2 KORINTHIANYU 2
2
1Ale hihontse kethyü rüchün bin laso, ale hagun ki rani ryüo hagun no hagun nyun gwamvu kethyü thyüni la mvu ti. 2Kechamvule ale hagun no agenyu hagun nyun gwamvu lao, segü le athyü pe asherhün keshü min le bin nla? Agenyu a-nyun gwamvu kela gü le mvu ole? 3Lo ale kerigü ka tsühontse thu shü le, kechamvule ale hagun ki ryülo ale me genyu akenyülo kezünyu ge anyun gwamvu kela kenshvu genyu le, aketenyen lo akenyü gü tsüle hagun-e aphu tse hagun kenyü tsentsü ti. 4Lo ale kenjün thyü sa lo anyun keyhunkerun lo ayhüpu che sao thu pe hagun ki shü; lo tson kethyü tsüle hagun no hagun nyun gwamvu lati tse mvule ale hagun so sahü tse kethyü hagun no shalo nrün genyu.
Thyüzü Kelagü Kemu Jüshü Lotse Kethyü
5Keshanyu laka hagun ligühigü genyu-e temi peha no nyun gwamvu la yatselo, tsü a-mvule hagun no a-genyu hagun nyun gwamvu laso; ai a-nmu tonri tsinla mvuo a-le hagun nyun thyü kenshvue gwamvu ritsin mvu tse rüchünlo nye. 6Kechamvule hagun temi kechon le shaja pe a-tsü pe tsühontse kela sile tsonla gwün nye. 7A-no a-nyun gwamvu ritsin tinla lo kenshvu genyu hagun a-kemu jüshüo a-nyun thyü nbwenlo yatselo gwakvu ti. 8Tsügenyu ale hagun ka hi kebin gü le hagun le a-soni hü tsekethyü a-no shalo kegwa thyüshülo. 9Higenyu ale himhundyü thu pe hagun ka keshü hagun le tha lihi kae ajo zen hü le mvu yo tsekethyü sha ntsenlo ti tsekethyüe rüchün sin-o thu shüle. 10Hagun le ligühigü kemu jü keshü nyu, ako jüshü hünyo. Lo ale nyu jüshüla yo, lihi-e jüshü kela tsügü tsü le hagun phin kegwa rüchün-o Khrista mhundyü nyu tsü jüshü laso. 11Tson kethyü genyu satan no anyeki gwakvula hümvu, kechamvule ale a-do dan shamvu bin kemvu genyu.
Paul Le Troa Nyu A-nyun Bwemvu Kela
12Lo ale Khrista Jolokegwa zo pe mehi nrün genyu Troa nyu keryü ka Npugü le ano tsünyu lotho thyüshü nrün genyu kakhin khinshye pe atsü kebin hyulo. 13Ai ale tsünyu asikezen gü Tita hyulo mvu kela genyu anyun bwenlo mvula. Tsügenyu ale anyugun khela-o tsonchü sen-o Makedonia ki gunla.
Khrista Genyu Kvukelo
14Ai Jisu Khrista genyu kvulo zin kehü gü, lo lika hikae meno nge a-thakesha rünkegwa rünyü zinlo kehügü Sunggigü cheno le. 15Kechamvule kenilo kela ju dan nyue lo nke bin kelanyu dan nyue ale tharün kegwa Khrista le rope Sunggigü ki shü kebin hontse kethyü genyu. 16Kechamvule nmhen kebin ju genyu we tsüle me rünshvula kehügi tharün gwakemvu nme, lo kenilo kela ju genyu we tsüle kerhün senryü kehü tharün kegwa nme. Lo segü le tha tsühontse kethyü thyülo kü la? 17A gun we temi kechanyu hontseo Sunggigü jo pe a-min kendi thyüla hümvu, ai kechamvule Sunggigü le agun nikeshü genyu, agun nyun ketsin thyüo a-mhundyü nyu Khrista gonyu hontse jozo hünyo.
Currently Selected:
2 KORINTHIANYU 2: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
