2 KORINTHIANYU 6
6
1Lo a-zen kengü tha thyüo hagun no Sunggigü ka nyu chwikeryü shwikenjün hyulo kela gü tsü pe kenrun nyu thyüla nyalo tse hagun ka hi tenge tse hünyo. 2Sunggigü le nyu zo shüyo nyülo:
“Ale a-gwünkho toka nkhwen
nyülo laso
lo kenikelo tsangkeben jon gü nyu
ale ncheshü laso.” Hire! Gwünkho kegwa tsüle ntsoka hile; kenikelo tsangkeben tsüle ntsoka hile!
3Meno ale lotho kethyü nyu akemu nme-e hyulo mvu nrün genyu, ale tha lihi kae me tson kekhin nme-e thyüshü hümvu. 4Ai ale Sunggigü go thyü kehü hontse, hoshü mvu tenge kethyü nyu, kenjün kethyü nyu, hokeli kethyü nyu, lo thyülo keshvu tsin nyu nyhenhi bin hünyo. 5Me no akevü nyu, do kethyü nyu, kevükeben kethyü nyu, thatho nyu, khwen kebin nyu, lo kenyon keteri nyu-e, 6nshün-o yhun kethyü nyu, thakesha, a-keshathyü tse kethyü nyu, me shwi kenjün nyu, Kenshün Kapugü nyu, ketsin thyüo me keso nyu. 7Joketsin kezo nyu, lo Sunggigü kekvu nyu, a njüzin-e lo ngwazin-e kentsen teri ronye kesen nyu, 8teshwen kepvü nyue lo tetsin kepvü nyu, meno arüla zo nshvu lo zo ngwa kethyü aphu nyu a kekheni hünyo. A lope mesa kehünyu hontse thyü hünyo, ai ale joketsin kezonyu le. 9Me le a no thasha kemvunyu hontse hüe ale thasha sa, lo ale si güzhü kelanyu hontse hüe hire, ale rhün hünyo, a nthyü nnyü sae a boshwe lomvu. 10Mele ano a nyun kenjün thyü sa kehü hontse-e ale anyun nyü zin hünyo, tha kendinyu hontse hüe temi kechon thyü pe no nnyalo hü; thame kendi hontse hüe ale tha aphu bin hünyo.
11O, Korinthianyu ju, ale hagun ka tha zo a kethüla hü mvu, ale anyun khinshye kenmhun pe hagun tsüshü le. 12Ale hagun genyu a nyun khinkhinlo lamvu, ai hagun le agenyu hagun nyun khinkhinlo la kehü gwünzin le. 13Lo ale anyenyu ka kezo hontse hagun ko no ale hagun so kehü hontse hagun no a-keso tsinshü nrün genyu hagun nyun khinshye kenmhun shülo.
Rhün Kehügü Sunggigü Kershvuka
14Tenyen hü kemvunyu zen-o ketun mvu tse hagun gunda kekhen kerhün nya. Kechamvule kentsen lo serikemvu hvu le dihontse kepvüshen lo gwa tila? Nmvue keben lope kezün hvu tsüle nyu kerhün la? 15Khrista lope Baal hvu le nyu ka kejo rhünlo la? Nmvue ketenyen nyu le tenyen kemvunyu zen-o nyu kerhün hon le bin nla? 16Sunggigü Kershvuka güle teromen kezü zen-o nyu kenthon pe bin njü nla? Kechamvule nle rhün bin kehü Sunggigü Kershvuka le; tsü rüla Sunggigü le zo kenjü le,
“Ale atemi dan nyu yhun-o
anyugun dan nyu bin ti;
lo ale anyugun Sunggigü thyü ti,
lo anyugun no atemi thyü ti.” 17Tsügenyu Npugü le zo hünyo,
“Hagun tsüdan nrhi chwiryüo
hagun kecha thyülo nye.
Lo tha nshün kemvu dan nme-e kesü nya nye,
tsonlo yatselo ale hagun zenlo tile.
18Ale hagun pvügü thyü ti,
lo hagun peche-e tenu-e anyenyu
thyü ti,
Kekvutsin Npugü le tson zo.”
Currently Selected:
2 KORINTHIANYU 6: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
