CHWEKETIN 26
26
Npugü Le Kehü Phika Gü
(Chw 36:8-38)
1“A kehü phika kenshün gü tsü linen nikegwa pe kedo kenzi, kemeren, lo thyühü kenhon pe kedo tseryü pe thyüti. Lo cherubim men zü kegwa thyüpe a-ge shüti. 2Kethon lo keda ketun küti, kethon le tsu nkio tetse lo keda le tsuzi. 3Pvün rikesü pe nme thyü lo kecha pvün rikesü pe nme thyü tse ti. 4Phi kenzi pe a-so kipon a-te ge ju kesülo kegwa thyü pe kerigü lo kenyhun gü ge-e shülo. 5Ju kesülo kegwa gü tsü henpvün thyüpe kerigü geshü lo tsü kendyü to henpvün thyü pe kecha gü ge ko shülo. 6Phi kenyhun tsü hükesü pe nme thyü nrün genyu nle suna pe hükesü henpvün thyülo.
7“Phika gü so hen nrün genyu tenyü hü pe kedo phi tseryü nme thyülo. 8Aphu thyüpe ketun külo, kethon tsu shenryü lo keda tsu zi. 9Pvün rikesü pe nme thyü lo kecha tsero rikesü pe nme thyülo. Tson-o tsero rikesü kethyü gü kese kenyhun thyüpe phika gü kamhun kipon a-soge shülo. 10Ju kesülo kegwa henpvün thyü pe nme gü a-tezin shü, lo ju kesülo kegwa henpvün thyü pe kecha gü ge shülo. 11Lazo pe hükesü henpvün thyülo-o pe phi kenyhun ge ju kesü lo kegwa nyu shü lo njüo sükerhün pe nme thyülo. 12Kerche ponha tsü pe phika gü sizin hüsü shü. 13Lo lizin hizin kethon tsu nmeme rüche kebin tsü no phika gü te kepen hen lo.
14“Tegwen zin hen nrün genyu, tanyü gi rün nhon kela nme lo thyügikegwa kecha nme tse thyü sinlo.
15“Akakia sen pe phika gü genyu a-run kendun nme thyülo. 16A-run nmeme le kethon tsu tseryü lo keda tsu meo peha ti, 17a-run dan pe keren nme thyülo nrün genyu kendyüto kethyü a-to phahvu no binlo. A-run aphu ka a-pha hihontse kethyü no binti. 18Tesinzin genyu a-run nki thyülo 19lo rakagi pe a-pha ketun henzi thyülo-o ketun kenyhun pe a-run nme hensin shüo a-pha hvu no a-ge rhunti. 20Phika gü tesozin genyu a-run nki thyülo 21lo a-run nme hensin ketun kenyhun no bin nrün genyu rakagi pe ketun henzi thyülo. 22Phika gü sizin nkhün kipon a-run tsero, 23lo a-qün hvu genyu a-run kenyhun thyü lo. 24A-qün ka a-run hvu le a-phazin kehüsü lo senkesü kü gü a-ra titi. 25Tson-o a-run tetse tsü nme hensin a-pha kenyhun lo rakagi pe kethyü ketun tseryüo tsero no bin ti.
26“Akakia sen pe a-run pehazin genyu pvün pvün tseo phika gü kapha genyu tseryü pvün thyülo, 27kechazin a-run dan genyu pvün, lo a-sikipon nkhünzin genyu pvün. 28Alvu nyu kenpere gü no a-run neketunkü ka keshü gü tsü a-mün le phika gü nmezin gü kechazin titi. 29Suna pe a-run dan jeh la, lo kenpere dan ka nna nrün genyu suna raho pe shü, kenpere suna pe jeh ti. 30Ale kazüthun gü ge rhipe nhikeshü hontse phika gü thyülo.
31“Linen phi kegwa, kenzi, kemeren, lo kenhon no kedo pe kesunphi thyülo. Tsüge cherubim men zü pe shülo. 32Tson-o pe akakia sen suna pe jeh la-o kehüsü pe shü la-o rakagi pe kethyü phaketun pezi ge dun kebin kachon ge sen shülo. 33Kesunphi gü pe hükesü ge düsen la, tson-o tso ponhvu pe shü kenjü kejozenkelo khinpha gü pe kesunphi sizin shülo. Kesunphi gü le kenshün bin lo kenshün tsin bin hvu sathü kecha thyü lati. 34Shwikenjün bin gü pe kejozenkelo khinpha so ge shülo. 35Kenshüntsin Bin tegwenzin phika gü teso kipon miz gü pe shülo tesin kipon makenben bin pe shülo.
36“Phika günyu keyü khünpfü genyu linen kegwa kenzi, kemeren, lo kenhon pe do-o a-ge a-jvüzü kethyü pe kesunphi thyüti. 37Kesunphi higü genyu akakia sen pe kachon pvün thyüo suna pe jeh, lo suna pe kehüsü thyülo; kachon hidan genyu lazo pe ketun pvün thyülo.
Currently Selected:
CHWEKETIN 26: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
