CHWEKETIN 25
25
Phika Kenshün Gü Genyu Thahokeshü
(Chw 35:4-9)
1Npugü le Mosa ka zoshü, 2“Israel nyu no tha hope atsü shülo tse zoshülo. Temi lihigü anyun nyüo hoshü lo lihi-e khilo. 3Hoshü nrün le hidan: suna, rakagi lo lazo; 4linen phikegwa; thyühü phi kenzi, kemeren lo kenhon; tenyühü pe kedo phi; 5Tanyü gi rün nhon kela, thyügi kegwa; akakia sen; 6makhin genyu terzü; 7karnelians lo tsominketsen kecha püshü kengun gü shüntyü ka shü nrün dan. 8Ano a-nyugun dan nyu yhun nrün genyu temi dan no agenyu phika kenshün nme thyü shü mvuloshvu. 9ale tsinpe nhi keshü hontse kerüshvu phika gü lo tsünyu kanyü dan aphu thyülo.
Kejozenkelo Khinpha
(Chw 37:1-9)
10Akakia sen pe Khinpha nme thyülo, kethon tsuhvuo peha, a-kedano tsu meo peha lo ketetso tsu meo peha. 11Suna ketsin pe a-nyuzin lo a-sozin-e jeh la lo suna pe a-tekho thyüpe hun kenthün shü. 12Suna pe raho pezi thyülo-o pe phazi dan ka senkesü shü, peha zin kenyhunyhun pe shüo. 13Akakia sen pe kepenvü thyülo-o suna pe jeh la 14tson-o pe khinpha gü lizin hizin raho nyutsü nnala. 15Kepenvü tsüpe rahonyu shü la-o tsü thoni nya. 16Tson-o ale khishü nrün johokeshü dan pe a-ge thu kenjü tsohvu tsüpe khinpha günyu shülo.
17“Suna ketsin pe shwikenjün bin nme thyülo, kethon tsu hvuo peha, a-keda tsu meo peha. 18Kejonvü pe suna jonpe Cherub kenyhun thyülo, 19A-te pehazin nme lo kechazin nme tselo. Shwikenjün bin au thyükesü pe nme thyülo. 20Cherub hvu no au mhun pe kentsun-o au sekin sükhun pe shwikenjün bin gü hen ti. 21Tso ponhvu tsüpe khinpha gü nyu shüo, a-kesen shwikenjün bin gü tsüpe a-soge shülo. 22Ale tsüka n teno ti, tson-o cherub hvu jaka shwikenjün bin ge ale Israel temi genyu a tejvü aphu khipe ntsu shüti.
Tensü Pe Sunggigü Rüshvu Kehü Miz
(Chw 37:10-16)
23“Akakia sen pe miz nme thyülo; kethon tsu hvu, a-keda tsu me lo ketetso tsu meo peha. 24Suna ketsin pe jeh la, lo suna pe tekho thyüpe hunla. 25A-tekesun benje kho thyüpe hunlo lo suna pe a-tekesun tsü tekho pe hunlalo. 26Lo tsü genyu suna pe raho pezi thyülo-o pe quenzi dan ka a-pha ge senkesü lo. 27Raho dan tsüno a-tekesun gü khoka binti ke penvü hvu pe tsünyu nna-o miz gü pen nrün genyu. 28Akakia sen pe kepenvü thyü lo-o suna pe jehla. 29Vainzu pe kerüshvu thyü nrün genyu khun, honpen, nja, lo rünkegwa kerokhun dan thyülo. Hidan hi aphu suna ketsin pe thyülo mvuloshvu. 30Miz gü pe kejozenkelo khinpha gü mhundyü ka shüti lo a-zin tse miz gü ge a ketsü tensü kenshün gü no bin ti.
Makenben Bin
(Chw 37:17-24)
31“Suna ketsin pe makenben bin nme thyülo. Kejonvü lo suna jon pe a-thin lo ketejen bin thyülo; thyükezegwa kethyü nyekepun, a-kesun lo kengen sin-o thyü kesü nme thyülo. 32A-teki a-ro tsero no binti, nmezin kenshen lo kechazin kenshen tse. 33A-ro tsero dan nme me ge almond le sen, nngen lo pun kebin hontse nyekepun thyükezegwa kethyü kenshen shen no bin ti. 34Makenben bin ketejen bin no almond le sen, nngen-o pun kebin hontse nyekepun thyükezegwa kethyü pezi no binti. 35A-ro kenshen dan hensin nyu a-kesen nmeme no binti. 36A-kesen, a-ro makenben bin tse kesin kejonvü no jon kethyü suna thün me pe thyüti. 37Makenben bin gü genyu makhin tsenyü thyülo-o no mhundyü zin ben nrün genyu khi so shülo. 38Suna ketsin pe ketsevü lo khun dan thyülo. 39Suna ketsin kilogram shenryü pvün pe makenben bin lo tha kanyü hidan aphu thyülo. 40Nyuyhün-o ale kazüthun gü ge rhipe nhishü kela hontse thyülo.
Currently Selected:
CHWEKETIN 25: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
