CHWEKETIN 29
29
Aaron lo Anyudan thyü Kenshün Pe Püshükeda Kethyü
(Lev 8:1-36)
1“Nle hihontse Aaron lo anyu dan thyü kenshün pe anyugun no alotho nyu püshükeda thyüti. Tetsin nme kendi methu tsebwe nme lo tanyü tse kenyhun khilo. 2Tho kegwatsin, kebu no shü nyao peha pe oliv terzü ka tsen, peha ka terzü no shü nya lo peha terzü pe yün-o tsenlo. 3Tson-o nle methu tse gü lo tanyü tsehvu pe akerüshvu ka tensü tsüpe rokhu nme ka shü senryü atsü shülo.
4“Aaron lo anyudan zenryü phika gü khenpvü ka shüo anyugun no zülula lotse zoshü. 5Tson-o püshükeda phinya bola püshükeda bola hensin tsükeryü mirün ketseyho, püshükeda bola, shüntyü, lo senkephin pe Aaron no pfülo. 6Pekeju gü pe a-ge shüo tsüge khikho kecha thyü kela kenshün zansü ‘Thyükenshün pe Npugü tsü laso’ tse thu kenjü gü pe phinshü. 7Tson-o yün kehü terzü gü jape a-pe ge shüo a-yünlo.
8“A-nyudan zen ryüo bola pe nben shü; 9senkephin pe anyugun sen phinshü lo pekeju pe anyugun npfüshü. Tsü hontse nle Aaron lo anyudan khikho kecha thyü loti. Anyugun lo anyu tsipwe no kethonthen püshükeda thyüo alo thyüti.
10“Methu tse gü zenryüo ale kehü phika gü mhundyü nyu shüo Aaron lo anyu dan no anyugun ben shwen pe a-pe ge shü lo tse zoshü. 11Tson-o Phika gü khenpvü nyu amhundyü ka methu tse gü dushvulo. 12Lo nzenkero pe methu tse gü zi peha khilo njüo pe kershvubin gü tse dan yünshü. Lo a-sen jape kershvubin gü pha ka shüla. 13Tsüsika, a-rikerho, a-sen kegwatsin gü, a-kisha hvu pe kershvubin ge rope arüshvula. 14Ai methu tse gü thyü, a-gi lo a-vüri pe kensenbin teki ro lalo. Higü hile püshükeda nyu kemu sen tin la nrün kershvu le.
15“Tanyü tse nme khi lo-o Aaron lo anyudan no ben shwen pe tsügü pe ge shü lotse zoshü. 16Lo tsü dushvuo a-zi shwe pe kershvubin qünzi aphu nyu shülo. 17Tanyü thyü gü duthü lo; a-ri lo apha sü la-o pe a-pe lo a-thyükecha dan so ge shülo. 18Ketyüketsü pe kerüshvu hontse tanyü gü apentha pe kershvubin ge rola. Kerüshvu higü rün le akenyü.
19“Thyü nshün nrün genyu senkehü tanyü kechagü, khilo-o Aaron lo anyudan no ben shwen pe tsügü pe ge shü lotse zoshü lo. 20Tson-o dushvu lo njüo a-zi peha pe Aaron lo anyudan yhütin nzhüzin, ben nzhüzin a-zentsü, lo pha nzhüzin a-zentsü tse yün lo. Lo a-sen shwen pe kershvubin gü te lizin hizin shüla lo. 21Kershvubin ge tezi peha lo yün kehü terzü peha tse khilo-o kezen pe Aaron lo anyudan a-nyugun phinya ge shü shü. Tson-o Aaron, a-nyudan, lo anyugun phinya thyükenshün pe atsüla lo.
22“Tanyü tse gü keshvu, a-ma keshvu, a-rikerho, a-sen kegwatsin, a-kisha hvu pe a-ge a-keshvu sin, lo a-din njüzin tse duthülo. 23Khipe atsü kela tensü rokhu günyu tensü kechacha kethyü: oliv ter ka tsen kethyü nme, terzü lo shükemvu nme, lo tensü kerüpfü kecha nme tse khilo. 24Ketyüketsü hidan hi aphu pe Aaron lo anyu dan bennyu shüo anyugun no thyü kenshün pe atsüshülo tse zoshülo. 25Tson-o anyugun bennyu tsü khilo-o pe rope kerüshvu so ge shüo ketyüketsü pe kerüshvu hontse rope atsülo. Kerüshvu higü rün le a kenyü.
26“Tanyü tse higü nyü khilo-o jwe kerüche thyü kenshün pe atsüshü. Thyü higü hile njün thyüti.
27“Püshükeda nyu nme khikho kecha thyü keloka tanyü tse gü nyü lo a-din khikho kecha kethyü ka sen kehü dan pe jwe kerüche hontse thyükenshün pe atsü, tson-o püshükedanyu pe kecha thyülo. 28Atemi dan le kepfüshe kerüshvu kethyü ka, nyukhu gü nyü, lo a-din le püshükedanyu jün thyüzin gunti. Hile temi dan le pe Npugü, ahigü ketsü.
29“Aaron püshükeda phinya le a-kesi siki kela pe a-nyu dan tsüti, anyugun khikho kecha thyü lola yatselo anyugun no ben nrün genyu. 30Aaron nyu a-sunka püshükeda thyü kebin lo phika günyu kenshün bin ka amhundyü nyu yü lothyü kebin güle jon tsenyü phinya hidan senti.
31“Aaron lo anyu dan thyünshün kelo tanyü tse gü thyü pe kenshün bin nme ka nilo. 32Phika günyu keyü tson ka amhundyü nyu anyugun le tsüpe rokhu ka tensü le kebin gü tsü nyütyü ti. 33Khikho kecha kethyü ka anyugun kemu jükela jvü nyu senkela hon dan anyugun le tyüti. Hile nshün kethyü genyu püshükedanyu nti hi tyüti. 34Thyü nmvue tensü peha nsen bin-o lonyü tila yatselo; tsü pe rolati; tsüle nshün kethyü genyu tsü tyünya.
35“Ale nka johokeshü hontse Aaron lo anyu dan khikho kecha kethyü jvu tsü jon tsenyü pento thyüti. 36Kemu jüla nrün genyu khenyü me methu tse nmeme pe kerüshvu thyüti. Hile kershvubin gü thyü nshün lati. Tson-o oliv terzü pe tsü yün-o thyü kenshün lo. 37Jon tsenyü khenyütsen hihontse thyülo. Tsonlo kershvubin gü le nshün pen lati, lo ligü higü nmvue lihi-e tsü kesü keshü güle, bin tsügü kenshün kekvu le nthyü nnyü lati.
Khenyütsen Kerüshvu
(Tsip 28:1-8)
38“Ryükejü gwenkho aphu ka khenyütsen tanyü chenme nyu kenyhun pe kerüshvubin gü ge rüshvuti. 39Tanyü nyu nme pe lonyü lo kechagü pe ngwün gü rüshvuti. 40Tanyü nyu kerigü tsü tho kegwa kilogram nme pe oliv ter liter nme kerhünlo. Lo vainzu liter nme ja shü tse pe rüshvuti. 41Ngwün gü tanyü nyu kenyhun gü pe rüshvuti, lo tho, oliv terzü lo vain zu lonyü keme pe rüshvuti. Hile ketyüketsü pe kerüshvu thyüpe aketsü, ale Npugü, tsü rün le akenyü. 42Ryükejü gwenkho aphu ka Phika gü khenpvü ka rope kerüshvu hi thyü hüti. Ale atemi teno-o anyugun nthon nrün bin le tsü. 43Ale tsüka atemi Israel nyu teno ti, lo ale kehü keben gü le bin tsü thyü nshün lati. 44Ale kerüshvu phika lo kershvubin thyü nshün lati, lo Aaron lo anyu dan khikho kecha thyüpe no püshükeda thyüo alothyüti. 45Ale Israel temi dan nyu yhunti lo anyugun Sunggigü thyüti. 46Anyugun le ale anyu Npugü Sunggigü Ijipt nyu anyugun zen chwikeryü gü tse shati, tson-o ano anyugun dan nyu yhunlo ti. Ale Npugü anyugun Sunggigü.
Currently Selected:
CHWEKETIN 29: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
