DANIEL 11
11
1A-le akeche lo a nopen kethyüi le bin. 2Lo ale ntsoka nka zo titse kebin hile ketsin.”
Ijipt lo Siria Rajaphün
Tsanggelogü le zo, “Raja kenshen le Persia so gon niti, tsüsika pezigü, a-le kecha aphu nyeki nnyati. A-le a-kekvu lo kenya tsin gwünkho ka Greece rajaphen khen soti.
3“Tsüsika raja kepeche nme le soryüti, a-le kekvu keda nme so keda thyüti, lo a-le nyuthyü nyüyo thyüti. 4Ai a-le kvusa kebin günyu a-keda kenjün pe pezi thyü lati. A-gen tsü ryükemvu rajadan le a-sun ka kekvu senti, ai anyugun le a-kekvu hontse loho.
5“Ijipt raja le kvuti. A-hensin general peha le kvukvuo rajaphen gonkvu kethyü so kekvu senti. 6Chen keshanyu sika Ijipt raja gü le Siria rajagü zen kepvüshen-o a-nyugi lope a-ka kalvu shü lati. Ai kepvüshen tsügü le binthon loho, lo tsügi lo a-nyepvü, a-nyu, lo a-gonyu, a-zen gü kethyü nyu aphu boshvulati. 7Thon mvutse tenugi kaminyu nme le raja thyüti. A-le Siria rihü when-o a-chwida nyuki yüo a-so kvu loti. 8A-le anyugun terodan menkezü lo suna lo rakagi kanyü thyükenshün pe tero tsüdan tsükeladan pvü-o Ijipt ki nigü lati. Gwatho-o chen peha siki 9Siria raja le Ijipt hüti, ai a-kemvu thyüo a-no rani lati.
10“Siria raja nyudan le teri genyu gwen nda lo rihü danda kequen soti. Anyugun dan nyu nmele zükeda hontse tsüo shwikerüchün nyu nme chwida whenti. 11Ijipt raja gü le a-nyunkenta pvüo Siria raja zen teri thyü lo a-rihü danda khinlo ti. 12A-le kvukelo genyu lo shüpahü kechon boshvukelo genyu ketekhoti, ai a-le kvuzin gun loho.
13“Siria raja gü le rani gü himhundyü nyeki rihü kechon rhikequen loti. Gwenkhoto le keryüka, a-le a-rihü danda teri kanyü ketsen sa pvü rani ryüti. 14Tsüka temi kechon le Ijipt raja gü ntsunti. Lo, Daniel, nsenye dan nyu temi gwamvusa kethyü peha le tsemin ki kehyu gü genyu n ntsun soti, ai anyugun le kvulo mvulati. 15Tsügenyu Siria raja gü le chwida kenko nyida gü hunlo-o tsü lolati. Ijipt nyu shüpahü le teri thyü simvu lati; anyugun dannyu kegwatsin güe kekvu ndi lati. 16Mehükehü Siria shüpahüdan le nme-e no a-ntsun mvutse Ijipt nyu gen a-kenda thyüti. A-le zokenjü kazü gü nyu kekvu aphu sen loti.
17“Siria raja gü le a-rihü apentha zen-o whütse chwi kethyü ndoti. Lo a-shwikerüchün nyu rajaphen nke nrün genyu a-le a-zen-o kepvüshen lo a-nyugi pe a-ka kalvuti; ai a-le rhikebin gü le gwa loho. 18Tsüsika a-le zida sekipon senyedan when-o kechon so kvu loti. Ai sinrünyi sharhi nme le a-so kvulao a-no ketekho nilo mvulati; tson-o a-le Siria rajagü ketekho gü khipe a-gen shülo lati. 19Rajagü le a-chwida kipon rani ryüti, ai a-le kvulo mvu lati, lo tsüle a-gen nyu kenkhin thyü lati.
20“Raja kecha nme le a-siki soryüti, tsügü le a-rajaphen kenya no chonlo nrün genyu kedanyu nme nipe temidan nshwen-o khajana shvuti. Gwenkho kezü jaka raja tsügü boshvu lati, ai tsüle me yhühyu ka nmvue terinyu loho.”
Siria Raja Gwakemvu gü
21Tsanggelogü le a-kon zoni gun: “Tsügü sika Siria raja gü le temi gwakemvu nme, raja thyükelo kenjüe ndi, ai a-le rüchün bin kemvu ka ryüo tedo thyüo kekvu seü loti. 22temi lihigüe a-nren kethyü we, Sunggigü peshükeda thyü kehü nyue chün nmvue shosen tin lati. 23A-le me zen kepvüshen thyüo senye kechon sa lati, lo a-le senye keshen nme nti so kekvu sen hü yatse-e a-le kvuketsintsin soti. 24A-le me tesha mvutse kenya senye nme hü, lo a-le a-bonnyu nme-e thyülo kemvu thyüti. Tson-o a-le terinyu khinkelo kenya lope a-kethenyu dan nyu kenjün ti. A-le chwida kenko dan when nrün rhiti, ai a-gwünkho le whütse ndi lati.
25“A-le pechesa tse rihü danda zen-o Ijipt raja whenti, lo tsügü ko a-rihü kvusa kethyü danda zen-o a-nren niti. Ai Ijipt rajagü salao no kvulo mvu lati. 26A-tsontsin kehü a-kho kenitsinnyu le a-nke lati. A-shüpahü kechon boshvu lati, lo a-rihü dan nke shüla ti. 27Tsüsiki raja tsühvu le kengü miz nme ka dun-o tyütsü ti, ai au kerüchün gwamvuo, khinyunyu ka nkuti. Au le lonyü kebin gü hyulo kemvui, kechamvule, tsü gwünkho le ryü mvuzun. 28Siria raja gü le a-le lokelo kenya dan sen-o kaki raniti, ai Sunggigü temi nyünyü kemhenla titse rüchünti. A-le nyu le a-kenyüyo thyüti, tson-o a-kazü ki rani gun ti.
29“Tsüsiki a-le Ijipt hü niti, ai tsügwünkho ka we tha le a-kecha thyüshü lati. 30Romnyu le zürun gen ryüo a-nren lo a-le nshvu lati.
“Tson-o a-le a-nyuntasa tse ranio Sunggigü temidan nyünyü nkela titse ndoti. A-le nyünyü tsügü khekeladan tsonketsin thenti. 31A-shüpahü peha le Kerüshvuka bo nrhuti. Anyugun le khenyütsen rüshvu kehü tho khinti lo kenshvu ketetsin tho thyü ti. 32Raja gü le nkuo a-nyünyü khekelanyu sape a-keche loti, ai Sunggigü sithen kehünyu we a-nren ti. 33Sharhidan le anyugun kensü lope temi kechon zen-o zo kezen ti. Ai gwünkho keshanyu ka teri nyu anyugun peha gala nmvue roshvu lati, lo peha rühu pe dothyüti. 34Temi kechon ryüo anyugun zen kerhün kelo dan le anyugun npvü anyugun phin rüchün hü yatse-e temi boshvu kethyü gwünkho ka Sunggigü temidan le keche keshanyu hyulo ti. 35Sharhi kegwa peha boshvuti, ai tsügenyu temi thyükenshün loti. Tsühontse kethyü le bin-o Sunggigü le tho kenjü gwünkho kenigü titi.
36“Siria raja gü le a-le nyu thyünyü yo thyülati. A-le tero kecha nye gon, lo kekvutsin Sunggigü nyekie gwa letseo kemakinti. A-le tsühontse thyülogwa bin-o Sunggigü le shaja pe a-ketsü gwünkho titi. Sunggigü le a-le rhikebin gwenzin tse thyü lati. 37Rajagü le a-bonnyu le rüshvu kehü terogü lo tenunyu le sokehü tero güe sümvu lati. Ketsin thyü a-le tero lihie sümvu lati, kechamvule a-le tero lihie so gonkvu letse rüchün kehü genyu. 38Tsü sunka a-le chwida kenko ntsenkehü terogü rühvuti. A-le suna, rakagi, tsominketsen lo jwen kechon khipe a-pvübonyu le rüshvu hü kemvu tero rühvuti. 39A-chwida kekhwen, khwen nrün genyu sinrünyi tero rüshvu kehü temi zen ti. A-le a-lope kekvu kesennyu letse kehünyu rühvu lo tsünyu lope kedanyu thyü shüti, lo kazü pe anyugun chün thyüti.
40“Siria rajagü gwünkho kenkhingü le ryüjü tsin ka, Ijipt raja gü le awhenti, lo Siria rajagü le a-kekvu aphu, kerugari, kerushüpahü, lo zürun kechon sen-o a-zen kenrenti. A-le zü keda hontse tsipwen kechon hüti. 41A-le zo kenjü kazü güe hüo temi yie yie boshvu lati, ai Edom lo Moab tsipwen dan, lo khekela Ammon nyu dan we tin loti. 42A-le tsipwen tsüdan hü kegü ka we Ijipt kazüe nseshü mvu lati. 43A-le Ijipt le kebukenjü kenya suna, rakagi, lo kenya minketsen dan sen tinlati. A-le Libia lo Sudan lo lati. 44Tsüsiki npho lo tesozin jolo dan le keryü ka a-kerü lati, lo a-le a-rikhen thyü nren-o temi kechon boshvuti. 45A-le zida lo Kerüshvuka le kebin kazüthun hvu jaka a-raja phika-e pensoti. Ai tsünyu a-keche min nme ndio silati.”
Currently Selected:
DANIEL 11: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
