CHWEKETIN 19
19
Israel Nyu Le Sinai Kazüthun Ka Keryü
1-2Israel nyu le Ijipt nyu chwikeryü shyeshen gü jon kerinyü Refidim kheo Sinai tehen gü nyu ryüo, Sinai kazüthun phaka anyugun kensenbin thyülo, 3tson-o Mosa le Sunggigü teno titseo kazüthun gü ge küla.
Kazüthun gü ge Npugü le a-ko shüo a-no Israel nyu, Jakob tsipwen dan ka zoshü lo tseshü: 4“Ale Npugü, Ijipt nyu ge nyu thyü shüyo, lo ale logi le a-sekin ge a-nyupfü kehü hontse hagun zenryü hiki aki shü loyo hagun le hyu laso. 5Tsügenyu hagun le ajonyü, lo azen kejozen kelo thyüzen hü yatselo hagun le atemi thyüti. Kazü apentha ahon, ai hagun le ale kejü kelo temi thyüti, 6thyükenshün pe a npfü aketsü thyüo püshü kedanyu thyü alothyü hüti.”
7Tson-o Mosa le tsenryüo temi dan sharhinyu ko kequen shüo Npugü le a-ka johokeshü dan aphu pe anyugun ka zoshü. 8Tsü selo temi dan le aphu kengüo, “Agun le Npugü le zokeshü aphu thyüti tsonshü,” lo Mosa le tsüpe Npugü ka zoshü.
9Npugü le Mosa ka, “Nthu gerho temi dan no ale nzen kenthon kebin khwenyüo ntenyen lo nrün genyu ale nmhu kezün nme ge nki ryüti.”
Mosa le temi dan jo pe Npugü ka zoshü, 10lo Npugü le Mosa ka, “Temi dan ki gü anyugun no rüshvu nrün genyu nthu lo sendu anyugun thyü kenshün lolo tse zoshülo. Anyu no anyugun phinya thula mvuloshvu, 11tson-o haduki genyu ndalo. Tsünyü temi aphu kehyu ka ale Sinai kazüthun ge tsenryüti. 12Temi dan no nken gü mvu nrün genyu terhi nme thyüpe kazüthun gü hunla, lo anyugun no kazüthun gü ge kü nmvue tsü kho nni nyalo tse zo shülo. Lihigü a-pha pe tsü kedyü kethyü gü no si lati; 13temi nme no a-kesü nyao tso pe jon nmvue levü pe shwe shvula mvuloshvu. Temi-e lo nyukhue tsühontse boshvu la mvuloshvu. Shu gü khun shülo temi dan no kazüthun gü ge küryüti.”
14Tson-o Mosa le kazüthun güge tsenryüo temi dan no rüshvu nrün genyu ndalo lotse zoshü. Tsügenyu anyu le phinya thula, 15lo Mosa le anyugun ka, “Hadu ki genyu nda binlo lo tenunyu kho nni günya.”
16Jonshen nyü lonyü gü tsangsen, tsangpera thyü nmhukezün nme le kazüthun gü henlo la lo shukhun tetsosa kethyü khwen nme nyülo. Tsontsin kensenbinnyu kebinnyu aphu nshvuo a-kensü sola. 17Tson-o Sunggigü teno titse Mosa le kensenbin nyu temi dan zenchwiryüo, kazüthun gü phaka solo. 18Lo Sinai kazüthun apentha mah kekhu le jeh pfülo la, Npugü le mah nyu tsüge tsangkeryü genyu. Mami kekhu hontse mah le khukü sola lo temi aphu a-kensü sa lola. 19Shu kekhun khwe gü le tetso ketsintsin tse so laryü Mosa le jo zoshü lo Sunggigü le tsangkesen nyu a-jo kenishü. 20Npugü le Sinai kazüthun ra ge tsüryüo Mosa no kazüthun ra ge küryü lotse koshü. Tson-o Mosa le küla. 21Npugü le a-ka, “Tsen gü temi dan no terhi nkenryü a-nrimvu nrün genyu petsü lolo tse zoshülo; anyugun le tson yatselo anyugun kechon le si lati. 22Püshükeda dan akho nniryü kehü dan-e no anyu npfü anyuthyü kenshün la kemvu we ale shaja pe anyugun tsüti.”
23Mosa le Npugü ka, “Temi dan le küryü lo kemvui, nle agun no kazüthun gü le nshün letseo terhi thyüpe hun kela genyu.”
24Tsontsin Npugü le, “Tsengü Aaron zen lo-o küryülo. Ai Püshükeda dan lo temi dan no terhi nken-o aki ryünya ryüya tselo ale shaja pe anyugun tsüti.” 25Tson-o Mosa le tsengü Npugü le nyuzo shüyo pe temi dan ka zoshü.
Currently Selected:
CHWEKETIN 19: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
