2 KORINTHIANYU 5
5
1Lo kazü hinyu amin ale anyu yhun kebin phika higü hile nrhola yatse-e ben no thyü kemvu Sunggigü ka nyu hyulo nrün kethonthen bin kehü ka nme le bin laso. 2Ketsin, ale sunlo mvuo tsangge hyulo nrün tsügü pe ahen kelo nnyü ho bin hünyo. 3Lo tson-o ka tsügü khibenlo yatselo ale a kemben kethyü hyu mvula nrün genyu. 4Kechamvule ale phika higü nyu kebin kae sunlo keho thyüo anyun kenkhi thyü bin hünyo, tsügü tsü le higü rho kela rüchün mvule kerhün gü no sila lo kegwa higü hi nyülo lao tsangge hon gü khibenlo nyü bin hünyo. 5Lo higü higenyu ndo nron keshü gü tsüle Sunggigü, lo a-le hasen Kenshün Kapu khipe ntsüla so.
6Tsügenyu ale anyun peche zin bin hünyo. Ale athyü amin ka higü nyu kebin then Npugü zen binlo hü mvu tsekethyü ale sha bin nyo. 7Kechamvule ale hyuo yhun hü mvule tenyen-o yhun kehü genyu. 8Ai ale anyun pecheo yhun kehü le ale amin higü nyu bin mvule Npugü ka ki a-zen bin nyü kvu bin nyo. 9Tsügenyu ale ka higü nyu metse nmvu metse a-kenyü kon thyü titse kethyü ayhen thyü hünyo. 10Kechamvule ngun ligühigüe Khrista le me ketso nrün bin gü mhundyü nyu so kü mvulo keshvu genyu; lo tsükatsü nle nmin higü nyu kebin ka thyü kela dan, kegwae keshvue nchün hyulo ti.
Khrista Genyu Sunggigü Zen Kepvüshen Kelo
11Lo Npugü shye nshvu mvulo keshvu shao ale temi dan ka zo hünyo; lo a kerüchün le hagun ko hagun nyun ki tsügü tsü shabin ado tse tenyen. 12Ale a npvü ajünzo pe hagun hini titse kethyü gü mvu, ai a genyu hagun le ketekho sa zü kethyü le kebin, temi a-nyun nyu mvule tegwen kipon ketekho kehünyu dan ka tha zoni shülo nrün do tsin pe hagun hishü nyü bin nyo. 13Kechamvule ale kelu tinlae tsüle Sunggigü lotho genyu le, nmvue ale ntsen hüe tsüle hagun genyu kegwa le. 14Kechamvule Khrista keso gü le a ntsen sen hü nyo, tson-o temi nme le aphu sunthyüo sila, tsügenyu aphu sila so tsekethyü awe tenyen tsentsülo laso. 15Lo rhün hü kelanyu no yhun-e a-npvü a-genyu mvule a-genyu si-o rhünnilo kelagü genyu yhunlo nrün genyu a-le aphu sun thyü si laso.
16Tsügenyu nle himhundyü ki temi jvü nyu Khrista nmu hüe ntsoka gerho tsühontse sinmvu kela hontse temi jvünyu temi nme-e nmu sin nya gwün. 17Tsügenyu temi ligühigüe Khrista nyu bin kelanyu le, a-le temi keshün nme laso; tha when ju ndi laso; lo hire, tsüdan aphu a-keshün kü laso. 18Lo athyü pe ano Khrista genyu a-zen kengü gwa nilo kela, lo kengü gwani kelo lotho khipe atenyen keshü gü, Sunggigü ka nyu tha aphu chwiryü. 19Lo Sunggigü le Khrista nyu bin-o kazü gü thyü pe anyugun no a-zen kengü gwanilo laso; tson-o mele a-mhundyü nyu thyüzü njüe me nmu mvu laso, lo tson-o kengü gwanilo kela jo gü pe atenyen shü laso.
20Tsügenyu ale Khrista jolonyu thyü hünyo, tson-o Sunggigü le asen-o age me ka zo tenge hünyo. 21Ngun genyu Sunggigü le kemu nme-e sha kemvu gü kentsen gü thyülo nrün genyu.
Currently Selected:
2 KORINTHIANYU 5: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
