2 KORINTHIANYU 7
7
1Tha hidan hi aphu pe ntsüti tse zope bin kenjü genyu, akesonyu ju, ngun nthyü min lo nkapu nrhu kela dan lihi kae nthyü kenshün lo-o Sunggigü shye kenshvu nyu nthyü kenshün penlo tinu.
Paul Shekerhün
2Hagun nyun khinshye pe agun tsüta; ale temi nme ge ai a-zü kemvu thyüshü shwi mvu, ale temi nme-e thyü nshvu lamvu, ale temi nme hon-e selo lamvu. 3Ale hagun nmu titseo jo hi zobin mvu, kechamvule ale himhundyü zoshü se male, kengüo si-e rhün-e hagun le anyun ka bin hünyo. 4Ale hagun tenyen ngwasa bin hünyo, lo ale hagun genyu ketekho sa hünyo; ale anyun bwenye tse bin hünyo, agun kenjün kethyü aphu nyue ale anyun nyü ho tinla so.
5Kechamvule Makedonia nyu gunryü keloka thyümin le rüyülo mvu shüo likipon hikipon kenjün thyülo le; tegwen kipon me zen-o kega lo nnyun ki we nshvu tse hü le. 6Ai nyungwamvu kebin nyu ju nyun thyü nbwen kehü gü Sunggigü le Tita no gunkeryü genyu agun nyun bwen lo. 7Lo a-le keryü genyu nti mvule a-le hagun ka a-nyun bwenkelo jo genyue le, kechamvule hagun le a nnyü bin tsekethyü, agun rüla rüchün-o hagun nyun gwamvu kethyü, lo hagun le agenyu hagun yhenthyü kebin rüla aka zo keshü genyu; akenyü kenye sinkvu laso.
8Alesü genyu hagun no hagun nyun gwamvula hüe ale tsügenyu we rünyun mvu lamvu, ale rünyu mvulae, kechamvule lesü tsügü genyu hagun le hagun nyun gwamvulae tsüle keshanyu jaka nti genyu. 9Hagun nyun thyü nshvu kethyü genyu mvule hagun nyun gwakemvu tsügü nyu hagun nyunkelu kelo genyu ale ntsoka we asherhün bin nyo, kechamvule Sunggigü kendo hontse hagun nyun gwamvu kelo genyu. Tsügenyu hagun le agenyu thame kae nkela mvule. 10Kechamvule Sunggigü kendo nyu nyun gwakemvu le nnyun kelulo-o kenikelo kipon gülo hünyo, tsügenyu rünyun mvula hü mvule, kazü gü kendo nyu nyun gwakemvu genyu kesi hyulo hünyo. 11Hagun nyun nyu ditsülaki nyun nkhi hüyo Sunggigü kendo nyu nyun gwakemvu kethyü gü le khishü; hagun npvü tsügü nyu nshünlo nyü pe ditsüki thyü yo, lo hagun nyun nta pe ditsüki thyüyo, ditsüki thyü nshvu yo, ditsüki thyü me nnyü yo, ditsüki thyü hagun yhen thyü yo, ditsüki thyüshaja thyü yo, lo hagun le tha tsüdan nyu konme kae mu mvu tsekethyü meno sha laso.
12Tsügenyu ale himhundyü ki tsühontse kethyü thushü kela le thu shü laso, ale tsühontse thu keshü le thyüzü kelagü genyue mvu; nmvue mele a-ge thyüzü kela gü genyu-e mvu; tsonkethyü gü mvule Sunggigü mhundyü nyu hagun le ditsülaki a-genyu yhenthyü hüyo shalo kenyü genyu le. 13Tsügenyu anyun bwen laso.
Tsüntimvule Tita le a-kenyü kethyü gü genyu agun kenyü kenye laso; kechamvule hagun aphu a-che keshü genyu a-no a-nyun bwenye kela genyu! 14Lo ale himhundyü ki a-ka hagun shwe kehü tsü genyu ano kejopvüla mvu; ale a-zintse hagun ka joketsin zohü nyo. Tsühontse ale hagun shwe kehü tsüle a-ketsin tsekethyü Tita le sha laso. 15Lo hagun le aphu a-jo zenkelo, lo hagun le nshvu pe nsü ndün-o a-zen kelo rüchün-o ako hagun so kenye sa laso. 16Ale hagun tenyen ngwalo kela genyu asherhün sa laso.
Currently Selected:
2 KORINTHIANYU 7: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
