CHWEKETIN 13
13
Nyuri gü Thyünshün Kelo
1Npugü le Mosa ka zoshü. 2“Peche nyuri aphu thyü kenshün pe atsülo, kechamvule Israel nyu peche nyuri lo senru nyuri ligü higü ahon genyu.”
Kebu Shükemvu Tensü Nga
3Mosa le temi dan ka zoshü, “Jon higü rüchün hülo, hagun le medo thyü kebin Ijipt nyu chwiryü kela jon gü hi. Jon hi nyu Npugü le a-kekvu keda sen-o hagun zen chwiryü. Kebu no keshü tensü tyü nya. 4Ahib shye ge nthu hagun le Ijipt kheo tin jü nyo. 5Npugü le hagun bon nyu dan ka, Kanan nyu, Hitnyu, Amornyu, Hivtnyu, lo Jebusnyu kazü pe hagun tsü titse a-johoshü bin nyo. Tsügenyu a-le hagun zen gun gü kazü kebwe kegwa tsünyu shü lolo, chenkechwi hagun le shyekeri gü ka nga higü zen hüti. 6Jon tsenyü hagun le kebu shükemvu tensü, tyü lo jon tsenyü nyü Npugü kerhvu nga thyü mvuloshvu. 7Jon tsenyü hagun le kebu keshü tensü lihi-e tyü nya; hagun kazü nyu kebu nmvue kebu no keshü tensü no lika hika bin nya. 8Nga solo, hagun nyu peche juka, hagun le Ijipt nyu tin kejüka Npugü le nyuthyü shüyo tsü genyu hagun le thahi aphu thyükebin kon zope anyugun zen shülo. 9Hi thyüzen kehü le thapeha pe nben ge phin kenjü nmvue nsenpfü gen shükenjü hontse nno nsi rüchün ni loti. Npugü le a-kekvu kedanyu Ijipt nyu hagun zen chwiryü kela genyu Npugü tejvü kezo lo keswü tsüle hagun no hagun si rüchün loti. 10Tsügenyu chenkechwi gwenkho tho kenjü gü nyu nga higü zen hüti.
Nyurigü
11“Npugü le hagun bon nyu lo hagun ka a-johokeshü hontse hagun zengü Kanan kazünyu shüti. A-le tsüpe hagun ketsü ka, 12hagun le peche nyuri gü pe Npugü tsümvu loshvu. Nsenru aphu peche nchelo kerigü tsüle Npugü hon, 13ai gada nyu sunka tanyü nyu pe kerüshvu thyüo tsü heinilo la mvuloshvu. Lo nle gada gü tsü heinilo nyümvu yatselo a-gunda bosela mvuloshvu. Lo nnyu dan nyu peche nyuri lihigü nle hei lola mvulo shvu. 14Hisiki, nnyu le hithen kehü hile nyu genyula tse ketso lo nle a-ka, ‘Agun le Ijipt ki medo thyü kebin ka Npugü le kekvu keda sen-o agun zen chwiryü lale tse zoti. 15Ijipt raja güle a-nyunrüo agun hoshümvu kela ka, Npugü le Ijipt kazünyu temi lo senrue nyuri gü aphu dushvu la le. Tsügenyu agun le senru peche nyuri lihi-e pe Npugü rüshvu hü, ai temi peche dan we heinilo la hü nle. 16Hithen kehü hile thapeha pe agun ben ge phinpfü, nmvue agun senpfü ge shüpfü kehü hontse agun sirüchünni loti; tsüle Npugü le a-kekvu keda sen-o Ijipt nyu agun zenchwi keryü agunno rüchün loti.’ ”
Nmhuchwe Gü Lo Machwe Gü
17Ijipt raja güle temi dan hoshü kela ka, Sunggigü le a nyugun zen-o Filistian nyu kazü tson gunmvu, tson tsügü le zükvu-e. Sunggigü kerüchün le, “Temi dan le teri teno lolo rani Ijipt ki tsüla lo keshvu genyu.” 18Tsonkethyü gü mvu le a-le anyugun tsonrio tehenyhun kemvunyu vüho-o Zükenhon Zida kipon gun. Israel nyu dan le terithyü nrün gwe nda pfühü.
19Mosa le Josef kesi mi pfühü, Josef le Israel nyu dan no swe-o johoshü kenjü hontse. Josef le anyugun ka, “Sunggigü le hagun kenikeshü nyu bin hinyu amin sentin lalo,” tsonzo shü.
20Israel nyu le Sukkot nyu tsonchü gü tehenyhunkemvu te Etham ka binlo. 21Nhenyu Npugü le nmhu chweme nyu anyugun tsontsin lo kheje ki lo mah chweme nyu anyugun gwenben hü, tson-o anyugun no kheje ki lo nhenyue tsonchülo nrün genyu. 22Nhenyu nmhu chwe gü lo kheje ki mah chwe gü le temi dan mhundyü bin zin hü.
Currently Selected:
CHWEKETIN 13: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
