APOSTELNYU THO 25

Paul Le Kaisar Ki Apil Kethyü

1Lo Festa le tsünyu gunryülo-o jonshen si nyü Kaisaria nyu Jerusalem ki nsin. 2Tsontsin peshükeda ju lo pelü ju le gungü Paul ge jokera kethyü rüla pe a-ka zoshü. 3Lo tsükatsü anyugun le a-no anyugun njün shüo Paul ko pe Jerusalem nyu shü shülo tse zoshü.; tson-o anyugun le tsonne nyu a-boshvu kela rüchün bin. 4Tson-e Festa le, “Kaisaria nyu Paul khin njü, lo a-ko thon sarimvu tse tsünyu nshye titse kethyü zola. 5Tsügenyu temi tsügü le kemu peha thyüla yatselo; hagun dan nyu kekvu kebin nyu no a-zen nshyegü, tsünyu no a-ge kenyonlo nye,” tson.

6Tson-o a-le jonryü sinkhe anyugun zen bin hüo Kaisaria nyu nshyela; lo tsüsi nyü jokekera bin ge binlo-o Paul zen ryülo tse ahza hoshü. 7Tson-o Paul le nshyeryü ntsin Jerusalem nyu kebin Judanyu dan le ryüo a-hunpvülo-o a-kemvu jokerü kechonki zope a-nmu so; ai anyugun jo nyu tsü rüla zoshü lomvu la. 8Tsükatsü Paul le a-npvü a-rüla zo-o, “Ale Judanyu jvü gü, nmvue anyugun Kershvuka, nmvue Kaisar-e shwinyü kemvu tho nme-e thyü shwimvu.”

9Ai Festa le Judanyu dan ka teshwen pvülo nyüo, Paul ka, “Nle Jerusalem nyu nsin-o meno a mhundyü nyu tha hidan hi ketso ti mon?”

10Ai Paul le, “Ale ntsoka-e Kaisar le me jokera kehü bin mhundyü nyu so bin nyo, lo tsünyu tsü ajokera kethyüi. Nko sha tsentsü bin ti, ale Judanyu mhundyü nyu we kemu nme-e thyü mvu. 11Ale tejvü gü gwünrho kela nme thyü yatselo, nmvue ale sila kekü tho nme thyüla yatselo,ano si titse-e nmvu letse mvule; ai a nkhin kebin jo hidan hile ketsinkemvu jo nti genyu, temi nme-e akhipe anyugun ben nyu shülo nrün ndi. Ale Kaisar ki apil thyü niti.”

12Lo Festa le a-pelü ju zen-o kejo rhünlo-o, “Nle Kaisar ki apil thyüni titse bin laso; tsügenyu nle Kaisar ki gunlo mvulo shvu.”

Festa Le Paul Rüla Pe Agripa Ka Kezo

13Lo tsühontse hü tseo jon keshanyu sika Rajagü Agripa lo Bernice au le Kaisaria nyu gunryüo Festa tenoshü. 14Tson-o au le jon kethonki tsünyu bin tinla; lo tsükatsü Festa le Paul rüla pe raja tsügü ka zo titseo, 15“Felika le temi nme khipe a-no hinyu dothyü bin nyo; lo ale nsin gü Jerusalem nyukebin ka peshükeda ju lo Judanyu pelü dan le temi tsügü rüla zo-o ano a-nkhin shülo tseo aka hiso. 16Lo tsükatsü ako anyugun ka, ‘Rom nyu jvü nyu temi nme-e temi nme zen kenyon kebin gü a-zen-o kenyon kebin nyu dan zen-o mhuntsun kehyu-o mele a-ge kenyon kebin genyu a-no a-npvü a-rüla kezo gwünkho nme-e hyulo mvu tseo a-khipe a-ge kenyon kebin nyu ben nyu shükela tsüle tejvü kemvu le,’ tson zoshü. 17Tson-o anyugun le gunryüo hinyu kequenlo ntsin, ale kesedunmvu shü tseo tsüsinyü jokekera bin ge binlo-o, temi tsügü zen ryülo tse ahza hoshü. 18Ai a-ge kenyon kebin dan le ryüo a-hunpvülo ntsin awe le anyugun le a-nmu kethyü jo gwakemvu zope a-nkhin chwiryü ti ado tse bin, tson-e tsühontse khe-e mvu. 19Ai anyugun le anyugun npvü anyugun nyünyü rüla lo Jisu letse kethyü si kela nme, Paul le tsügü le rhün hü zun letse kethyü rüla kezo nme genyu a-ge kenyon kehü nti le. 20Lo ale tha tsüdan rüla tsü ketso kethyü ka, tedo sha ntsenlo mvulao ale a-no nsin gü Jerusalem nyu tha tsüdan rüla ketso tile nyu tsethyütiyo? tson-o a-ketso keshü ka, Paul le rajagü no jo hi kera titseo apil thyüni titse sola. 21Tsügenyu ale a-nipe Kaisar ki shüla kemvu jaka meno a-khipe bin ntselo tse ahza khishü njü le,” tsonshü.

22Tsontsin Agripa le Festa ka, “Ako temi tsügü jo tsü shashü nyüle,” tson.

Lo a-le, “Nle senduki a-jo shalo ti.”

23Lo tsüsinyü Agripa lo Bernice au le au nthyü nzen salo-o yieso kedanyu dan lo rünyi tsünyi pelünyu dan zen-o raja bin nyu yülo ntsin Festa le ahza khishüo meno Paul zen gunryü 24Tsontsin Festa le, “Rajagü Agripa, lo nthu gunryüo nzen-o hinyu kebin temi aphu-e hagun le temi higü hi hyu bin ti, a-genyu Judanyu aphu gunryüo a mhundyü ka kenyonlo laso; tson-o anyugun le Jerusalem nyue lo hinyue a-no rhün sin hü zümvu letse sen külo laso. 25Ai tsükatsü ale shakelo le a-le sila kekü tho nme-e thyümvu, lo a-le rajagü ka apil thyüni titse kela genyu, ako a-nipe tsünyu shüla titse kethyü rüchün bin laso. 26Ai ale a-rüla thu pe aso kedagü ka shüti tsekethyü tha sha ntsenlo mvu bin nyo. Tsügenyu ale a-zen-o hagun mhundyü nyu lo kechon le bin-e raja gü Agripa, nmhundyü nyu gunryü bin nle; kechamvule a-ketso petsülo kethyü siki nyu ale a-rüla tha peha thushülo kegwa hyulo ti ado tsekethyü genyu gwünzin le. 27Dokethyü nyu nishü ti yatselo, mele a-ge kenyon kethyü tha kon nme-e zoshü kemvu le a mhundyü ka a-zümvu kethyü genyu,” tsonshü.

Currently Selected:

APOSTELNYU THO 25: REGSBSI

Highlight

Copy