2 TIMOTHI 2
2
Khrista Jisu Shüpahü Kegwa
1Tsügenyu anyugü nle Khrista Jisu kanyu shwikenjün gü nyu nko binlo. 2Lo nle temi kechon yhühyu nyu ajo nyü kelo dan, khipe me kechanyue senthyü shülo kegwa tenyenlo kekü nyu ben nyu shüshü nye.
3Nko Khrista Jisu shüpahü kegwa nyu hontseo kengüo kenjün thyü lota. 4Temi nme-e shüpahü tho thyü seren tha kecha thyü pe a-ketekhi sinlo nrün ndi, tsüle kechamvule a-no shüpahü thyü titseo a-zan thu kelogü kenyü thyülo nrün genyu. 5Tsüntimvule temi lihigüe me zen-o kecho kenyhen kethyü nyue tejvü gü then kemvu we kvukelo perün pvülo hümvu. 6Low tsüo hokeli kehü gü le me mhundyü a-rasha hyulo ri mvulo shvu. 7Ajo dan rüchün shü ta, Npugü le a-npvü tha lihi-e shalo kegwa khipe ntsüti.
8Jisu Khrista rüchün binlo; ale jolokegwa pe jün kezo nyu kezo hontse, a-le kesinyu rhünniso laso, lo a-le Israel tsipwen ge gunryü. 9Jolokegwa tsügü genyu ano kemu kethyü nyu hontseo meno tegiron pe adyü sen-o kenjün thyü hihontse kehü gwünzin. Ai Sunggigü jogü we tegiron pe dyüla mvu. 10Tsügenyu kejülo kela dan no Khrista Jisu genyu chwikeryü kenikelo pe kethonthen zankechwi kethyü sin-o hyulo nrün genyu ale tha aphu nyu nyhenhi bin hünyo.
11“Nle a-zen-o si yatselo,
nle a-zen-o rhün loti.
12Nle nyhenhilo hü yatselo,
nle a-zen-o meso gon ti.
Nle a-zan zoshwi mvula yatselo,
a-ko nzan zo mvula ti.
13Nle joketsin zohü mvue,
a-we joketsin zozin bin hünyo,
kechamvule a-we a-jo kelula hü kemvu genyu,” jo higü hile ketsin le.
Tha Thyü Lo Kekünyu
14Nle anyugun no jo higü rüchün nilo, lotse kethyü Npugü mhundyü nyu anyugun rho shülo, kenyi kethyü le gwa kelogü mvule kenyünyu thyü nshvula kehü gwünzin. 15Sunggigü no nle gwa letse lo nrün genyu nyhen thyü salo; tha thyü kehünyu le kejopvü kelai ndi; lo ketsin jo gü kenjün to senlo. 16Lo joja jora nshünkemvu tsü nrhilo; kechamvule tsühontse kethyü then gü ketsin gü rüchün mvu a-shvushvu tsela nrün genyu. 17Lo anyugun senkethyü le me senra kethyü hontsela hünyo; tsüdan nyu Huminia lo Fileta au ko hünyo. 18Au le ketsin gü gwünzüla njüo rhünniso nrün tsüle güla sele tseo peha ketenyen gwen pe shese titse hünyo. 19Ai Sunggigü le a-bin jwen keshü gü we nnu loho, lo tsüge mohor le hihontse,“Npugü le senyu le a-hon yo tsünyu sha bin nyo,” “Temi lihigüe Npugü zan zo kehünyu no nshün kemvu nrhila lo,” tson hü.
20Lo ka keda nme nyu le suna nmvue rakagi pe kethyü thakhin nti le bin mvule tesan lo nnyon lope kethyü khin-e bin hünyo; peha we teshwen pvü, lo peha we kedukeru ka sen hünyo. 21Tsügenyu temi lihigüe a-npvü a-thyü kenshün pe kedukeru kethyü dan tsü nrhilo yatselo, a-thyü pe teshwen kepvü nshünlo kela, Npugü ka nyu sen-o tha thyülo kekü thatho kegwa thyü nrün genyu thakhin nme thyülo ti. 22Tsügenyu nle nselo kenyü dan khelao n nyun nshün-o Npugü ko kehü dan zen-o kentsen, ketenyen, keso lo nyunkebwen hidan thenlo. 23Ai tha rüchün kemvu lo tha ketso zü kemvu ketso kethyü tsü thame thyü nya, tha tsüdan genyu kegalo kehü gwünzin. 24Lo Npugü gonyu le kega hü zümvu, tsonkethyü gü mvule temi aphu ge njvü gwa lo nnyun thon-o me senthyü sha mvulo shvu. 25Sunggigü le anyugun shwinjün shüo anyugun no anyugun nyun kelulo-o gunryü ketsin gü shalo ti ado tse, lo njvü gwao n ntsun kebin nyu kemu tsin pe hishülo. 26Tsonlo yatselo tsü mhundyü satan le anyugun ten pe a-kendo nyu shülo la-e anyugun le tin-o a-sen nrhi chwiryüe logwa.
Currently Selected:
2 TIMOTHI 2: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
