APOSTELNYU THO 26

Paul Le Agripa Mhundyü Jozo Kethyü

1Tsüselo Agripa le Paul ka, “Ntsoka we nle n npvü njo zoshü logwa so.” Tsonshü ntsin, Paul le a-ben shwen pen tse a-npvü a-rüla zo ti tseo:

2“Rajagü Agripa! Hire, Judanyu le a nkhin kethyü jo aphu genyu ale nthu nmhundyü nyu ajvü arüla zo titse so kelo hi ale asherhün sa bin nyo. 3Kechamvule Judanyu dan nyu tejvü le kehü tsü aphu lo kenyi kehü tsü aphu nle shakü kebin genyu. Tsügenyu nle a njünlo nyüo n shesela nyao ajo hi nyüshülo.

4“Ale sokerika nyu Jerusalem nyu lo a npvü atemi dan nyu a ncheka ryüo ntsoka keti arüla tsüle Judanyu aphu shakü bin nyo. 5Lo ale anyugun nyünyü kerü tsingü nyu Farisinyu thyü soryü kethyü anyugun le anyugun npvü tsü jün kezo fünyü yatselo, anyugun le arüla we sha keti bin nyo. 6Lo ale ntsoka Sunggigü le n pepvünyu ka zo kenjü sidyü gü genyu hagun no ntsoka aketso kebin gwünzin. 7Sunggigü le zo kenjü tsü hyukelo rüchün-o anyugun tsipwen tseryü kenyhunche dan tsüle khenyütse, keben kezün, anyugun yhenthyüo Sunggigü lothyü hünyo, lo hire, rajagü, sidyü tsügü tsü genyu Judanyu le nmhundyü nyu age kenyon kebin gwünzin le. 8Sunggigü le kesinyu thyü nrhünlo yatselo, hagun le nyu tsethyüo tsügü tsü tenyenlo nrün ndi le tsekethyü rüchün hü nla?

9“Nduka ako Nazaret Jisu zan tsügü shwinyü kemvu tho kechon thyü hüe tsüle njü letse kethyü rüchün sole. 10Lo ale tsüdan tsüle Jerusalem nyue thyüshwi so; lo ale peshükeda ju ka ahza hyulo-o kenshün nyu dan kechon ki ten pe doka nyu khin, lo anyugun dushvu kethyü ka-e ako akendo letse kethyü zoshü. 11Tsüntimvule ale khenyütsen sinagog ka nyu yügü anyugun nthyü nnyü lo anyugun no Jisu nkhin titse kethyü ayhen thyü soryü; lo ale anyugun shwi pe akenyümvu sao gungü me rünyi ki-e anyugun nshwen nyhün sa tsehü.

Paul Le A-nyunkelukelo Rüla Kezo

(Apo 9:1-19; 22:6-16)

12“Tson-o ale peshükeda ju ka anyugun jo lo hukum hyulo njüo Damaska nyu gun. 13Lo tsükatsü hire, rajagü, khenyüme nhenyu lvu ka tsü tsangge keben nme le yhüko nyeki-e benkvu kethyü nme le tsüryü, lo tsüle a lo azen kehünyu dan aphu gwün pe benchvü kelo tsü hyulo, lo tsükatsü agun aphu kazü nyu chekü tsüla ntsin, 14Ibrinyu khwen ki aka, ‘Hire, Saul, Saul! Nle nyuthyüo a nshwen hü nla? Nle thora kesü san gü nsü titse kethyü tsüle tsen sa tile nye,’ tson kethyü kezo khwen tsü ale shalo. 15Tsontsin ale a-ka, ‘Nle segü la, Npugü?’ tson-o ketsoshü. Lo Npugü le, ‘Ale nle nshwen kehü gü Jisu tsüle. 16Ai nle solo,kechamvule ale gunryüo ntesha keshü le ale nno nduka tha hyukelo dan-e lo hisiki ale tha zope nhishü nrün dan-e zoshwishü lo jo tsü sen-o me senkethyü nme thyülo nrün genyu gunryüo ntesha shü bin nle. 17Lo ale Israel nyu temi dan nyue lo Juda kemvunyu dan nyue nkenilo ti. 18Lo ale Juda kemvunyu no kezün nyu ketu sen-o keben nyu chwiryülo nrün, lo satan kekvu nyu Sunggigü kipon chwilo nrün, lo anyugun no anyugun kemu jülo nrün genyu, lo a-tenyenlo-o nshünlo kela nyue sin zen-o kenya hyulo nrün genyu anyugun yhütyü thyü nben shülo tseo ale n nipe anyugun ka shüti.’

Paul Le A-npvü A-rüla Kezo

19“Tsügenyu hire, rajagü Agripa, ale tsangge tha shakelo tsü zen mvula hümvu le. 20Tsonkethyü gü mvule ale tha tsüdan rüla zope Damaska nyu kebin nyu teshashü teri, lo tsüsika Jerusalem nyu kebin nyu, lo Judia nyu kebin nyu aphu ka zo sinshü; lo tsüntimvule Juda kemvunyu no a-nyunkelulo-o Sunggigü denzin gunryülo nrün genyu ale tsüdan rüla zo sin pe anyugun hishü so. 21Tsügü tsü genyu Judanyu dan le atenlo njüo adushvula titse kethyü anyugun yhenthyü kebin gwünzin le. 22Tsonkethyü nyu tsüe Sunggigü le anopen kelo genyu ale nthu hi-e so-o keshanyu ka-e sidyükeshanyu lo Mosa nyugun le anyugun keyhun siki thyü kehü dan kezo nyeki jo kecha nme-e zo-o tsüdan jünzo shwi mvu. 23Lo tsügü tsü le Khrista le kenjünthyü mvulo keshvu, lo a-le kesinyu dan nyu rhünniso kelo kerigü thyüo a-npvü a-temi dan lo Juda kemvunyu ka-e jolokegwa keben gü pe teshashü mvulo keshvu jo le.”

24Lo Paul le a-npvü a-rüla zoshü ntsin, Festa le nra sen-o a-yhenthyüo, “Hire, Paul, nle nnu bin laso! Nle lesü swü chonri kethyü genyu nnu bin laso!” tson sola.

25Ai Paul le, “Hire, kegwa tsingü Festa, ale nnu mvu; tsonkethyü gü mvule ale joketsin lo kentsen nyu jozo bin nyo. 26Lo raja güe jo hidan hi shabin ti, ale a-ka akethüla mvutse zo bin nyo; tsüntimvule jo hidan hile a-le shakemvu jo nme-e kemvu letse kethyü ale rüchün tsentsü bin nyo; kechamvule tha hidan hi me kendi bin ki thyü kemvu genyu. 27Hire, raja gü Agripa, nle sidyükeshanyu jo tenyen hü nmon? Nle tenyen kehü ale sha laso!”

28Tsontsin Agripa le Paul ka, “Nle lonitse ano khristian thyü tinla titse kethyü ndo bin nle?”

29Tsüselo Paul le, “Nne metse lo tsen metse, n npvü mvule nthu ajo nyü kebin hidan aphu-e no ale dothyü kebin gü hihontse mvuo a-hontse thyü külo lotse kethyü ale Sunggigü ka akapu rüshvu bin nyo!”

30Tsontsin raja tsügü lo rünyi tsünyu ahng gü lo Bernice lo anyugun zen kebin nyu dan-e tse, anyugun npvü kecha nme ki gungü kenthon-o, 31“Temi higü le sila lo kegwa nmvue meno a-phin kezü tho nme-e thyü mvule.” 32Tsontsin Agripa le Festa ka, “Temi higü hile Kaisar ki apil thyüni kemvu we le a-hoshü la-e gwa le,” tsonshü.

Currently Selected:

APOSTELNYU THO 26: REGSBSI

Highlight

Copy