CHWEKETIN 14
14
Kenhon Zida Pfüthü Kegun
1Npugü le Mosa ka, 2“Israel nyu temi dan no ranio Pi Hahiroth mhundyüzin Migdol lo Kenhon Zida gü au janyu, Baal Zefon kho ka sunlo lotse zoshülo. 3Raja gü le Israel nyu dan le lojvü nyu nmhon-o tehen nyu anyugun khinpfü kebin giso tse rüchünti. 4Tson-o ale a-nyun thyü pe rüla-o, a-le hagun sithen ryülo, ale raja lo a-rihüdan so kvuo azan kechwi thyü loti. Tsüka Ijipt nyu le ale Npugü letse sha loti.” Israel nyu le tsühontse thyülo.
5Ijipt raja güka temi dan le tinla sele tse zokeshü ka, a-e lo a-hensin kedanyu le anyugun nyu kelunio, “Israel nyu no ngun do thyü kebin nyu tinkela hile ngun le nyuthyü la sela?” 6Tson-o raja güle a-terigari lo a-rihüdan ndalo. 7A-le a-kerugari dan aphu, a-kegwa tsin tsitsero dan-e sin, kedanyu dan no ketsen külo-o tsonchü shü. 8Npugü le raja gü nyuthyü pe rüla, tson-o a-le kvuo tin kejü Israel nyudan hü gunla. 9Ijipt nyu rihü dan le anyugun keru, kerugari lo tsü kesen nyu aphu anyugun sithen gü Kenhon Zida ka Pi Hahiroth lo Baal Zefon khoka a-nyu kensenbin ka anyugun hü lola.
10Israel nyu le raja gü lo a-rihü dan le anyugun ntsun ryü kezhü hyushüo nshvu sala, tson-o nrao Npugü ka keche hishü. 11Anyugun le Mosa ka, “Ijipt nyu sika ndio, nle agun zenryüo hiki tehen yhunkemvu bin ki agun no sila titse ole? Nle nyuthyüo Ijipt nyu agun zenchwiryü yo, shwishüta! 12Hihontse kelai letse agun le Ijipt nken kemvu ka nka hoshümvu ole? Agun no agun keshathyü Ijipt nyu dothyü bin lotse agun le nka zoshü. Ryüo hiki tehenyhunkemvu bin ki sikela gümvule tsüki medo thyü kebin gü we gwakvu.”
13Mosa le temi dan ka, “Nshvu nya! So matse binlo, nthu Npugü le nyu hontse thyüo hagun kenishü tiyo hagun le hyuti; hagun le Ijipt temi hidan hi hyu sin loha. 14Npugü le hagun genyu teri thyüti, hagun le thame thyümvue gwa. 15Npugü le Mosa ka, “Nle nyuthyüo keche hi bin nla? Temi dan no mhundyü tsonchü shülo tse zoshülo. 16Nthün penso lo-o keta pe Zida so ge shülo. Zü güle kenjünkho la-o Israel nyu dan le Zida gü pfüthüo kazü kesin ki güla nrün genyu. 17Ale Ijipt nyu nyun thyüpe rülati, tson-o no anyugun sithen güti, lo ale raja gü, a-rihüdan, a-kerugari dan, lo tsü kesen nyu sokvu lo-o no arühvu loti. 18Ale anyugun nyekvu kela ka, Ijipt nyu le ale Npugü tse sha loti.”
19Tson-o Sunggigü lokethyü, Israel nyu rihüdan mhundyü rikehü gü tsüle ketu-o anyugun sizin güla. Lo nmhu chwe gü ko ketu-o, 20Ijipt nyu lo Israel nyu au jaka sun lola. Nmhu güle Ijipt nyu genyu kezün thyüla, ai keben khipe Israel nyu tsüshü, tson-o khensin rihü dan le khinyunyu khonni gü mvu.
21Mosa le a-benshwe pe Zida gü soshü, laryü Npugü le npho zin tsangkenbu kenko nme no Zida gü whün tesen nila. Tsüle khensin nbuo Zida gü no kazü kesin thyüla. Zü kenjünkhola, 22lo Israel nyu le kazü kesin nyu Zida pfüthü güla, lizin hizin züle kabon hontsela. 23Ijipt nyu le anyugun keru, kerugari, lo tsü kesen nyu aphu zen-o anyugun hü gü. 24Tsangben gü kejü ka Npugü le mah chwe lo nmhun chwe ge Ijipt nyu rihü dan nri shüo anyugun pe thyülo keshvu nyu shüla. 25A-le anyugun kerugari pha thyüpe nsüla, tson-o ketu rüsala. Ijipt nyu le “Npugü le Israel nyu nopen-o ngun ntsun bin laso. Ngun tin la tile khun!” tsonso. 26Npugü le Mosa ka, “Zü gü no Ijipt nyu lo anyugun kerugari lo tsü kesennyu so ryü la nrün genyu nben shwepe Zida gü so shülo tsonshü.” 27Tsügenyu Mosa le tsangben chwikeryü ka a-ben keta pe Zida gü soshü laryü a-bin ka niryüla. Ijipt nyu le Zü gü nken lati tseso, ai Npugü le anyugun shwe pe Zida günyu shüla. 28Zü gü le rani ryüo Ijipt nyu kerugari, tsü kesen nyu, lo rihü dan Israel nyu hüo Zida günyu keyü nyu aphu kemihen lola; anyugun nme-e nsenmvu. 29Ai Israel nyu dan we lizin hizin zü le kabon hontseo kazü kesin nyu Zida gü pfüthü-o tsonchü chwila.
30Tsünyü Npugü le Ijipt nyu ben nyu Israel nyu kenilo, lo Israel nyu dan le Ijipt nyule Zida seki si kebin hyu. 31Israel nyu le Npugü le kekvu keda sen-o Ijipt nyu nyeki kvu kela hyu shüo Npugü nshvu la; lo anyugun le Npugü lo a-gogü Mosa tenyen lo.
Currently Selected:
CHWEKETIN 14: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
