CHWEKETIN 20
20
Tejvü Kontseryü
(Tej 5:1-21)
1Sunggigü le zoshü, lo hidan hile a-jo: 2“Ale Npugü N Sunggigü, Ijipt ki nle medo thyü kebin nyu nzen chwi keryü güle.
3“Anyeki tero kecha rüshvu nya.
4“Nle ngenyu tsangge nmvue kazünyu nmvue kazü hensin zü nyu kehü lihi men zünya. 5Nkhün tsügü teromen kelu nmvue rüshvu nya, Ale Npugü n Sunggigü genyu lo Ale akentsun tsü nyhebin kemvui. Ale shaja senryü senyu nyu le a ntsü hüyo a-tsipwen phushen phuzi ki-e shü hü. 6Ai ale keso pe aso lo a-jvü thyüzen kehü nyu phu yieyie ge tsinshü hünyo.
7“Nle kenrun ka Npugü n Sunggigü zan senya, Npugü le kenrun ka a-zan sen kehünyu shaja pe tsüti.
8“Sabbath jon thenlo lo tsüzen kenshün thyülo. 9Nle ntha thyülo nrün jon tsero le bin nyo, 10ai jon tsenyü gü tsüle thyükenshün pe aketsü kerüyü jon. Tsünyü temi nme thame thyü nya- nle, nnyu, ngo, nsenru nmvue nrünyi nyu kebin tesin-e no thathyü nya. 11Kechamvule Ale Npugü, ale jon tsero jaka, kazü, tsang, Züda, lo tsünyu kebin aphu thyüshü, ai jon tsenyü gü nyü ale rüyü kelo genyu. Tsügenyu Ale jochü pe Sabbath ge shüo tsü thyü kenshün laso.
12“Nle npvü lo Njvü rühvulo, ale pe nketsü kazü günyu nle yhunthonlo nrün genyu.
13“Nle me dushvu nya.
14“Nle keyüla nya.
15“Nle rühu nya.
16“Nle nkuo temi nme nmu nya.
17“Nle meka tepen nya; a-nu tepen nya, a-go, a-thu, a-gada nmvue a-hon lihi-e tepen nya.”
Temi dan Le Nshvu Kela
(Tej 5:22-33)
18Temi dan le tsangkesen lo shu kekhun khwenyülo, lo tsang kekechwü lo kazüthun gü le khu kebin hyushüo nshvu pe a-kensüo nithen ki sobin. 19Anyugun le Mosa ka, “Nle agun ka zolo, agun le nyüti; ai Sunggigü le agun nthon lo agun le sikela nshvu le.”
20Tsontsin Mosa le, “Nshvunya; Sunggigü le hagun no a-nshvu lo a-jothyüzen-o mula mvu nrün genyu hagun kegwa keshvu shwi keryü ntile.” 21Ai temi dan le nithen ki sobin lo Mosa le a-npfü Sunggigü le kehü nmhu kezün khoka güla.
Kershvubin Rüla Tejvü
22Npugü le Mosa no Israel nyu ka zoshü lotse johoshü: Ale Npugü, ale tsangge hagun zen kenthon kethyü hagun le hyu laso. 23Hagun le rakagi nmvue suna pe hagun npfü teromen thyülo njüo pe asin-o rüshvu nya. 24Agenyu nnyo pe kershvubin nme thyülo njüo tsüge ntanyü lo nthu rope kerüshvu lo kepfüshe kerüshvu thyülo. Lihika-e hagun no arüshvu lotse ale khikho kecha thyü keshü bin ka; lo ale ryüo jochü pe hagun tsüti. 25Lo hagun le tso pe agenyu kershvubin khwenya tselo keyhen tso pe thyü nya, hagun le keyhen vü pe yhen kethyü ka hagun kenyü le tsogü nrhukela genyu. 26Agenyu kershvubin nme khweo phalvu khwen künya, tson yatselo nle tsüge kekü ka nkenben hyu lati.
Currently Selected:
CHWEKETIN 20: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
