2 TIMOTHI 1
1
Kelukeshü
1Khrista Jisu nyu kerhün hyulo nrün lope bin kenjü gü pe jünzo lotseo Sunggigü kendo nyu Khrista Jisu kipon apostel thyülo kela gü Paul le khipe anyugü asogü Timothi tsü shü.
2Sunggigü Pvügü lo Npu Khrista Jisu kipon shwikenjün, keso lo nyun kebwen gü no n ge bin kelo gü thyülo.
Chenkeno Lo Thukeyhun Keshü
3Ale anyun tsentsü tseo abon nyu ju hontse ale a-lothyü kebin gü Sunggigü shwen bin hünyo. Tson-o kheje ki-e nhenyue akehi kethyü aphu nyu nrüchün-o A-shwen bin hünyo. 4Lo ale n yhüphu keche tsü rüchünlo yatselo nhyu shüo ashekerhün thyülo nyüho bin hünyo. 5Nle nnyun ketsin thyü tenyen kehü ale rüchün bin nyo. Ketenyen tsügü tsü le nshü Lois lo njvü Eunis au nyun ka bin, lo tsüle nnyun ka-e bin tsekethyü ale sha tsentsü bin nyo. 6Tsügenyu ale aben shwe pe nge keshü ka Sunggigü le jochü pe n ketsü gü tsüno nben binlo lotse ale nka zonishü bin nyo. 7Kechamvule Sunggigü le nshvu kehü Kapu khipe ngun tsüshü mvu, ai kekvu lo keso lo n npvü n kekheni kehü Kapu khipe ntsüshü kela genyu.
8Tsügenyu nle n Npugü jünkezo nyue lo ale dothyü kehü gü genyue kejola nyao Sunggigü kekvu nyu jolokegwa gü nyu kenjün kethyü nyu kechelo. 9Ngun tho kegwa genyue mvu, ai a-npvü rhipe binkenjü lo a-shwikenjün nyu a-le ngun kenilo la, lo nko pe a-temi thyülo laso. 10Lo ntsoka we n kenikelo gü Khrista Jisu le ryüo me yhühyu thyü laso; a-le kesi thyü pe a-keni thyülao jolokegwa genyu rhünlo nrün zoshwi pe me hishü laso. 11Jolokegwa higü genyu akejü pe ano jün kezo lo apostel lo senkethyünyu nme thyülo laso. 12Tsügenyu ale kenjün kethyü hidan-e hyulo kehü gwünzin le, tson-e ale kejola mvule; kechamvule ale tenyen kehü gü ale tsügü sha hünyo, lo ale tha pe a-tenyen kelagü a-le tsügü ntsen bin-o tsangkeben jon kedagü tilo gwa tsekethyü ale sha tsentsü bin nyo. 13Ale nsenthyü keshü ketsin jo dan tsü lope nle then nrün genyu nmhundyü nyu tsinhi gü hontse lo, lo Khrista Jisu nyu ngun hon thyülo kela ketenyen lo keso gü nyu yhunlo. 14Tha kegwa khipe n tenyen shü kela gü n gun nyun nyu bin kehü Kenshün Kapu gü nyu tsü ntsen kegwa thyü sen binlo.
15Asia nyu kebin nyu le akhe kü kela tsü nle shabin nyo, tsüdan dan nyu Fugilo lo Hermogini au ko sin le. 16Npugü no shwikenjün khipe Onesifora kaminyu ketsü gü thyülo ta; kechamvule a-le gwün kechon ki-e ryüo anyun thyü nbwen shü lo tegiron pe aphin sen kehü genyue kejola mvu. 17Ai ale Rom nyu ryü ntsin a fü tserü ryüo ahyulo le. 18A-no jon tsügü nyü Npugü kanyu shwikenjün hyulo nrün Npugü no thyü shü nda no, lo a-le Efesa nyue tha ditsüla ki thyü shü yo nle shabin nyo.
Currently Selected:
2 TIMOTHI 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
