DANIEL 10
10
Daniel Le Tigris Züri Khoka Tsemin Kehyu
1(Sairus le Persia Raja thyükelo chenshen ka jolo nme le Belteshazzar letse kehü Daniel ka teshashü. Jo gü le ketsin ai shalo tsen sala. Tsemin ki tsügü kon zope a-zan shü.)
2Tsü gwünkho ka ale hapta kenshen chübin. 3Ale ketyüketsü kegwa nmvue thyü-e tyümvu, zue tsümvu, lo hapta kenshen penla kemvu ka a-pe-e whenmvü.
4Tsü chen shye kerigü jon nki pezi nyü, ale Tigris züri kedagü seka sobin. 5Ale ngiso shü ntsin temi nme le linen phi ben lo suna kenshüntsin senkephin pvü kehü hyu. 6A-min le tsomin ketsen hontse ben. A-mhun le tsangkekechwü hontse ben, lo a-yhütyü le mah kenyü hontse, a-ben lo a-pha le lazo gi shon nshwü kela hontse, lo a-khwen le gin pe temi danda kenra hontse.
7Tsemin tsügü kehyu le a nti. A zenkehü dan le thame hyumvu, ai anyugun kerü lao tin gü kebu tinla. 8Ale tsünyu a npvü bin-o ndun kethyü tsemin gü nribin. Akekvu ndila, lo a-joja kelushü lao nme-e a shakeloi thyü mvula. 9Ale a-khwen nyükelo ka, kazünyu chetsügü thame shamvuo amhun lope kazü rün tinla. 10Tsüselo temi ben nme le asüso shüla; ai ale ndün bin.
11Tsanggelo gü le aka zo, “Daniel, Sunggigü le nsohü nyo. Solo njüo ale nka zo titse kebin gü nyü petsü shülo. A nipe nki shü bin nle.” A-le tsü zoshü ntsin, ale solo, ai ndün bin zun.
12Tson-o a-le zoshü, “Daniel, nshvunya. Nle tha shakekho lo titseo nthyü ketsenyo-o kehi thyü keso nyü nyu Sunggigü le nkehi khwen nyü laso. Nkehi kenikeshü nyu ale ryübin nle. 13Persia nyu rajaphen kekhwen jolo gü le jon nkinme akhinla. Tsüselo Tsanggelonyu so kedanyu nme, Michael le acheshü ti tse ryü, kechamvule Persia nyu a-npvü kela genyu. 14Hisiki ntemi dan ka nyu thyüla tiyo nno shalo nrün genyu ale ryüle. Hile hisiki genyu tsemin kehyu.”
15A-le tsü zokeshü ka, ale kazü nyu nrio thame zolomvula. 16Tsüka tsanggelogü, temi hontse kethyü gü tsüle a-ben ketape amüntse kesüshü. Ale a-ka zo, “Kedagü, tsemin higü genyu ale kvumvurilao ndün bin gwenzinla sele. 17Ale gonyu le a-kedanyu mhundyü sokebin hontsela sele. Ale dihontse n nthon lo semon? Kekvu nmvue keheteshe le agen ndi sele.”
18Gwengwa a-le a-kesünishüo ale kvuketsinlo. 19A-le zoshü, “Sunggigü le nsohünyo, tsügenyu tha nme-e no n thyü pe nyunkenjün thyü nmvue n kerüla nya.”
A-le tsü zokeshüka, ale kvuketsinlo-o a-ka zo, “Kedagü, nle nyu zo tiyo zoshülo. Nle athyü kesherhün kvu shü laso.”
20-21A-le zo, “Ale nyugenyu nki ryüyo nle shabin mon? Tsü le ketsin lesü nyu thu kenjü pe nhishü nrün genyu le. Ale rani gü Persia kekhwen zolo gü zen-o kega mvulo shvubin laso. Tsüsika Greece kekhwen jologü le chwiryüti. Israel kekhwen jolo gü Michael nti a-me kecha le akeche ndi.
Currently Selected:
DANIEL 10: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
