CHWEKETIN 27
27
Kershvubin Gü
(Chw 38:1-7)
1“Akakia sen pe kershvubin nme thyülo. Tsüle kethon keda ketun kü ti, kethon tsu pvün keda tsu pvün, lo ketetso tsu shen. 2Qünzi tsü a-tse no bin ti. Tsüno kershvubin gü kesü nme thyüti lo apentha lazo pe jeh küla. 3Jonbü keshü khun, kekinvü, khun, kehüsü lo magi kekinkhun thyülo. Kanyü hidan aphu lazo pe thyülo. 4Lazo pe raho thyülo-o khipen nrün lazo raho pezi pe tsü qün dan ka shülo. 5Rahü tsü pe kershvubin te hensin shülo no kershvubin gü a-lvu tilo nrün genyu. 6Akakia sen pe kepenvü thyülo-o lazo pe jeh la, 7tson-o pen nrün ka pe kershvubin te lizin hizin raho nyu tsü nnalo. 8Ale kazüthun gü ge tsin pe nhikeshü hontse senpon pe kershvubin gü thyülo, lo kegü lo.
Npugü le Kehü Phika Gü Kamhun
(Chw 38:9-20)
9“Ale kehü phika gü kamhun linen phikegwa pe kesunphi thyü ti. Tesinzin kesunphi gü no tsu tsime ti, 10kachon nki lo a-ketun nki le lazo pe thyü ai kehüsü lo ketsevü dan le rakagi pe thyüti. 11Kamhun tesozin ko tsü keme tse thyüti. 12Lo nkhünzin le kesunphi tsu henpvün pe kachon tseryü lo a-ketun tseryü sin-o sen ti. 13Nphozin khenpvü kebin kipon le kamhun le tsu henpvün ti. 14-15Khenpvü lizin hizin kesunphi tsu tseryüpvün, lo kachon kenshen lo ketun kenshen tseti. 16Khenpvü kesunphi le linen phikegwa kenzi, kemeren, lo thyühü kenhon pe do-o a-ge thamen zü kezegwa kethyü tsu nki pe thyü nrün genyu. Kachon pezi lo ketun pezi ge tsüpe sunti. 17Kamhun kehun aphu rakagi pe kethyü ketseyi lo kehüsü dan pe lazo ketun ge shü tseo senkesü küti. 18Kamhun kehun no kethon tsu tsi, keda tsu henpvü lo ketetso tsu pvün tseti. Kesunphi le linen kegwa lo ketun le lazo. 19Phika gü nyu kesen kanyü lo kamhun nyu kesen ketseyi aphu lazo pe thyü küti.
Makenben gü kenucha
(Lev 24:1-4)
20“Makenben gü no nben zin bin nrün genyu Israel nyu no oliv terzü kegwatsin senryü lo tse zoshü. 21Aaron lo a-nyu dan le ale bin kehü phika gü tegwezin kejozenkelo khinpha gü mhundyü nyu makenben khin gü pe shüo tsünyu amhundyü ka ngwün ki gü lonyü keti tsü no nben binti. Johokeshü higü hi Israel nyu lo tsipwen no kethonthen then hüti.
Currently Selected:
CHWEKETIN 27: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
