2 KORINTHIANYU 8
8
Khristiannyu Le Thahokeshü
1Apvünyu ju, Sunggigü le Makedonia nyu kehun shwinjün keshü rüla hagun ko no shanyü. 2Mele anyugun nshwen nyhün sao kenjünthyü lo rhokedyü thyü kebin nyue anyugun shekerhün thyü nhosa tse tha hoshü le. 3Lo akesha le anyugun le shülo kegwathen shüshü, lo tsünye kerüche-e anyugun kendo thyüo hoshü le. 4Lo anyugun le agun kengüo kenshün nyu ju kecheshü titseo me shwikenjün lotho higü hi thyü titseo agun thukeyhun sa le. 5Lo tsüle agun le nrin kebin nyeki-e kerüche thyü shüle! Anyugun le a-nyu npvü anyugun khipe Npugü tsüshü, lo tson-o Sunggigü kendo nyu anyugun le anyugun khipe agun-e tsüshü le. 6Tsügenyu agun le himhundyü ki Tita no thyü kebin hontse me shwikenjün tho hinyu hagun dan nyue thyü penshü lotseo a-thukeyhun shü. 7Hagun le tha aphu nyu nnya bin nyo; ketenyen nyue, jokezo nyue, lo thakesha nyue, me kecheshü nyü kethyü nyu, lo hagun le a kesonyu metse nnya bin nyo. Tsügenyu agun le hagun no shwikenjün tho ligü nyue nhoshü nyü bin nyo.
8Ale ahza nme hontse-e khishü bin mvu, ai me kechanyu le me yhen thyü kehü rüla pe hagun hishüo hagun le ditsüki meso ketsin thyü hüyo tsekethyü shalo kenyü genyu le. 9Kechamvule hagun le ngun Npugü Jisu Khrista le me shwikenjün rüla sha bin nyo; tsüle a-le nnya ai hagun phin kerüchün genyu tha kendinyu thyüla; hagun no a-tha kendi genyu nnyalo nrün genyu.
10Lo higü genyu hagun ka zoshü kebin gü le, ndunyeki binzen kelo tho thyü kebin gü tsü ntimvule thyünyü sa tse thyü penla yatselo gwakvu ti. 11Tson-o hagun le thyü nsen kebin gü thyü pen kelo hontse hagun le thyünyü kebin gü thyü gunlo ti. 12Kechamvule hagun le hoshü nyü kethyü gü le bin yatselo, Sunggigü le hagun kendi kon mvule, hagun le nyu hoshü yo tsü lolo ti.
13Lo me kechanyu no rüyülo lo hagun no hagun khvü nsula titseo jo higü hi zobin mvu. 14Ai hagun no ketun kelo rüchün-o, ntsoka hagun le kesükela thyü kebin genyu pe anyugun rhokedyü shweshwishü yatselo anyugun-e khenyüme anyugun kesükela thyükelo nyü hagun shweshwishülo ti, tson-o hagun ketunkü loti tsekethyü kerüchün genyu le. 15Hihontse thu kenjü hontseo, “Kechon hyukelo gü ai rüchelo mvu, lo keshanyu hyukelo güe rhorila mvu.”
Tita Lo A-zenkehü dan
16Ai Sunggigü cheno bin nyo, kechamvule Tita nyun thyü pe no agun hontse hagun phin rüchün a-nyun nkhi kelo genyu. 17Agun le a-ni keshü genyu nti mvule a-le hagun ki gunryü nyüo jo higü le a-npvü a-kendo la le. 18Lo jolokegwa tho genyu kehun aphu ka a-rühvu kehü a-sikezen güe nipe a-sinshü le nye. 19Lo tsüntimvule Npugü zankechwi genyu lo ako lotho thyü nyü hü tsekethyü meno shalo nrün genyu a-tenyenshü kela shwikenjün lotho higü nyu a-zen-o njwenlo tse kehun le a-kejülo-o a-nishü le nye.
20Lo tsügü tsüle agun le thyü kebin thaho keshü lotho higü nyu meno a-rüchün nshvu mvulo nrün genyu. 21Kechamvule Npugü ka kenjü ntimvule temi mhundyü nyue kenjü gü thyü titse agun le rüchün kehü genyu.
22Lo thatho higü ka a-nyun kenkhi thyüo thyüzin kehü apvünyu nme ko pe au sinshü bin nyo, a-le ntsoka we hagun rüchün ngwa sao a-nyun nkhi kvu bin laso. 23Lo Tita we ayi kengü nme thyü hagun lothyü kehünyu nme le, lo a-sikezen kecha hvue kehun le au nishü bin nyo; Khrista zankechwi sen gunryü nrün genyu. 24Tsügenyu hagun le meso kehü lo ale shwe kehü jo tsüle a-ketsin tsekethyü kehun dan mhundyü nyu tsin pe anyugun hishü lo.
Currently Selected:
2 KORINTHIANYU 8: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
