APOSTELNYU THO 27

Paul Le Rom Ki Kegun

1Tsüselo agun le run ge Itali nyu kegun rhilo ntsin, mele Paul lo do kechanyu peha-e sin tse pe raja kedagü shüpahünyu dan nyu Julio tsekethyü tsiso kedanyu nme tenyen shüla. 2Tsüselo agun le Asia kazü terhon gun kezhü Adramutium run nme nyu yülo-o zü tson zen-o tsonchü shü. Tsükatsü Thesalonia rünyi nyu Makedonianyu Aristarka ko agun zen hü. 3Tson-o agun le tsüsinyü Sidon tilo; Tsontsin Julio le Paul shwinjün-o a-hoshü-o a-no a-pvü a-shen dan ki gungü rüyülo. 4Tsontsin agun mhundyü zin tsangnbu salo kela genyu agun le tsünyu zü tson zen-o Kupra pha kipon rhon gunryüla. 5Tsontsin Kilikia lo Pamfulia au mhundyü kipon kebin züda gü pvüthü sen-o Lukia kazü nyu Mura letse kethyü rünyi nme nyu gunryüla. 6Lo tsünyu tsü tsiso kedagü le Itali nyu gunkezhü Alekendrianyu run nme hyulo-o a-le agun no tsünyu binlo.

7Tson-o agun le nyazhü tse jon kechon ki tsonchü gungü tsensa tseo Knida rünyi tilo. Tsangkenbu genyu tsü tson gü nyu tsonchü sinshülo shvulao agun le run zen-o tin sen tse Kreta pha rhon gungü Salmuna mhundyü ntsen nyu gunlo. 8Tson-o agun le tsensa tse tsükho rhon sen tse run le kenshvu ndio sunlo kehü bin nme nyu ryülo; lo tsükho kenika Lesea rünyi gü tsü le bin.

9Züda nyu njwen lo keshvu gwünkho le ryü kemvuthen, agun le tsünyu binthon sa tinla, tson-o ntsoka we Nyen-o nga kehü Jon tsüe nken la. Tsügenyu Paul le jo hipe anyugun tsontin shü: 10“Hire, temi dan, anyunki kerüchün le nthu gwün ngun kenjwen le nshvusa, lo nke-e sa ti, ngun le tha pvü kehü lo ngun ntimvule, ngun phou-e sin-o nke lati,” tsonshü. 11Ai tsiso kedagü le Paul jo nyeki run kethu kedagü lo run tsünyu npugü au jo tenyen kvula. 12Run kensen bin tsügü nyu tsüle tsangse ka bin kethyü le gwa sari kemvu genyu temi kechon gü le thyülo kegwathen gungü Foniko tilo-o tsangse ka tsünyu bin kelo rüchün-o tsünyu tsonchü shü titse kethyü a-kenyü külo la, Foniko tsüle Kreta nyu run kensen bin nme thyüo yhüko kechwi kipon ntsun-o tesozin-e lo tesinzin-e gunlo kegwa bin nme.

Züda Nyu Tsangkenbu Terhi

13Lo tesinzin kipon tsangnbu dindin gunryü ntsin anyugun kerüchün gü tsü thyülo la sele tseo anyugun run shwü lo-o run thu sen-o Kreta kho rhon gunzhü. 14Ai thonsari kemvu ka tsangkenbu terhi, a-zan le Eurakulon tsekethyü nme le ryüo agun whün lola. 15Tson-o run tsüno tsangkenbu ntsun gun loshvu lo la ntsin, agun run gü tsü hoshülao tsangkenbu no when sen tinla. 16Tsüselo agun le Kaude tsekethyü zükehun kazü keshe nme pha rhon gungü agun yhen thyüo run keshen gü nrhisü sen binlo. 17Tson-o meno tsügü nrhisü sen chwiryülo-o tedo kechon kie thyü run kedagü tsü phin nkolo; lo run when pe Surtis nyu shükela nshvuo meno run phi gü tsü süyhün sen tsenryü lao tsangkenbu no run gü when sen-o gunla la tse bin. 18Lo tsangkenbu no agun when rilo kela genyu tsüsinyü we meno run ge tha pvü kehü dan khipe shwenla latse lola. 19Tson hüo jonshen nyü we meno me ben lope run kanyü tsüe jün pe shwe sola. 20Tson-o yhükoe hyumvu, lo shyenyüe hyumvu thonsa la, tsang-e nbu khe ntimvula ntsin, agun le rhünkelo nme-e tenyen mvula. 21Lo temi dan le tyütsü mvu thonrila kethyü genyu Paul le anyugun dan nyu solo njüo anyugun ka, “Hire, temi dan, hagun le ajo zen-o Kreta nyu run thu sen-o tsonchü shü mvulo gwa nrün; tsonlo kenshvu, nmvue kenke hihontse kethyü hyulo ho atale. 22Ai ntsoka we ajo zen-o hagun nyun pechelo, run nti a-me hagun temi nme-e nkela loho. 23Kechamvule ale a-hon lo ale a-rüshvu kehügü Sunggigü lokethyünyu nme le nje tsüryüo akhoka dun-o aka, 24‘Nshvu nya chi, Paul, nle Kaisar mhundyü nyue gunti,’ tson hü nle. Lo tsüntimvule hire, Sunggigü le ngenyu nzen-o run nyu kehünyu aphu-e no nkela loho letse bin laso. 25Tsügenyu hire, temi dan, hagun nyun peche binlo nye. Sunggigü le aka zokeshü gü tsü thyüpen shü titse kethyü ale tenyen hünyo. 26Ai ngun hoshü pe zükehun kazü nme nyu shüla logwa,” tsonshü.

27Lo Andria züda nyu tsangkenbu no agun when pe lukipon hikipon shü shü tseo jonryü peziche je tsanglu khoka run kethunyu dan le anyugun npvü tin kelo rüchün-o zü kentsun ndoshü ntsin ni nki ndolo. 28Lo nken khe npha gü ndo nishü ntsin ni tseryü pvün nti le kebin hyulo. 29Lo run tsüno gungü züda seki senkelo nshvuo run sikipon tegi thün pezi dyüsen pe shweshüo, tsangben kelo nrin keho thyü bin. 30Lo run kethunyu dan le anyugun npvü tinkela rüchün-o tegi thün dyü pe run mhundyü keshü rothyüo run keshegü khipe züda nyu shwenshü la. 31Tsüselo Paul le tsiso kedagü ka, “Temi hidan le run nyu bin kemvu we hagun le rhün keloi kemvu le.” 32Tsonshü ntsin shüpahünyu dan le sogü run keshen gü kesenron duthü shüo no züda nyu chetsüla.

33Tson-o tsangben chwiryü zhü ntsin Paul le temi aphu no tyütsü külo lotseo, “Hagun le tyütsümvu kela le nthu jonryü peziche thyü laso. 34Tsügenyu hagun le ajo zen-o tyütsülo; tsonlo yatselo hagun le rhün loti; kechamvule hagun temi nme pe shüntsü nme-e nkela loho kethyü genyu.” 35Lo a-le tson zoshüo tensü khisen-o temi aphu mhundyü nyu Sunggigü shwen shü; tson-o tyü tinla. 36Tsüselo anyugun aphu anyugun nyun peche külo-o tyütsü kü tinla. 37Lo agun run nyu kehünyu aphu kesin le temi tsihvuo hentsenyü-o tsero. 38Tson-o anyugun le tyütsü salo ntsin anyugun thoe khipe züda nyu shwen shülao run khvü kenshen lo.

Run Le Gwamvu Kela

39Tson-o tsangben chwiryülo ntsin agun le kazü tsügü shalo mvula. Ai agun le a-se lizin hizin züjen hyushüo agun run gü tsü khun pe tsünyu shü logwa tile mvuyo tsekethyü kenthon. 40Lo anyugun le tegi thün kedyü tsü duthü pe züda nyu shülao run sükezelo kehü kanyü dan shwü shü, tson-o run mhundyü zin phikeden gü sen kügü den shüo run no kazü kesin kipon gunlo. 41Ai anyugun le tin sen-o züda kenren nme nyu gunlao run no dyükenbe nyu jenphün pvülo la. Tson-o run mün keri kipon nnun mvutse bin tinla ntsin zükentyü gwakemvu genyu run si kipon bose bore küla.

42Tsüselo shüpahünyu dan le do dan le züvüo tinkela nshvuo tsüdan dushvu kela rüchün so. 43Ai tsiso kedagü le Paul kenilo nyüo tsüdan khinla; tson-o a-le zü vü keshanyu no zünyu tsü when tsenlo-o kesin ki chwilo lotse, lo kechanyu no san pon ge, lo peha no run ketse ge-e chwilo lotse hukum hoshü. 44Tson-o anyugun aphu kesin ki chwi külo.

Currently Selected:

APOSTELNYU THO 27: REGSBSI

Highlight

Copy