2 KORINTHIANYU 9
9
Ketenyennyu Le Kechekethyü
1Lo kenshünnyu dan le kekeche rüla we ale thushü mvue gwa. 2Kechamvule hagun ko keche nyü bin kethyü tsü ale sha kebin genyu. Lo hagun Akayanyu le chenme mhundyü ndo senbinla sele tse kethyü rüla tsü Makedonia nyu mhundyü nyu hagun zope amhun thyü hü. Lo hagun shekerhün tsügü genyu anyugun temi kechon no a-nyun pe shü soryüla le. 3Ai ale npvünyu ju nikeshü le hagun genyu amhun thyü kehü jo dan no jo higü nyu a-kenrun thyüla mvu nrün genyu le, kechamvule hagun no ndo binlo lotse ale zokeshü hontse hagun no ndo binlo kenyü genyu le. 4Tsonmvuo Makedonianyu temi peha le azen gunryüo hagun le ndo sen bin kemvu hyulo yatselo; hagun tenyen ngwasa tse hüo, hagun nti mvule ako no kejapfü loti. 5Tsügenyu akerüchün le apvünyu ju no amhundyü rio hagun ki gunryü mvulo shvu ti ado tse rüchün, lo hagun le himhundyü ki zoshwishü kenjü dan tsü ndonron sen bin-o thyülo tsekethyü genyu mvule hagun nyun nyu shünyüo shülo nrün genyu le.
6Hagun hi rüchünlo, ligühigüe ntsi kerho pe gwünshülo kerho gvülo ti, lo ntsi kechon pe gwünshülo kechon gvü loti. 7Temi ligühigüe no kenyon kenyü, nmvue thyü mvulo shvu tse nyao, a-npvü a-nyun nyu rhikelo hontse hoshülo; kechamvule Sunggigü le a-kenyüo hoshü kehünyu so kehü genyu. 8Lo Sunggigü le hagun shwinjün-o tha lihi-e pe hagun kesükela thyüshü logwa, tson-o hagun no tha seni nyu hagun kesü thyüo thatho kegwa lihie thyüsa shü loti. 9Tsü rüla hihontse thu njü,
“A-le nhosa pe kendinyu tsüshü;
a-keso le kethonthen bin ti.” 10Lo ntsi khipe ntsi kegwün gü tsüshü kehügü lo ketyüketsü khishü kehü gü le hagun le tha hyulo kehü tson dan thyü nchon shü ti, tson-o hagun no kentsen keseri gvüsa loti. 11Lo a-le hagun no a-zintse nho sa tseo tha khipe me tsülo nrün genyu lihie khipe hagun tsüsa shüti, tson-o hagun no tha khipe agun ben nyu shüo agun no sen gungü me ketsü genyu mele Sunggigü shwe ti. 12Kechamvule lotho higü thyü keshü le kenshünyu dan rhokedyü gwünkhin keshü ntimvule tsügenyu temi no Sunggigü shwen kenye salo kehü genyu. 13Hagun le jolokegwa tenyen lo zen kehü hagun tho higü sen keryü genyu, lo hagun le nho sa tseo tha hope anyugun-e lo kechanyue tsü keshü genyu temi kechon le Sunggigü shwe ti. 14Lo hagun ka tha hyukelo dan le Sunggigü le hagun shwinjün sa kehü tsin keshü gü genyu hagun nnyüho tseo hagun genyu kehi thyü ti. 15Rhinhi tilo keho hon kenrun nyu khipe ntsü kehü Sunggigü cheno sale!
Currently Selected:
2 KORINTHIANYU 9: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
