DANIEL 12
12
Kekhin Gwenkho
1Tsanggelonyu, linen phi ben kehügü le zo, “Tsügwünkho ka, hagun rikhun kehü, tsanggelonyu kedagü, Michael le chwiryüti. Tsüsika senyedan le sokeryü siki kenjün kethyü gwakemvutsin gü le ryüti. Tsügwünkho le keryü ka, ntemi, a-zan pe Sunggigü lesü nyu thu kenjünyu aphu kenilo lati. 2Sikelanyu kechon le rhünni soryüti: peha we kethonthen kejokepvü nyu kenjün thyüti. 3Sharhi kensü nyu le tsangge keben aphu zen-o ben loti. Lo Kenjütson pe temi kechon senthyü keshü nyu le shyenyü dan hontse kethonthen ben bin ti.”
4A-le aka zo, “Lo, Daniel, Lesü gü keminlao kazü keni ti kemvuthen mohor pe vüla lo. Tsü jaka temi kechon le nyuthyü binyo shalo ti tse a-yhen thyüo anyugun gwünkho nke ti.”
5Tsüsika ale temi mihvu le züri nme, ka, züzhe lihizin sokebin hyu. 6Au nme le züri nyeki sokebin tsanggen logü ka shünshü, “Ndunkethyü hidan thyüpen-o a-keni ti nrün le di gwünkho ki mon?”
7Tsanggelogü le benhvu shwe pe tsangki shüo Rhünkehü Sunggigü zan nyu keswe thyüshü. Ale a-le kezo nyülo, “Tsüle chenshen-o ponha ti. Sunggigü temi nchünndyü kethyü le pen kela ka, tha hidan aphu thyüpen loti.”
8Ale a-le kezo nyü, ai ale tsü shalomvu. Tsügenyu ale shünshü, “Ai, kedagü, dihontse hidan aphu a-keni thyü mon?”
9A-le zoni, “Nle gunla gwen, Daniel, kechamvule a-kenigü le ryükemvuthen jo hidan kebu pe bin nju mvulo keshvu genyu. 10Temi kechon le thyü nshün loti. Serikemvu dan le shaloho, ai serimvu sin binti; kensü nyu nti le sha loti.
11“Khenyütsen kerüshvu khinkela gwünkho genrho tsüle, kenshvu ketetsin gwünkho jon 1,290 ti. 12Jon 1,335 le penkemvuthen khwen petsü bin kelo nyu le henkegwa nyu.
13“Lo Daniel, joketsin nyu yhun gü kenitilo. Tsüsiki nle silati, ai keni gwünkho ki soryüo nchün hyuloti.”
Currently Selected:
DANIEL 12: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
