17kanyutsen gü kesun phi; tsü kachon lo tsü ketun kanyutsen gü ki keyü khenpvü kesun phi; 18ketseyi lo phika gü kanyutsen gü genyu ron; 19Püshükeda nyu dan le kenshün bin günyu lothyü lo ben nrün phinya kegwa dan--Püshükeda gü Aaron lo a-nyudan genyu kenshün phi dan.”
Temi Dan le Thahoshü Titse Senkeryü
20Israel temi dan aphu tinla, 21lo lihigü Npugü kehü phika gü genyu tha thyüshü nyü kebin nyu le senryü Npugü tsü shü. Anyugun le kerüshvu ka kesen lo Püshükeda phinya thyü nrün genyu senmvulo keshvu lihi-e senryü. 22Peche-e tenu-e a-kenyü kethyü nyule, kebünchwen, nye, benkhin, tyü lo suna pe kethyü kontyü lihi-e senryüo tsü thyünshün pe Npugü tsü shü. 23Linen phikegwa, kenzi, kemeren nmvue thyühüphi kenhon; tenyühü pe kedophi tenyütse gi rün nhon kethyü; nmvue thyügi kegwa le kebin nyu lihigü senryü. 24Rakagi nmvue lazo pe Npugü tsülo kegwa nyu aphu senryü, lo akakia sen le bin-o pe tha lihi-e thyülo kegwanyu aphu senryü. 25Tenunyu thathyü keshanyu dan le anyugun le thyükelo linen ni kegwa, kenzi, kemeren, thyühü ni kenhon, dan senryü. 26Anyugun le tenyü hü pe ni ko thyülo. 27Sharhinyu dan le Püshükeda mirün lo shüntyü ge shü nrün genyu karnelian lo tso minketsen kecha dan, 28lo makhin genyu terzü, yün kehü terzü, lo tharünkegwa genyu tharünkenyi lo terzü senryü. 29Israel temi aphu Mosa le thyülo tse johokeshü hontse a-kenyü nyu aphu tha senryü Npugü tsüshü.
Npugü Kehü Phika Gü Genyu Thathyükesha Temi
(Chw 31:1-11)
30Mosa le Israel nyu ka zoshü, “Npugü le Juda tsipwe nyu Hur nyugü Uri nyu Bezelel kejülo laso, 31Sunggigü le a-kekvu pe a-kesü thyü shü laso, lo thathyükesha, thathyülo kegwa, lo thatho lihi-e sha kekholo kegwa pe a-tsü laso, 32a-no thyü shasa tse a-joja dan rhilo-o suna, rakagi lo lazo pe tsü thyü, 33tso minketsen dukho pe tsü geshü; tesen run; lo thatho kecha lihi-e thyü nrün genyu. 34Npugü le Bezelel lo Dan tsipwe nyu Ahisamak nyugü Oholiab au no au do pe kechanyu senthyü lo kegwa pe tsü laso. 35A-le thathyükeshanyu, thazükeshanyu, linen phikegwa, kenzi, kemeren lo thyühü kenhon lo phi kecha do kehünyu lo thatho lihi-e thyülo kegwanyu thathyü kesha pe au tsü laso. Au le thatho lihi-e thyü logwa lo joja thyü shasa kehünyu.
Currently Selected:
CHWEKETIN 35: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
