CHWEKETIN 30
30
Tharünkegwa Kero Kershvubin
(Chw 37:25-28)
1“Tharünkegwa ro nrün genyu akakia sen pe kershvubin nme thyülo. 2Tsüle kethon keda ketunkü ti, kethon tsu me, keda tsu me lo ketetso tsu hvu. Aqün ka a-tse dan kesin thyüme ti. 3Suna ketsin pe a-so, a-te lizin hizin lo a-tse aphu jeh lo, lo suna pe a-tekho hunlo. 4Kepenvü pe nna-o pen nrün genyu suna pe raho kenyhun thyüpe a-tekekho kepen hensin nyu senkesü shü. 5Akakia sen pe kepenvü hidan thyülo-o suna pe jeh lo. 6Kershvubin higü pe kejozenkelo khinpha gü mhundyü nyu phi süden kebin ngwenzin shülo. Ale bin tsügü ka hagun teno ti. 7Lonyütsen Aaron le makhin dan ketsükela keryüka, a-le tharün kegwa pe tsüge roshü ti. 8A-le kheje gü makhin nben kethyü ka-e tson shü mvuloshvu. Ryükejü gwenkho aphu ka tharün kegwa kero hi khemvu tse thyüzin bin ti. 9Kershvubin hi ge nshün kemvu tharün kenyü, nyukhu, nmvue shyeni, lo vain zu-e ja pe tsüge rüshvu nya. 10Chen me ka gwengwa Aaron le kemu rothyükela nyukhu zi gü pe kershvubin tse pezi dan ge shüo kershvubin gü thyü nshün kelo jvu thyü ti. Ryükejü gwenkho aphu nyu chenkechwi hihontse thyüti. Kershvubin higü no nshün pen, lo khikho kechathyü pe Npugü, atsüti.”
Npugü le Kehü Phika Gü Ngu
11Npugü le Mosa ka zoshü, 12“Nle Israel nyu temi keswü ka, temi nmeme tse a-keyhun mi pe atsüti, tson-o temi swükelo ka kenkekemhü nme no ryümvu nrün genyu. 13Temi keswü ka swü pe sinlo kelanyu nmeme tse pisa dikho shümvulo shvuyo tsü kho tsü then-o shüti. Temi aphu tsüpe akerüshvu hontse tsüpe atsü mvulo shvu. 14Ligü higü temi keswü ka swülo kelanyu, tsü le a-keyhun chen nki lo tsüsa kelanyu le pisa higü pe atsüti. 15A nyugun le anyu keyhun genyu pisa higü khi keshü ka kenya gü no chon lo kendi gü no rho tse kemvui. 16Israel nyu temi dan ka pisa higü shvulo-o pe ale kehü phika gü genyu mvulo keshvu thyülo. Keshvu higü hile anyugun keyhun mi thyü keshü lo ale tsü rüchün-o anyugun ntsen loti.”
Lazo Khunda Gü
17Npugü le Mosa ka zoshü, 18“Lazo pe khunda nme lo a-kedunbin tse thyülo. Tson-o pe phika gü lo kershvubin au jaka shüo züpe tsünyu shülo. 19Aaron lo anyu dan le zü tsüpe anyugun phaben süti, 20anyugun le phika gü nyuyü nmvue kershvubin karyüo ketyüketsü pe rüshvu kethyü mhundyü. Tson yatselo anyugun le sila loho. 21Anyugun no silamvu nrün genyu anyugun phaben süla mvu loshvu. Hile anyugun lo anyu nyenyu genyu kethonthen then kehü jvu nme thyüti.”
Yünkethyü Terzü
22Npugü le Mosa ka zoshü, 23“Terzü rünkegwa tsin dan-myrrh kilogram tsero, sinnamon rünkegwa kilogram kenshen, ter rünkegwa kilogram kenshen, 24lo kassia kilogram tsero khilo (Kensu dan aphu mele sen kehü khoti.) Oliv terzü liter pezi pe sinlo, 25lo tharünkenyü pe kerhün pe yün kethyü terzü kenshün thyülo. 26Tsüpe ale kehü phika gü lo kejozenkelo khinpha gü, 27miz lo tsüka kesen kanyü, makhin lo tsü kanyü, tharünkenyü ro nrün kershvubin gü, 28rope kerüshvu thyü kehü kershvubin lo tsünyu kesen kanyü aphu kesin lo sü nrün khunda lo a-kedunbin aphu yünlo. 29Hihontseo hidan hi thyü kenshün lo, tson yatselo hidan le nshün pen lati lo temi nmvue lihi-e tsüdan kesü keshü güle tsü kenshün kekvu güle nthyünnyü lati. 30Tsüsika terzü pe Aaron lo anyu dan yün-o khikho kecha thyü pe alotho genyu püshükeda thyülo. 31Israel nyu temi ka, ‘Ryükejü gwenkho aphu nyu a lotho ka yün kethyü terzü kenshün higü senti tse zoshülo. 32Tsü jape temi kedukerunyu ge shünya, lo nle hihontse kerhün kethyü jvu kecha we thyü nya. Tsüle nshün tsügenyu tsü sen kenshün thyümvulo shvu. 33Temi ligü higü tsühontse thyü nmvue püshükeda nyu kemvu ge tsü sen lo a-le atemi letse rüchün nimvu lati.’ ”
Tharün Kenyi Gü
34Npugü le Mosa ka zoshü, “Tharünkegwa hidan hi ketunkü kü khilo--stakte, onikha, galbanum, lo nshünchün ketsin, 35tsüdan pe tharünkenyi kerhün-o tharünkegwa thyülo. Tsüno shvu lamvu lo nshün nrün genyu tsi pe shülo. 36Tson-o peha jonshwe kegwathyü lo-o sen gü ale kehü phika günyu kejozenkelo khinpha gü mhundyü nyu kezenshü. Tharünkegwa higü hile nshün pen tseo senlo. 37N npfü ngenyu tharünkegwa tsühontse kethyü jvü lihi-e thyü sen nya. Tsüle thyükenshün pe atsükela kenshün kanyü tse senlo. 38Lihigü tharünkegwa tsü hontse kethyü thyü sen lo, a-le atemi letse rüchün nimvu lati.”
Currently Selected:
CHWEKETIN 30: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
