CHWEKETIN 15
15
Mosa Lü
1Mosa lo Israel nyu dan le lü hi thyüpe Npugü kishü:
“Ale lü thyüpe Npugü ki shüti,
a-le gingvu tse kvulo kela genyu;
a-le keru dan lo tsüge kedun dan
shwe pe Zida günyu shü laso.
2Npugü le a kesun kenko gü;
a kenikelo gü tsüle a-le.
A-le a Sunggigü, lo ale a-shwe ti,
A pvü Sunggigü, ale a-keda rüla zo lü thyüti.
3Npugü le teri kekvu nyu nme;
a-zan le Npugü.
4“A-le Ijipt nyu rihüdan lo anyu kerugari
dan shwe pe Zida nyu shüla;
kedanyu kegwatsin dan le kenhon
Zida nyu nrheshvu la.
5Zida kentsun le anyugun henla;
anyugun le tso nme hontse zithin ki jonphün laso.
6“Npugü nben nzhüzin le kvupe ndun thyüle;
tsüle shwikerüchün dan bothürü laso.
7N terünkepfü kekvu nyu nle nshwikerüchün nyu
hü pe shwen laso;
N nyunkekhü le nnyüchwiryüo npenkon kero
hontse anyugun rolaso.
8Nle Zida vüshü lo zü le khwe tetso la;
tsüle so pe kabon nme hontsela;
Zida gü kentsun tsin kile nko la.
9Shwikerüchün nyu le zo, ‘Ale anyugun hüo
anyugun tün loti;
Ale anyugun kenya kenjün loti
lo ale lokenyü aphu khi loti;
Ale a zhethon tho lo-o anyugun hon kebin
aphu khilo ti.’
10Ai Npugü, nle gwengwa nmhü keshü ka
Ijipt nyu dan le zünyu nrheshvu laso;
anyugun le guli hontse zü kenrin kethyü
nyu jonphün yülaso.
11“Npugü, teronyu dan nyu segü le nhontse ola?
Segü le nhontse, Kenshün nyu ndun thyü ola?
Segü le nhontse nduntho lo kekvu dan thyülo
gwa tila?
12Nle nben nzhügü ketashü laryü
kazü gü le agun shwikerüchün nyu nyilo laso.
13Nle zokenjü hontse nle rhinhilo kela
ntemi dan tson tsin;
nkekvu ka nle anyugun tsontsin pe
n kazü keshün günyu shülo laso.
14Tsipwe dan le nyülo-o, anyugun
kensü bin nyo;
Filistian nyu le a-kekerü thyü bin nyo.
15Edom nyu sharhi dan le a-kerü laso;
Moab nyu temi kekvu dan le a-kensü bin nyo;
Kanan temi dan le a-kepeche ndi laso.
16A-kerü lo kenshvu le anyugun gen bin.
O Npugü, anyugun le nkekvu hyu shüo
n temi-- nle donyu rhinhilo kela dan le
nken tinla kemvuthen nshvu pe rhokedyü
thyüo so bin nyo.
17Nle anyugun zenryüo nkazüthun ge sen shüti,
Npugü, nle nka thyüti tse, kejü kelo
bin gunyu n npfü nben pe Kerüshvuka
gü thyüshü.
18Npugü, Nle kethonthen raja thyüti.”
Miriam Lü
19Israel nyu le Zida lvunyu kazü kesin ka tsonchü chwila. Ai Ijipt nyu le anyugun kerugari, keru lo tsü kesen dan zen-o zida gü nyu yükelo ka, Npugü le zü senryüo anyugun kemihen la.
20Aaron lügi Miriam sidyükesha gi, le tambourin senlo, lo tenunyu dan aphu tambourin sen a-sithen-o nashü. 21Miriam le anyugun ge nyu lüthyüo:
“Lüthyüpe Npugü ki shülo, a-le
zankechwi thyü kvulo kela genyu;
a-le keru lo a-ge kebin dan
shwe pe zida günyu shü laso.”
Zü Kekhü
22Mosa le kenhon zida ka Israel nyu zen-o Shur tehenyhunkemvu gü nyu ryülo. Jonshen anyugun le tehen gü pfüthü gun-e zü hyulo mvula. 23Tson-o anyugun le Marah tse ko kehü bin nme ka ryülo, ai tsüka zü le khürio anyugun le tsülo shvula. Tsügenyu tsü zan pe Marah tho. 24Temi dan le Mosa ka kenyao, “Agun no nyu tsü tila?” 25Tsontsin Mosa le Npugü ka hishü, tsüka Npugü le sen bin me tsinpe a-hishüo a-le tsüpe zünyu shweshü laryü zü güle tsü gwala. Tsüka Npugü le anyugun no then-o yhun nrün tejvü dan pe anyugun tsüshü lo tsüka a-le anyugun kegwa keshvu shwishü. 26A-le anyugun ka, “Hagun le ale nyule njü letseyo tsüthyüo ajo zenpen lo ajo hokeshü dan thyüzen hüyatselo, ale senryü Ijipt nyu ge keshü kethyü kenyü tsü nme-e pe hagun ge shü loho. Ale Npugü, hagun thyü kesherhün shü kehü gü le.”
27Tsüsika anyugun le Elim ka ryülo, tsüka zükenthün bin tseryü kenyhun lo palm bin hentsenyü le bin; tson-o anyugun le zü khoka nsenlo.
Currently Selected:
CHWEKETIN 15: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
