CHWEKETIN 31
31
Npugü Phika Gü Genyu Thathyü Keshanyu Temi
(Chw 35:30—36:1)
1Npugü le Mosa ka zoshü, 2“Ale Judah tsipwe ka, Hur nyugü Uri nyu Bezalel kejülo laso, 3lo ale akekvu pe a-kesü thyüshü la sele. Ale kensü, tedokegwa lo thatho lihi-e thyü lo kegwa-- 4suna, rakagi lo lazo sen-o a-dogwasa tse thathyü kezegwa lo kegwa rhikelo; 5tso minketsen rhen; sen dukesha lo thatho kezegwa kecha lihi-e thyü nrün pe a-tsü laso. 6Ale Dan tsipwe ka Ahisamak nyugü Oholiah ko no a-zen-o thathyü nrün genyu kejülo laso. Ale thyülo tse zokeshü lihi-e thyü nrün genyu tha thyülo kegwa khipe thathyü keshanyu aphu tsüshü laso: 7Ale kehü phika gü, kejozenkelo khinpha gü, lo tsü soge kebin shwikenjün bin lo phika günyu kanyü aphu, 8miz lo tsüka kanyü, suna ketsin pe kethyü makenben bin lo tsüka kanyü aphu, tharün kegwa rope kershvubin, 9rope kershvubin lo tsüka kanyü aphu khunda lo tsü kedunbin, 10Aaron lo anyudan le püshükeda tho kethyü ka kesen püshükeda phinya kezegwa dan, 11yün kehü terzü, kenshün bin gü genyu tharün kegwa. Hidan hi aphu kethyü ka, Ale nka johokeshü gwenzin tse thyüti.”
Sabbath, Kerüyü Jon
12Npugü le Mosa ka johoshü 13Israel temi dan ka zoshülo, “Akerüyü jon, Sabbath zenlo, tsüle ryükejü gwenkho aphu nyu Ale Npugü, ale hagun pe anpfü atemi thyülo tse kethyü ngun jaka zansü nme. 14Hagun le kerüyü jon gü zen mvuloshvu, tsü le nshün. Ligü higü tsü zen mvuo tsünyü thatho thyü yatselo no silati. 15Jon tsero ja katsü hagun tho thyülo, ai jon tsenyü gü we thyü kenshün pe atsü kela kerüyü jon. Ligü higü jon tsügü nyü tha lihi-e thyülo no silati. 16Kejozenkelo gü zansü Israel nyu temi le jon higü zenti. 17Tsüle ale lo Israel nyu jaka binzin kehü zansü nme, Ale Npugü, jon tsero jaka tsang lo kazü thyüshü, lo jon tsenyü gü nyu rüyü tinkela genyu.”
18Sinai kazüthun ge Sunggigü le Mosa nthon pen lao a-ben pe johokeshü dan thukelo tso pon kenyhun pe Mosa tsüshü.
Currently Selected:
CHWEKETIN 31: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
