CHWEKETIN 24

Kejozenkelo Gü Mohor Vüla

1Npugü le Mosa ka zoshü, “Nle, Aaron, Nadab, Abihu, lo Israel nyu sharhi hentsenyü dan zen tse kazüthun gü ge aki ryülo; lo nithen ki hüketse ka nyu nkhün rüshvulo. 2N nti ame kechanyu nme no akho nniryü nya. Temi dan no kazüthun gü ge-e ryünya.”

3Mosa le gü temi aphu ka Npugü le johokeshü lo tejvü khi keshü dan aphu zoshü, tsontsin temi dan aphu kengüo, “Npugü le zokeshü aphu agun le thyüti.” 4Mosa le Npugü le johokeshü aphu thulo. Lonyü nshwe ka a-le kazüthun gü phaka kershvubin nme khwenlo njüo tso tseryü kenyhun pe sen shü, Israel tsipwe tseryü kenyhun sunka. 5Tson-o a-le selo nishüo no kerüshvu hon rope Npugü kishü lo methu peha pe kepfüshe kerüshvu thyü shü. 6Mosa le nyukhu dan zi ponha pe khunnyu shülo; lo a-sen ponha tsü a-le shwe pe kershvubin ge shüla. 7Tsüselo a-le Npugü le johokeshü pe thu kenjü kejozenkelo lesü gü khilo-o swü tetso pe temi dan hishü. Lo anyugun le, “Agun le Npugü jozenti lo a-le agun ka zokeshü aphu thyüti,” tsonshü.

8Mosa le khun günyu tezi gü khilo-o kezen pe temi dan ge shü. A-le zo-o, “Hile Npugü le johokeshü hidan hi aphu khikeshü ka a-le hagun zen-o kejozenkelo tezi gü le.”

9Mosa, Aaron, Nadab, Abihu lo Israel nyu sharhi hentsenyü dan le kazüthun gü ge kü; 10lo anyugun le Israel Sunggigü hyu. A-pha hensin le shwipe Safir tso pe la kenjü hontse, tsüle nzi pe tsang hontse. 11Sunggigü le Israel nyu sharhi hidan hi nthyünnyü lamvu; anyugun le Sunggigü hyu la-o kengüo tyütsü.

Mosa le Sinai Kazüthun Ge Kekü

12Npugü le Mosa ka, “Kazüthun ge aki küryülo, lo nle hika kehü ka ale temi dan senthyü nrün genyu tejvü aphu thu kenjü tso ponhvu pe ntsüti,” tson zoshü. 13Mosa lo a-keche gü Joshua au le ndolo-o Mosa le kazüthun kenshün gü ge kü. 14Mosa le sharhinyu juka, “Ahi le raniryü kemvuthen kensenbin hika khwen binlo. Aaron lo Hur au le hagun zen hü nyo. Lihigü kevü keben le bin lo au ki gülo.”

15Mosa le Sinai kazüthun ge külo, lo nmhule tsü jeh pfü lola. 16-17Npugü le kehü keben gü tsüle kazüthun gü ge tsü ryüla. Israel nyu le keben gütsü shwipe kazüthun gü raki mah le nnyü kebin hontse. Nmhu gü le jon tsero kazüthun gü jeh pfü tseo jon tsenyü gü ka Npugü le nmhu nyu Mosa koshü. 18Mosa le kazüthun gü ge nmhu gü nyu yüla. A-le tsünyu keben jon henzi lo kezün jon henzi bin tinla.

Currently Selected:

CHWEKETIN 24: REGSBSI

Highlight

Copy

Compare