2 KORINTHIANYU 3
3
Jopen Jozen Kelo Keshüngü Godan
1Hile nyü pe ale kemakin bin kela khwen hontse le? Le temi peha le thyü kehü hontse ajün kezo lesü pe hagun tsü nmvue hagun ka hi mvulo shvula? 2Anyun ge thu kenjü temi aphu no swülo kegwa ajün kezo lesü tsüle hagun le. 3Lo hagun le Khrista kanyu gunkeryü lesü ale khipe hagun ketsügü le tsekethyü tsinshü, lo tsügü tsüle lesü kethu zü mvule rhünzin bin kehü Sunggigü kapu lope tso ge mvule hagun nyun ge thulo laso.
4Lo Khrista genyu Sunggigü kipon n ketenyen tsühontse kethyü le bin laso. 5A npvü ale tha lihi-e aka gunkeryü gü thyülo gwa letse kethyü zobin kethyü gü mvu, ale tha lihi-e thyülo kegwagü tsüle Sunggigü kanyu. 6A-le ano jopen jozen kelo keshün gü lotho dan thyülo kegwa pe ako atsü; lo tsügü tsüle thu pe bin kenjü lesü jvü gü nyu mvule Kapu nyu. Kechamvule lesü jvü le me boshvula hü, ai Kapugü we kerhün khishü hünyo.
7Ai tso yhen pe tsüge thu kelo kesi lotho gü a-keben kebin tsü sentinla nrün güe, Mosa mhun keben tsügü tsü genyu Israel nyu nyenyu dan le a-keben nrilo ho kela tsügü tsüe teshwen le bin yatselo, 8tsünyeki Kapu lotho gü we zankechwi thyü kvu mvu ti ole? 9Lo temi nmula kehü lotho nsen gingvü bin yatselo, nthyü ntsenlo kehü lotho gü we tsünyeki-e gingvü tse kvu mvuti ole? 10Ketsin thyü, kekhin gü le gingvü ritsin kela genyu nduka gingvü kehügü le a-kengin ndishü laso. 11Lo ndila nrün güe gingvü tse chwiryü yatselo, ndilo kehogü we tsünyeki gingvü kvu ti.
12Ale a sidyü tsühontse kethyü nme le kebin genyu nshvu mvu tse jozo hünyo. 13Lo Israel nyu dan le keben gü nri bin-e no tinla lo hyumvula kethyü thyü mvu nrün genyu Mosa le phi lope a-mhun sun kelo hontse, a gun we tson hü mvu. 14Ai anyugun nyun rüla so; tsügenyu nthu keti-e kejopen kejozen pe bin kenjü a-whe gü keswü ka a-kesun le bin hünyo, kechamvule Khrista nti le tsü sen tin kela genyu. 15Ele, nthu hi keti Mosa tejvü dan swü keso ka a-kesun tsügü le anyugun nyun ge bin hünyo. 16Tson-e temi le nyun kelu-o Npugü denzin niryülo a-kesun tsügü khila hünyo. 17Lo Npugü tsüle Kapugü; lo lika hikae Npugü Kapu le kebin ka n kekhin ndila hünyo. 18Ai ngun aphu nmhun sun mvuo Npugü zankechwi kethyü gü nrio, nthyü kelu pe zankechwi kethyü Npugü Kapugü nyu tsü keryü nyu thyü kelu pe zankechwi nyu zankechwi kecha gü nyu a-hontselo hünyo.
Currently Selected:
2 KORINTHIANYU 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
