CHWEKETIN 18
18
Jethro Le Mosa Ki Keryü
1Midia nyu Püshükedagü Jethro, Mosa a-migü le Sunggigü le Ijipt nyu Israel nyu zenchwi keryü ka Mosa lo Israel nyu genyu thyükeshü rüla aphu nyülo. 2Tsügenyu a-le Mosa le a-nu Zipporah nipe kaki shükela gü zen-o Mosa ki ryü, 3lo anyu Gershom lo Eliezer au kotse. (Mosa le, “Ale sinrünyi ki tesin thyühü nle,” tson-o a-nyu nme zan pe Gershom tholo. 4A-le zonio, “A-pvübon nyu Sunggigü le Ijipt nyu raja gü le adushvu lalo kegwanyu akecheshü lo akenishüle,” tson-o a-nyu kechagü zan pe Eliezer tholo.) 5Jethro le Mosa nu lo a-nyu hvu zen-o tehen nyu Mosa le kazüthun kenshün gü ka nsen kebin ka ryü. 6A-le anyugun le ryüjü nle tse jo sinpe Mosa tsüshü. 7Tsü genyu Mosa le a-teno titse chwigü a-kelu-o a-nboshü. Tson-o anyugun le khinyunyu rüla ketso shüo Mosa phikanyu yüla. 8Mosa le Jethro ka Npugü le Israel nyu kenilo nrün genyu Ijipt nyu raja gü lo a-temi dan ge thyükeshü aphu joshü. Lo a-le temi dan le tsonnenyu thakerü teno kelo ka dihontse Npugü le anyugun kenishü yo tsü rüla ko zoshü. 9Jethro le hi aphu nyülo njüo a-sherhün-o, 10“Ijipt nyu temi lo raja gü bennyu hagun kenikeshü gü Npugü shwe! Donyu a-temi dan kenikeshü gü Npugü shwe! 11Ntsoka we ale Npugü le tero aphu nyeki gonkvu tse kethyü sha laso, Ijipt nyu le Israel nyu süjünmvu kebin ka a-le hihontse thyü keshü genyu.” 12Tson-o Jethro le apentha rope kerüshvu nme lo kerüshvu kecha-e thyüpe Sunggigü kishü; Aaron lo Israel nyu sharhinyu aphu a-zen gü kerüshvu tho thyüo kenshün chvu tsü tyü.
Kerathünyu Kejü Kelo
(Tej 1:9-18)
13Tsüsinyü Mosa le dun-o temi dan le kenya kebin jünkera, lo a-le lonyü gü kheje ki keti rabin. 14Jethro le Mosa le temi dan genyu tha aphu thyü kebin hyushüo Mosa ka, “Nyuthyüo nle temi dan genyu hi aphu thyü bin nla? Nle nyuthyüo nnpfü aphu thyüo temi no lonyü gü kheje ki keti so-o nhunpfü bin hü nla?”
15Mosa le, “Temi dan le Sunggigü kendasha nyüo aki ryü kebin genyu ale hon mvulo shvu la hü nle. 16Temi mihvu le kenya lolo, au le akiryüo ale digü le njü yo pen pe tsü hü, lo ale Sunggigü johokeshü lo tejvü dan zope hishü hü nle.”
17Tsontsin Jethro le, “Nle thyü kebin tsüle gwa mvu. 18N-e lo temi dan-e hokeli kelai le. Nle nnpfü hi thyüti tse kethyü tsenri. 19Ale thakegwa peha rhipe ntsü tile, lo Sunggigü le nzen hüti. Nle temi dan sunthyü lo anyugun le kenya kebin sen-o Sunggigü mhundyü nyu gü kethyü tsüle njü. 20Nle Sunggigü johokeshü dan pe anyugun senthyü lo anyu no dihontse yhun lo nyuthyü mvulo shvuyo zokekho pe anyu zenmvu loshvu. 21Tsünyeki temi aphu dannyu thathyü lo kekü Sunggigü kenshvu, tenyenlo kekü, lo jwe ntsü kehünyu kejü pe no yie, tsi, henpvün lo tseryü so sharhinyu thyülo. 22Tson-o tsüdan no gwenkho aphu ka temi dan jünkera pe tsülo. Anyugun no a-kerü dan aphu sen nki ryülo, ai kenyakenyü keshe dan we anyugun no kerathü pe tsü lalo. Anyugun no keche-o nkhvu pfü keshü güle ngenyu nne ti. 23Nle hihontse thyülo yatselo, Sunggigü le johokeshü hontse nle nhokelila loho, lo temi hidan aphu anyugun jünpen lo-o kaki gun loti.”
24Mosa le Jethro khwenyüo, 25Israel nyu aphu dannyu tha thyülo kekü temi kejülo. Yie, tsi, henpvün lo tseryü so sharhi kejü külo. 26Tson-o anyugun no gwenkho aphu ka temi dan jün kera pe tsü, jokerü dan sen-o Mosa ki ryü, ai keshe dan we anyugun npfü penla hü. 27Mosa le Jethro kelushüo no ranio a-kaki gunla.
Currently Selected:
CHWEKETIN 18: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
