CHWEKETIN 17
17
Tsonye Gü Ge Zü
(Tsip 20:1-13)
1Israel nyu apentha Sin tehen gü nken-o Npugü johokeshü zen-o kethün a-shvuthyü ryü. Refidim ka a-nyugun kensenbin thyülo, ai bin tsünyu ketsü zü ndila. 2Tsügenyu anyugun le Mosa ka kenyao, “Agun no tsü nrün zü khi shü,” tsonso.
Mosa le anyugun ka, “Hagun le nyuthyüo anmu bin la? Nyuthyüo hagun le Npugü seme hü nla?”
3Ai temi dan le teri salao Mosa ge kenyao, “Nle nyuthyüo Ijipt nyu agun zenchwiryüo agun, agun nyenyu lo agun senru no teri sila titse bin nla?” tsonzo sola.
4Mosa le Npugü ka kehithyüo, “Ale temi hidan pe dihontse tila? Anyugun le tso pe ajon güjü laso.”
5Tsontsin Npugü le Mosa ka, “Israel nyu sharhi dan peha zenlo-o temi dan mhundyü gülo. Lo nle pe Nile züri vükeshü thün gü tsü senlo. 6Ale Sinai thu ge tsonye nme ka nmhundyü sobin ti. Tsonye gü vüshülo temi dan no tsü nrün genyu tsüge zü le tsun chwiryüti.” Mosa le Israel nyu sharhi dan mhundyü ka tsü hontse thyüshü.
7Bin gü zan pe Massah lo Meribah tsela, Israel nyu le kenya lo Npugü semeo, “Npugü le ngun zen hüle nmvula?” tson kezo genyu.
Amelek nyu zen-o Teri Kethyü
8Amelek nyu le ryüo Refidim ka Israel nyu zen kega. 9Lo Mosa le Joshua ka, “Temi peha kejülo-o senduki gü Amelek nyu zen-o kega lo. Ale Sunggigü le ano sen lolo tse keshü thün gü sen rincho sun ge so binti.” 10Joshua le Mosa le a-ka zo keshü hontse thyülo-o gü Ameleknyu zen kega kebin ka Mosa, lo Aaron lo Hur tsele rincho sun ge külo. 11Mosa le a-benshwe kebin then Israel nyu le kvulo ai a-ben khishe lalo Amelek nyu le kvuchwiryü lala tse. 12Mosa le a-ben nyüho la ntsin Aaron lo Hur au le tso nme penryü a-no tsüge dunlo, lo au le a-kho ka bin-o a-ben nmhulo, yhüko chela kemvuthen tson bin-o ti. 13Hihontseo Joshua le Amelek nyu so kvushü lola.
14Tson-o Npugü le Mosa ka, “Hi rüchün hü nrün genyu kvukelo higü rüla thu lo. Ale Amelek nyu nkeshü lati tse Joshua ka zo shülo,” tson zoshü. 15Mosa le kershvubin nme khwen lo-o a-zan tho pe, “Npugü le aphikeden gü,” tse kolo. 16A-le, “Npugü Phikeden penso tetsolo! Npugü le kethonthen Amelek nyu zen-o kega binti!” tson zoshü.
Currently Selected:
CHWEKETIN 17: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
