CHWEKETIN 21
21
Do Genyu Tejvü
(Tej 15:12-18)
1“Tejvü hidan pe Israel nyu tsü shülo: 2Nle Ibrinyu do nme hei loyatselo a-le chen tsero ngo thyüti. Chen tsenyü gü ka a-mi thame lomvu tse a-hoshü lati. 3A-le a npfü ryüya tselo a npfü tinti; lo a-le tenu lozenryü yatselo a-nu zen-o tinti. 4A-npugü le a-nu lope a-tsüo anyu peche nmvue tenu nnyu pe a-tsülo, a-nu lo a-nyenyu dan le a-npugü hon thyüti, lo a-le a-npfü chwiti. 5Ai do güle ale a npugü, a-nu lo anyenyu dan so hü nle, ale do hinyu chwimvu le, 6tsonyatselo a-npugü le a-zen-o kerüshvubin gü ki ryüti. Tsüka a-no kakhin nmvue kincha kachon ka so lo-o a-npugü le a-yhütin bünphe lati. Tson-o a-le a-yhunthen a-go thyüti.
7“Temi nme le a-nyugi jwe pe dothyü layatselo pechenyu do hontse tsügi hoshü la loho. 8Temi peha le tsügi pe a-nu thyü titse hei lo-o a-kenyümvu yatselo, tsügi khinipe a-pfü ka jwe niti; a-npugü le a-khipe tesin ki jwe lo nrün ndi, a-le tsügi ge a-zümvu kela genyu. 9Temi nme le a-nyu gü tsü nrün genyu tenunyu do heilo yatselo pe a-npfü a-nyugi hontse ti. 10Temi nme le tenu kecha nme losin yatselo, a-nu kerigü ge himhundyü hontse ketyü-ketsü, phinya lo a-kenjü tsüno bin mvuloshvu. 11A-le tsügi ge tha hidan hi thyüshü mvuyatselo, tsügi no thame pe a-tha mvutse a-le tsügi hoshü la mvuloshvu.
Tejvü Gwenkerho Genyu Tejvü
12“Ligü higü mevü shüo no sila yatselo a-ko no siti. 13Ai tsüle shwenron thyümvu le thyüzü kela nme yatselo, a-no tin-o chwilo nrün genyu ale bin nme kejü pe ntsüti. 14Ai temi nme le anyunta kelo ka shwenron thyüo temi kechanyu boshvu laya tselo, a-le a-kenilo titseo akershvubin ka tin gü la-e a-no siti.
15“Lihigü a-pvü a-jvü kevü nyu no siti.
16“Lihigü temi rühu yatselo jwe la-e lo a-ben nyu bin-e no siti.
17“Lihigü shochün pe a-pvü a-jvü ketsü gü no siti.
18“Kega-o temi nme le tso pe nme jon nmvue jenthün pe jen ai boshvu la mvu yatselo shaja pe a-tsünya. Mele vükela gü tsüle a-zhüka zhütseo, 19kenkhin ki solo-o thün sen ndalo lo, a-vü keshü gü no a-jon kegwenchün thyü lo a-le gwalo kemvuthen anucha ti.
20“Temi nme le thün pe a-go peche nmvue tenu vüo a-bin ka sila yatselo, temi tsügü le shaja hyu loti. 21Ai do güle khenyü me jonhvu jaka simvu yatselo shaja pe a-npugü tsü loho. A-hon nkekela tsüle a-shaja kela genyu.
22“Peha le kega bin-o nyuphou kepfünyu nme jün la-o no a-nyu nrhila, ai kejünkeja kecha we thyümvu yatselo, a-jün kela gü no tenugi nyepvü le lihi zoshüo jün keranyu le pen keshü gü pe thoti. 23Ai tenugi ge keshvu le ryüla yatselo, shaja gü le temi phou sun temi phou, 24pha sun pha, 25kero sun kero, tejün sun tejün, kevü sun kevü no binti.
26“Temi nme le a-go peche nmvue tenu vüo a-yhütyü gwamvu layatselo, yhütyü gü genyu a-hoshü lati. 27A-le a-go gü nmvue go gi hü nme boryü layatselo hü tsügü genyu a-hoshü lati.
Npunyu Le Thyümvu Lo Keshvu
28“Methu tse nme le me senshvu layatselo, tso pe jonshvu lati, lo a-thyü tyü loho; ai shaja we pe a-npunyu tsü loho. 29Methu tse güle mesen kehü tsüpe a-npunyu tesha la; ai ntsenlo mvuo no me senshvu layatselo, tsope tsü jonshvu lati, lo methu tsü npugü kono siti. 30Tson-e keshanyulaka methu npugü no a-phou sun tholo tse yatselo dikho hiyo tsüpe thoti. 31Methu tse güle ntsenyu peche nmvue tenu senshvu-e a-jvu le kemeti. 32Methu tse güle do peche nmvue tenu-e senshvu layatselo a-npugü no raka shenryü pe do npunyu tsüti lo tso pe methu tse gü jonshvu lati.
33“Temi nme le chwen nme sühvu; nmvue tso shüo methu tse nmvue gada nme le tsünyu che lalo, 34a-le tsügü mi thoti. A-le pisa pe nyukhu npugü tsü lao a-kesi gü khilo ti. 35Temi nme thutse le kechanyu thutse senshvu lalo, au le a-kerhün gü jwe kenjün ti, lo kesi gü thyü ko kenjün ti. 36Ai a-npunyu le methu tse gü le mesen kehü shabin-e ntsenlomvu layatselo a-le methu tse gü sun methu tse pe kethun ti, ai a-le nyukhu kesi gü khiloti.
Currently Selected:
CHWEKETIN 21: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
