CHWEKETIN 16
16
Manna lo Gükhu
1Israel nyu temi apentha Elim nyu tsonchü shü, lo anyugun le Ijipt nyu chwikeryü shyehvu gü jonryü pvün nyü Sin tehenyhunkemvu gü ka ryülo, tsüle Elim lo Sinai au jaka. 2Tehen tsünyu anyugun aphu Mosa lo Aaron au ge kenya lola, 3tson-o au ka, “Npugü no Ijipt nyu agun boshvu lalo gwanrün laryü. Tsüki we agun le dun-o tyü lo ketyüketsü kechae tyükenyü tyü lo nrün. Ai hai le agun zenryü tehen ki agun aphu no khünsi güzhü laso.”
4Tsontsin Npugü le Mosa ka, “Ale hagun aphu genyu tsangge tensü rishüti. Temi dan no khenyütsen chwigü tsüjonnyü ketyü jünkequen lo. Hihontseo anyugun le ajo dan then hüle nmvuyo ale shwi shüti. 5Jon tseronyü anyugun le khenyütsen hyulo kehü jünhvu senryüo tsü ndo nron loti.”
6Tson-o Mosa lo Aaron au le Israel nyu aphu ka, “Nthu ngwün ki hagun le Ijipt nyu hagun zenchwi keryü gü tsüle Npugü tse kethyü shalo ti. 7Lonyü ki hagun le Npugü le kehü keben hyu ti. Hagun le a-ge kenya kebin a-le nyülo laso, ai le a-le thyülo tse keshü gü thyü kebin gwenzin genyu.” 8Tson-o Mosa le, “Npugü le ngwün gü thyüpe hagun no tyüti lo lonyü tensü hagun tyü kenyü kho pe hagun tsüti, hagun le ditsüki thyü a-ge kenya bin yo a-le nyülo kelasi genyu. Hagun le ai ge kenya kebin tsüle ketsin Npugü ge kenya bin nyo.”
9Mosa le Aaron ka, “Israel nyu apentha no ryüo Npugü mhundyü nyu solo lotse zoshülo, a-le anyugun le kenya kebin nyülo kela si genyu.” 10Aaron le Israel nyu apentha kazo keshü hontse anyugun le raniryü tehen zin shwishü laryü Npugü zan kechwi kethyü keben nme le nmhun ge chwiryüla. 11Npugü le Mosa ka zoshü, 12“Ale Israel nyu le kenya kebin khwenyülo laso. Anyu ka zoshülo anyugun no kheje gwen tsangzün gü kezhü ka thyü tyü ti lo lonyü gü tensü tyü kenyü kho tyüti. Tson-o anyugun no Ale Npugü, anyu Sunggigü tse sha loti.”
13N gwün gü gükhu danda le ryüo anyugun kensenbin hen la lo lonyü gü khüzü le anyu gun kensenbin aphu hunla. 14Tson tseo khüzü ndi lalo tha peha rüpfü lo tepfütsü kethyü le tehen so ge bin. Tsüle tseren hontse. 15Israel nyu le tsü hyu shüo, tsüle nyuyo shamvuo khinyunyu ketso-o, “Hile nyu ola?” Mosa le anyugun ka, “Hile Npugü le hagun no tyü lotse khikeshü tensü güle. 16Npugü le hihontse zoshü, temi nmeme tse a-le senmvulo keshvu kho nme genyu liter kenyhun thyüo a-kami genyu jün lolo.”
17Israel nyu le peha le chon lo peha le rho tse jünlo. 18Anyugun le tsü ndo laryü kechon jün kolo gü-e rüchemvu lo kerho jün kelo gü-e rho lamvu. Nmemetse a-le sen mvulo keshvu kho jünlo. 19Mosa le anyugun ka, “Temi nme senduki genyu keshanyue pe bin njü nya,” tsonshü. 20Ai peha le Mosa khwenyü mvuo peha nsen pe binla. Lonyü gü tsüle a-nyuryüo ten pe a-rün bola, tson-o Mosa le anyugun ge a-nyuntala. 21Lonyü tsen nmeme tse a-sen mvulo keshvu jün kequen lo lotse; lo tsangnyün chwiryülo a-sen tsüle zunla hü.
22Jon tseronyü anyugun le anyu tensü jünhvu temi nme genyu liter pezi jünlo. Anyugun dan nyu sharhi dan aphu ryüo Mosa ka tsü zoshü, 23tsontsin a-le anyuka, “Npugü le johokeshü le senduki tsüle, thyükenshün pe a-ketsü kenshün kerüyü jon. Nthu rokenyü rolo lo bü kenyü bülo. Lo senduki genyu a-sen pebin njülo.” 24Mosa le zokeshü hontse anyugun le a-sen pe bin njüo lonyü güti; tsüle süla nmvue a-nyuryümvu. 25Mosa le anyu ka, “Nthu hi tyülo, nthu hile Sabbath, thyükenshün pe Npugü tsükela kerüyü jon genyu, lo hagun le kensenbin tegweki ketyüketsü nme hyu loho. 26Jon tsero hagun le tensü jün kequenlo, ai jon tsenyü nyü we, kerüyü jon, tsünyü nme bin loho.”
27Jon tsenyü nyü temi peha le jün kequen titse gü, ai nme hyulomvu. 28Tson-o Npugü le Mosa ka, “Dithen lakhi hagun le a johokeshü zenmvu bin ti ola? 29Rüchünlo, Ale Npugü, ale kerüyü jon nme pe hagun tsüshü, tsügenyu jon tseronyü ale a-zin tse jonhvu genyu tyü kekü pe hagun tsüti. Nmeme tse jon tsenyü gü nyü a-le dika bin yo tsüka binlo, a-ka nken nya.” 30Tsügenyu temi dan le jon tsenyü günyu rüyülo.
31Israel nyu le tensü tsügü pe Manna tse kolo. Tsüle thatsi kechon keshe nme hontse, lo a-keyhün le khuzü pe tensü kethyü hontse. 32Mosa le, “Npugü le ngun no ngun nyenyu dan genyu Manna peha pe binnjülo tse johoshü bin nyo, tson-o anyugun no a-le Ijipt nyu ngun zen chwiryü kethyü tehen nyu a-le tensü pe ngun ketsü hyu nrün genyü.” 33Tsügenyu Mosa le Aaron ka, “Laki nme nyu manna liter kenyhun pe shülo-o, ngun nyenyu dan genyu pe Npugü mhundyü ka bin njülo,” tsonshü. 34Npugü le Mosa ka zo keshü hontse, Aaron le pe shülo njüo tsü ntsen binlo nrün genyu khipe kejozenkelo Khinpha mhundyü ka shüla. 35Israel nyu le Kanan kazü tilo-o, tsünyu bin lo kemvuthen chen henzi Manna tyü. 36(Tsügwenkho ka kesin nda kehü khin tsüle liter nki kho.)
Currently Selected:
CHWEKETIN 16: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
