CHWEKETIN 12
12
Nkenkela
1Npugü le Ijipt nyu Mosa lo Aaron au ka: 2“Hagun genyu shye higü pe chen günyu shye kerigü thyüti. 3Jo hidan pe Israel nyu apentha ka zoshülo: Hi shye jonryü nyü temi nmeme tse a-kakhün genyu tanyü nyu nmvue tenyü nyu nmeme kejü külo. 4Kami le temi rho rio tanyü pen tyülo kemvui yatselo, a-kajon gü zen temi nme le dikho tyü logwa yo rüchün-o tanyü nme kenjün logwa. 5Hagun le tanyü nmvue tenyü kejü logwa, ai tsüno a-ge tetsin kendi chenme nyu mvuloshvu. 6Tson-o shye jonryü pezi nyü ngwengü Israel nyu apentha a tanyü tsü dushvu kü loti. 7Temi dan no tezi gü peha pe thyü tsügü tyüla makebin ka gü nyu kakhin kachon hvu lo kakhin soki kepha gü yün lo. 8Tsüje thyü rope henkekhü lo kebu no shü kemvu tensü nyütyü ti. 9Ketegi nmvue nityü nya, ai apentha ro tyüti, a-pe, a-pha lo a-sen-ari sin-o. 10Keshanyu-e no bin-o tsang nben nya; nsen yatselo pe rola mvu loshvu. 11Hagun le hihontseo tyüti: hagun sen phinpfü, hagun phakü pfü, lo hagun thün sen-o cho-o tyüti. Tsüle Nkenkela nga pe Npugü, arühvu nrün genyu.
12“Ale tsüje Ijipt kazü pfüthü gunti, tson-o peche nyuri boshvu kü lati, temi-e lo nyukhu metse, lo shaja pe Ijipt terodan aphu tsüti. Ale Npugü. 13Kakhin kachon ge tezi tsüle hagun le katsünyu bin tse kethyü zansü. Ale shaja pe Ijipt nyu tsü keryü ka, ale tezi hyu shülo hagun nkenla-o kenjün kethyü no hagun ge ryü loho. 14Hagun le, Ale Npugü, ale dihontse thyü shüyo rüchün hülo nrün genyu jon hinyü nga hümvu loshvu. Ryü kezhü gwenkho aphu hi kerühvu nga mvu loshvu.”
Kebu no Shükemvu Nga
15Npugü le zo, “Jon tsenyü hagun le kebu no keshü tensü tyünya--kebu shükemvu tensü nti tyü mvu loshvu. Jon kerinyü hagun kanyu kebu aphu khishwila mvuloshvu, kechamvule lihigüe jon tsenyü ja katsü kebu no keshü tyü yatselo a-no atemi thyümvu lati. 16Jon kerinyü lo jon tsenyü nyü hagun le keteno-o rüshvu ti. Jon tsühvu ka tsü thathyü loho, ai hagun ketyü ketsü ndo logwa. 17Ale jon hinyü Ijipt nyu hagun zenchwi kela genyu Nga higü zen hülo. Ryü kezhü gwenkho aphu nyu hagun le jon higü rühvuo nga lo. 18Shye keri gü jonryü pezi nyü ngwün ki gü jon nki nme ngwün gü keti hagun le kebu no keshü tensü lihi-e tyünya. 19-20Jon tsenyü kebu nme no hagun kanyu bin nzhü nya, kechamvule phenyü nyue lo tesin metse kebu no keshü tensü tyü yatselo, a-no atemi thyümvu lati.”
Nkenkela Nga Kerigü
21Mosa le Israel nyu sharhi dan aphu ko shüo anyugun ka, “Hagun nmeme tse hagun kami no Nkenkela nga nrün genyu, tanyü nmvue tenyü nyu kejü külo njüo dushvu lo. 22Tson-o hyssop chwe me khilo-o pe tezi no shü kenjü khun ka tezi ntsen lo njüo pe kakhin kachon hvu lo a-so kepha gü tsü yünlo. Tsangben kemvu then hagun temi nme-e kamhun ki chwinya. 23Npugü le Ijipt kazü pfüthüo Ijipt nyu dushvu kegun ka a-le kakhin so kepha gü lo kakhin kachon hvu ge tezi hyu lolo kesi kapu güno hagun kanyu yü gü hagun dushvu loho. 24Hagun lo hagun nyenyu dan no kethonthen tejvü hizen hümvu loshvu. 25Npugü le pe hagun tsüti tse zokenjü kazü günyu yülolo, hagun le hijvü hi thyümvu loshvu. 26Hagun nyenyu le ‘Hijvü hile a-kon le nyula? tse hagun ketsolo,’ 27Hagun le, ‘Hile Israel nyu le Ijipt nyu kehü ka, Npugü le Israel nyu ka nkenkela genyu kerüshvu thyüpe Npugü kerhvu le,’ tson zoti. A-le Ijipt nyu dushvula ai Israel nyu nrhoshü,”
Tsontsin Israel nyu le khosen-o rüshvu. 28Tsüselo anyugun le gü Npugü le Mosa lo Aaron au ka jo zokeshü tsü thyülo.
Nyurigü Kesi
29Khejenyu tsangluka Npugü le Ijipt kazü nyu peche nyuri nyu aphu, Raja gü nyu, a-rajakhün gwe kebin gü katsügü do kentsun tsin ki kebin nyugü keti dushvula; lo senru nyu dan aphu dushvula. 30Tsüje, Rajagü, a-hensin kedanyu dan lo Ijipt nyu aphu soryüla. Kamenyu nti-e peche nyurigü sikemvu ka ndi kela genyu Ijipt kazü a phu nyu chü nra pe kesü thyü la. 31Tsüje raja güle Mosa lo Aaron au koshüo au ka, “Hai lo hagun Israel nyu dan chwila lo! A kazü nken lalo; gü hai le hi kehü hontse Npugü rüshvulo. 32Hagun tanyü, tenyü lo methu aphu zen tinla lo. Lo jochü pe ako atsü shülo.”
33Lo Ijipt nyu le temi dan no whütse anyu kazü gü nkenla lotseo; “Hagun le tinla mvu yatselo agun le aphu kesi so,” tson sola.
34Tsügenyu temi dan le kebu no shükemvu tho yün kebin dan pe phi ka tsera pe anyugun buthun ka shü pen. 35Lo Mosa le Israel nyu ka zokeshü hontse Ijipt nyu ka suna lo rakagi ronye lo phinya dan hilo. 36Npugü le Ijipt nyu thyüpe no Israel nyu rühvuo anyugun le nyu hiyo pe tsüshü. Hihontseo Israel nyu le Ijipt nyu kenya pfü tinla.
Israelnyu le Ijipt Nken Kela
37Israel nyu dan le Rameses ka tsonchüo Sukkot nyu gun. Nchetenu sin kemvu le temi ye tsitsero kho. 38Lo temi kecha danda lo tanyü, tenyü lo methu dan-e anyugun sin gü. 39Anyugun le Ijipt nyu kebu no shükemvu tho senchwi keryü tsenlo, kechamvule whütse Ijipt nyu anyugun hüshwila-o anyugun le ketyüketsü nmvue kebu no keshü tensü nda lo fümvu kela genyu.
40Israel nyu le Ijipt nyu keyhun le chen tsizio shenryü. 41Chen tsizio shenryü kepen jon nyü Npugü temi dan aphu Ijipt nken-o tsonchü shüla. 42Kheje me tsü Npugü le khwen tseo Ijipt nyu anyugun zenchwila; tsügenyu ryükejü gwenkho aphu Israel nyu temi le tsüje tsü thyü kenshün pe Npugü tsüo khwebin hü.
Nkenkela Rüla Thenmvulo Keshvudan
43Npugü le Mosa lo Aaron au ka, “Hidan hile Nkenkela nga jvü dan: Tesin no Nkenkela nga chvütyü nya, 44ai do ligü higü-e hagun le heilo kelanyu le a-girü layatselo tyü logwa. 45Kenjwenyu nmvue jonshe nyu no tsü tyü nya. 46Ketyüketsü tsü apentha ka dika nda nron loyo tsünyu tyüla mvulo shvu; tsü sen kamhun ki chwi nya. Lo a-ru nme bosenya. 47Israel nyu apentha nga higü zenmvu loshvu; 48ai girü kemvu nyu no tsü tyünya. Tesin hagun dan nyu bin tinkelanyu nme le Nkenkela nga nyü yatselo, hagun le a-kami peche aphu giryü la rimvu loshvu. Tsonlo a-le phenyü nyu nme hontseo kengüo nga logwa. 49Tejvu gü tsüno phenyü nyu lo hagun dan nyu bin tin kela tesin ge-e kenme ti.” 50Israel nyu aphu Npugü le Mosa lo Aaron au ka zokeshü jozen-o tsühontse thyülo. 51Tsüjon nyü Npugü le Ijipt nyu Israel tsipwen zen chwiryülo.
Currently Selected:
CHWEKETIN 12: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
