CHWEKETIN 23
23
Kenjü Lo Ketun
1“Kenku jo zokela nya, lo serikemvu nyu cheo kenku jün zo nya. 2Nle temi kechon gü le a-zükemvu thyü bin nmvue kenjü gü bokekhün bin yatselo then nya. 3Kendinyu nme jünkera kethyü ka a-no pen kecha thyü lanya.
4“Nkenrhinyu methu nmvue gada le nmhon tinjüo hyu lolo zenryü a-tsüshülo. 5A-gada le a-khvu no a-mipfü nto kebin hyulo nrhi tin lanya-o keche pe no rhun solo mvuloshvu.
6“Kendinyu nme jokera ka a-kenjü yünhen lanya. 7Nkuo me nkhin nya, lo kemukendi nyu dushvu lanya, kechamvule lihigü serikemvu tsühontse thyü kehü nyu ale nmu ti. 8Nle jvü jwe lonya, jvü jwe le temi yhütyü thyüpho pe nyule njü yo hyumvuo kemukendi nyu no nkela kehü genyu.
9“Tesin nshwenya; tesin le dihontse rüchün hüyo hagun le shabin nyo; hagun ko Ijipt ki tesin thyüryü.
Chen Tsenyügü Lo Jon Tsenyügü
10“Chen tsero genyu hagun low nyu ntsishü lo nyu nsha loyo tsü kequen lo. 11Ai chen tsenyügü ka we tsü no rüyülo, tsü nyu lihi le yhun bin-e lünya. Kendinyu no tyü lo a-sen tehen thyü no tyülo. Hagun vain low lo oliv chwie no tsühon tseti. 12“Hagun le jon tsero thathyülo ai jontsenyü günyu we tha thyü nya, tson-o hagun-e, tesin hagun thothyü kebin dan-e lo nyukhu dan-e no rüyülo.
13“Ale hagun ka zokeshü aphu rüchünlo. Tero kecha nme ka-e kehi thyü nya; nmün nyu anyugun zan-e zo nya.
Nga Keda Keshen Dan
(Chw 34:18-26; Tej 16:1-17)
14“Chenme ka gwenshen ge Nga pe arühvu ti. 15Hagun le Ijipt nken chwiryü kelo shye gü, Abib shye ge tsü ale hagun ka zo keshü then-o kebu no shükemvu tensü ketyü nga ti. Nga higü gwenkho ka jon tsenyü tensü lihi-e kebu no keshü tsü tyü nya. Thame senmvutse kenben ryüo arüshvu nya.
16“Hagun logvü solo, logvü nga ti.
“Lo kenda ki hagun vain lo hagun rasha kecha dan kequen lolo ntsen kequen kelo nga ti. 17Chenkechwi nga kenshen dan ka hi hagun pechenyu aphu ryüo Npugü hagun Sunggigü rüshvu ti.
18“Hagun le senru pe akerüshvu ka kebu no keshü tensü pe rüshvu nya. Nga hidan ka senru pe a kerüshvu dan a-keshvu no bin-o tsangnben nya.
19“Chenme ka hagun shye gvülo keri sen-o Npugü hagun Sunggigü kanyu ryülo.
“Tanyü nmvue tenyü nyu thyü pe a-tsü nyüzü ka ni nya.
Zoshwikeshü Lo Senthyükeshü
20“Ale tsangge lilonyu nme nipe hagun mhundyü shüo no hagun kenjwen nyu hagun ntsen zenryü ale ndokenjü bin günyu shüshü ti. 21A-khwenyü lo a-jo zen lo. Ale a-ni keshü genyu a-jo zenmvu lanya, a-le me jozen kemvu nyu kemu jüshü loho. 22Ai hagun le a-jozen lo ale johokeshü lihi-e thyü hü yatselo, ale hagun rinyu aphu zen kega ti. 23A lilo güle hagun mhundyü rio hagun zengü Amornyu, Hitnyu, Periznyu, Kanannyu, Hivtnyu lo Jebusnyu kazü nyu shüshüti lo ale anyugun nke lati. 24Nle anyu terodan mhundyünyu nkhüntsü nmvue rüshvu nya, anyugun tho hontse nya. Anyugun teromen dan nkela lo anyu kenshün tso kesen dan bosebore lalo. 25Hagun le Npugü hagun Sunggigü arüshvu hü yatselo, Ale hagun ketyü-ketsü pe hagun tsüti, lo hagun keho kenyü aphu sentin lati. 26Hagun kazü nyu tenunyu nme-e no a-nyu nrhila nmvue nyuzenkemvu thyü loho. Ale yhun kethon pe hagun tsüti.
27“Ale nntsun kehünyu thyü pe no a nshvu ti; Ale kevükeben kethyü senryü nle zen kega kehü nyu ge shüti, lo nshwikerüchün nyu aphu nshvuo rani lati. 28Ale nshwikerüchün nyu shwe pe kenshvu nyu shü lati; ale hagun mhundyü Hivtnyu, Kanannyu, lo Hitnyu hü lati. 29Ale Chenme jaka anyugun hüla loho, tsonyatselo kazü güle nrun la-o tehen thyüle chonrio hagun ntsun lo keshvu genyu.
30Hagun le temi chon chwiryüo kazü gü lolo kemvu then ale a-shvushvu thyüo anyugun hü lati. 31Ale hagun kazü terhi thyü kethün pe Akaba Gulf ka gü Mediterranean zida keti lo tehenyhunkemvu gü ka gü Eufrates züri keti thyü shüti. Ale kazü tsü so ge yhun kebin dan so kekvu pe hagun tsüti, tson-o hagun le kethün chwio anyugun hü lati. 32Hagun le anyugun lo anyu tero dan zen-o thame kejozen nya. 33Temi tsüdan no hagun kazü nyu yhun nya; tsontselo anyugun le hagun thyüpe amhundyü ka mu lati. Hagun le a-nyu tero dan rüshvu lo tsüle hagun min la nrün sen genyu.”
Currently Selected:
CHWEKETIN 23: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
