2 KORINTHIANYU 4
4
Nnyonla Nyu Kenya Le Kebin
1Tsügenyu, Sunggigü le ashwinjün-o lotho higü hyu kelo genyu ale ashesela hümvu. 2Tsonkethyü mvule ale kekebu tho lo kejokepvü tson dan tsü khela so; ale kekhen kekho-o mesa lo Sunggigü jo kemvu zo hümvu, ketsin gü keben nyu ale Sunggigü yhühyu nyu yhun hü, lo temi ligühigüe no arüla kegwa shalo titse ale ayhen thyü hünyo. 3Lo ale sen-o jünzo kehü jolokegwa gü kebu yatselo, nkela nrün nyu dan mhundyü nyu nti kebula kehü gwünzin. 4Kechamvule Sunggigü hontse kethyü gü Khrista jolokegwa keben gü no me gwün nbenlo nrün genyu, kazü higü terogü le tenyen hü kemvunyu dan yhütyü thyüpo laso. 5Kechamvule ale a npvü arüla zo mvule Khrista Jisu le Npugü letse kethyü jünzo hü, lo a we Jisu genyu hagun gonyu thyüla sele. 6Tson-o, “Keben no kezün gwün nbenlo,” tse nduka kezo gü tsü le Sunggigü. Jisu Khrista mhun ge zankechwi kethyü Sunggigü keben gü khishü nrün genyu a-le anyun gwün nben shü laso.
7Ai kekvu keda tsügü tsüle ahon mvule Sunggigü hon tse meno shalo nrün genyu kenya higü hi pe nnyon no kethyü ala higü nyu bin hünyo. 8Likipon hikipon mele a nthyü nnyü hüe anyun gwamvula hü mvu, anyun gwün kesedun hünyo, ai ashesela hümvu. 9Mele a nshwen nyhün hünyo, ai Sunggigü le akhela hümvu, mele avüshyela hünyo, ai a nkelo hümvu. 10Meno amin ge Jisu le rhün hü kela shalo nrün genyu ale amin ge Jisu sigü khipvü zin hünyo. 11Kechamvule meno sila lo kegwa athyü min ge Jisu le rhün kehü shalo nrün genyu ale akeyhun le a-zintse kenshvu nyu bin hünyo. 12Tsügenyu kesi le age a-tho thyü bin hü, ai kerhün le hagun ge a-tho thyü bin hü.
13Ketsinlesü nyu thu kenjü le, “Ale zo hünyo, kechamvule ale tenyen kehü genyu,” ketenyen kapu tsügü nyu ako zo hünyo, kechamvule ale tenyen kehü genyu. 14Lo Sunggigü Npugü Jisu thyü nrhün kelogü le ako pe Npugü Jisu sin-o thyü nrhün sen gunryüo hagun zen-o a-mhundyü nyu bin sinlo titse kethyü ale tsü shabin nyo. 15Tha hi aphu hagun genyu le, lo tson-o Sunggigü shwikenjün le temi ti chon kenye kelo hontse anyugun le chenkeno kehi thyü pe Sunggigü zankechwi thyü ti.
Ketenyen Nyu Keyhun.
16Tsügenyu ale shesela hümvu, tsonkethyü gü mvule tegwen min higü le ndi güzhü lae anyun ki kebin mingü le khenyütsen a-keshün thyü gwen gwen tse hünyo. 17Kechamvule keshanyu jaka akenjün kethyü keshe gü genyu kethonthen bin kehü zankechwi thyü nrün kensu gü thyü nchon shülo kehü genyu. 18Tsügenyu ale tha hyu kehü ju fü mvule hyu kemvu gü fü hünyo; kechamvule hyu kehü gü we keshanyu jaka gwünzin ti; ai hyu kemvu gü we kethonthen bin nrün genyu.
Currently Selected:
2 KORINTHIANYU 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
