1 TIMOTHI 6
6
1Meno Sunggigü zan lo senkethyü jo zo nshvu mvulo nrün genyu medo thyüo do gunda kekhen hensin kebin nyu aphu a-npu nyu rühvu penlo zü le. 2Lo Khrista nyu dothyü kebin nyu no a-npu nyue a-zen-o tsasikezen nyu laryü tseo rühvu mvu lamvu le anyugun lotho genyu kechwi hyukelo nyue ketenyen nyu lo n kesonyu kethyü genyu nkenyüo lothyü pe gwakvulo nye.
Kenku Senkethyü, Lo Kenya Ketsin
Thatho hidan hi meno thyülo tse zoshülo, lo me senthyü shü nye. 3Temi lihigüe senkethyü jo kecha sen-o me senthyü lo Npugü Jisu Khrista jo ketsin dan lo ketsin senkethyü jo dan zen kerhün kemvu gü le 4a-le thame shamvue ketekho bin hünyo, a-le keshyeluo ketso zükemvu ketso lo kenyi nyü hünyo, tha tsügenyu me shwipe yhü kethyü, kega kethyü, kegezo kethyü, khinyunyu rüchün kenshvu le chwiryü hünyo. 5Tson-o a-nyun nyu tha rüchün tolo hü kemvunyu lo ketsin gü nyu bin mvu kelanyu le ketsin rüchün kethyü hile kechwi kefü genyu letse rüchün tinla hünyo.
6Nle nyu le bin yo tsü sen-o rünyun-o ketsin rüchün hülo kechwi le gon sa bin nyo. 7Kechamvule nle thame khisen-o kazü higü nyu ryü mvu, lo nle kazü higü nyu thame khisen tinlo keho genyu. 8Ai nchvü lo n keben kenya le binlo, lo nle thame rünyun kemvu ndi. 9Ai nnyalo nyü kehünyu le kesemen nyu lo me sen nyu lo kenrun keryü lo nthyü nshvula kehü ketepen kerüsi nyu chela hünyo; tha tsüdan tsüle me chün sen-o kenke kenmhü nyu yüla hünyo. 10Kechamvule pisa ketepen le tha gwakemvu dan aphu bin gü le; hi ketepen genyu temi peha le a-ketenyen gü nyu nmho-o tinla so, lo a-nyun kenjün thyüsa tin laso.
Thukeyhun Keshü
11Ai Sunggigü temi gü, nwe tha hidan nrhilo-o kentsen keseri, ketsin kerüchün, ketenyen, keso, tsekho tsekethyü lo njvükegwa hidan hi fülo nye. 12Ketenyen gü nyu kenren kethyü nyu tsü kenren kegwa thyülo, kethonthen kerhün gü tezen senlo lo tsügenyu nkolo lo nko temi kechon mhundyü nyu zoshwi kegwa thyüshü gunryü laso. 13Kerhünronzin khipe tha aphu tsü keshü gü Sunggigü mhundyü nyu lo Pontius Pilat mhundyü nyu jo kegwa zo-o a-ketenyen gü zoshwi keshü Khrista Jisu yhühyu nyu, ale nka zoshü bin nyo. 14N Npugü Jisu Khrista le nitsüryü kemvuthen ale n tenyen shü kela gü thyü lo zen binlo, tsüno nshün lo meno n nkhin mvu binlo. 15Kechamvule kengvü gü aphu so Kedagü, raja dan Raja gü, lo npu dan Npugü Sunggigü le a-npvü a-gwünkho to ka meno a-hyu ti. 16Sila lo keho gü tsü le a-nti, a-le mele a-kho nnilo keho keben nyu bin hünyo; temi nme-e a-hyu shwi mvu, lo hyulo keho gü a-no kethonthen teshwen lo keda tsin thyü kelo gü thyülo! Amen.
17Kazü higünyu kenya nyu dan no ketekho la nyalo tse lo bin ti le mvu yo sha hü kemvu kenya tenyen bin mvue nno sen-o nsherhün hülo tse tha aphu nho-o khipe ntsü shü kehü gü Sunggigü tenyenlo lotse zoshülo. 18Anyugun no tha kegwa thyülo, tha kegwa kethyü kipon nnya kelogü thyülo, anyugun no nho-o tha khipe me tsünyü ho lo lotse zoshülo. 19Tson-o anyugun no kerhün ketsin gü tezenlo nrün genyu tha kequen pe siki anyugun genyu bin kegwa gü ndolo lo.
20Hikire, Timothi, khipe n tenyen shü kela gü ntsen kegwa thyülo nye; tson-o mele nkuo thakesha jo letse kehünyu chwikeryü kenrunkenryü dan lo keserio kenyikehü dan nrhilo nye. 21Peha le tsü zen hü nle tseo ketenyen rüla denzin gwünzü laso.
Shwikenjün gü no hagun aphu zen bin kelo gü thyülo.
Currently Selected:
1 TIMOTHI 6: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
