APOSTELNYU THO 24
24
Judanyu Le Paul Nmu Kethyü
1Lo jon pvün siki peshükedagü Anania le pelü ju peha lo Tertula tsekethyü ukilnyu nme tse zen nshyeryüo ahng gü mhundyü nyu Paul shwinyükemvu jozo sola. 2Lo Paul ko zen ryü ntsin, Tertula le Paul nkhin titseo:
“Hire, kegwa tsingü Felika! Agun le ngenyu yhun bwen kebin gwünzin le. Nkesha kegwa genyu tejvü gwakemvue thyü pe gwasalo laso. 3Agun rünyi aphu ka tha tsühontse kethyü genyu agun le agun sherhün sa bin hünyo. 4Ai ano nkevü rila mvu nrün genyu nle agun njünlo agun jo keshanyu nyüshü ta. 5Temi higü hile me kevü keben sari kethyü, lo kazü aphu nyu Judanyu dan nyu n rajagü shwirüchün kehü lo Nazaretnyu dan nyu me nsü nshvu kehü nme tsekethyü agun le shalo laso. 6Tsüntimvule a-le agun Kershvuka-e bo nrhula titse so; ai agun le a-tenlo laso. Tsügenyu agun le agun jvü ka a-jün kera nyü bin nyo. 7Ai yie so kedagü Lusia le nshyeryüo agun ronkemvu thyüo agun ben nyu a-zenlo la. 8Lo a-nmu kehünyu no nkigunryü lotse ahza khishü laso. Nko a-ketso petsü sashü yatselo, agun le nyu genyu a-nmu hü yo tse kethyü aphu sha külo ti.” 9Tsüselo Judanyu dan ko a-jo pen-o jo tsüle a-ketsin letse zo kü sola.
Paul Le Felika Mhundyü Nyu Jokezo
10Tsüselo ahng gü tsüle Paul no jozo shü lotseo benzü shü, tsontsin Paul le zo-o,
“Nle temi hidan so keda thyü kelo le chen kethon ki thyü bin kelasi genyu ale tsü shalo njüo a-sherhün-o nmhundyü ka arüla zoshü titse bin nyo. 11Nko shalo ti, ale rüshvu titseo Jerusalem nyu kensin le jonryü kenyhun nyeki sinmvu zun. 12Lo tsü jaka ale Kershvuka nyu-e lo sinagog nyue nmvue rünyi nyue temi nme-e zen kenyi hü nmvue temi gwünkevü hüo meno ahyulo mvule. 13Lo ntsoka akemvu zope anmu kebin hile anyugun temi nme-e zoshwi keshüi ndi. 14Ai anyugun le ale thyüzü letse kethyü tsüle kenikelo tsongü zen-o agun pepvünyu le Sunggigü rüshvu kehü, jo higü hi sen-o nka zomvulo nrün ndi; tson yatse-e tejvü nyu kehünyu lo sidyükeshanyu lesü nyu thu kenjü tenyen küo. 15Sunggigü kipon sidyü nme le bin letse kethyü temi hidan hi hontseo ako tsü rüchün hünyo. Tsü gü tsü le kenshün nyu metse lo nshün kemvunyu metse rhünni keso nme we bin ti. 16Tsügenyu Sunggigü kipon-e lo temi kipon-e nnyun no nzhülo nrün genyu ako ayhen thyüzin gunryü laso.
17Lo chenhvu chenshen tsünyu bin mvula njüo mele tha khipe atemi dan ketsü lo a npvü agenyu-e kershvu thyü nrün dan sen-o Jerusalem nyu nsin. 18Lo tsükatsü mele ale Kershvuka nyu athyü nshün keloe hyulo; ai tsükatsü le temi kechon ki-e hümvu, nmvue kevü kethyüe ndi. 19Ai Asia ki Judanyu dan me le gunryü bin; temi tsüdan tsü le age tha zo ti yatselo, nmvue ale pelü ju mhundyü nyu kebin ka ale, 20kesinyu le rhünni keso rüla kezo genyu hagun mhundyü nyu nthu aketso bin tse kethyü, 21lo ale anyugun dan nyu bin-o nra sen keshü ajo tsügenyu kemvu we akemu kecha le bin yatselo temi hidan no anyugun npvü zolo nye,” tsonshü.
22Ai Felika le Kenikelo Tson gü rüla sha dinlo njüo, hisikinyu kera titseo anyugun ka, “Lusia yie so kedagü le nshyeryü yatselo ale hagun jokera ti.” 23Tsonlao a-le tsiso kedagü no a-khipe bin ntselo tse zoshü, ai a-no do kechanyu hontse mvuo a-pvü a-shen dan-e no a-che lo a-lo thyü kemvu thyüla nyalo tse anyugun ka zoshü.
Felika Lo Drusila Au Mhundyü Nyu Paul Jo
24Ai Jon keshanyu sika Felika le a-nu Drusila Judanyu lü tsügi zen-o nshyeryü; tson-o Paul koshüo a-ka, Khrista Jisu ketenyen rüla nyü. 25Tsükatsü Paul le Kenshün lo n npvü n kekhenilo mvulo keshvu lo hisiki Sunggigü le nketso nrün rüla dan tsin tsentsü pe a-zenshü ntsin Felika le nshvu rilo lao, “Nle nthu gwün le tin tselo, ale akerüyü gwünkho hyulo yatselo nko nishü ti.” 26Tsüntimvule a-le Paul no raka-e pe a-tsü nrün hontseo a-ko whü shüshü tseo a-nthon thon tse zin hü.
27Tson hüo chenhvu thyüla ntsin Porkia Festa tsüle gunryüo Felika sun thyülo la; ai Felika le Judanyu kenyü thyü nyüo Paul khipe doka nyu shüni la.
Currently Selected:
APOSTELNYU THO 24: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
