2 KORINTHIANYU 1
1
Kelukeshü Lo Chenkeno
1Khrista Jisu Apostel thyü Sunggigü kendo nyu kelagü Paul, lo ngun pvü gü Timothi ayi le thu pe Korint nyu kebin Sunggigü kehun gü lo Akaya nyu kebin Sunggigü temi dan aphu ka shüshü le. 2Npvü Sunggigü lo Npugü Jisu Khrista ka nyu shwikenjün lo nyun kebwen gü no hagun zen bin kelo gü thyülo.
Paul Le Sunggigü Shwe Kethyü
3Ngun Npugü Jisu Khrista a-pvü Sunggigü no kegwa gü thyülo, a-le shwikenjün pvügü lo nyun kebwen aphu a-ka nyu chwiryü kehü Sunggigü. 4A-le akenjün kethyü aphu nyu anyun thyü nbwen shü hünyo, tson-o ako no Sunggigü le anyun thyü nbwen keshü dan sen-o nyun kenjün thyü kebin nyu nyun thyü nbwen shü nrün genyu. 5Kechamvule ale Khrista kenjün kethyü nyu kenjün thyü salo kehü hontse tsühontse Khrista genyu anyun thyü kenbwen-e hyu chonlo kehü genyu. 6Ale kenjün thyülo yatselo, tsüle hagun no hagun nyun bwenlo, lo kenilo nrün genyu, lo ale nyun bwenlo yatselo, tsüle hagun no hagun nyu bwenlo nrün genyu, a kenjün kethyü hontse hagun ko kenjün kethyü nyhenlo yatselo hagun ko shalo ti. 7Ale hagun rüchün ngwa sa bin nyo; kechamvule hagun le kenjün kethyü nyu azen-o kenjün thyü kelo hontse nyun kebwe nyue azen-o hagun nyun bwenlo nrün genyu.
8Lo apvünyu ju, agun le Asia nyu kenjün kethyü hyukelo rüla hagun no shamvu bin nyü mvu, kechamvule agun khvü nsuri tsin pe agun miren pe kerhün-e rüchün mvula le. 9Agun kerüchün le sila lotse bin sele tse kethyü rüchün la. Ai tsüle agun no agun npvü agun tenyen mvule kesinyu thyü nrhünlo kehügü Sunggigü tenyenlo nrün genyu hihontse thyü keshü le. 10Kesikenshvu ketetsin kethyü tsühontse kethyü nyu a-le agun kenishü laso, lo kenilo ti, lo ale a-tenyen kebin güle akeni nishü ti. 11Hagun le hagun kehi nyu agun keche shü, tson-o temi kechon le agun genyu kehi thyü kebin gü tsü kenishü ti, lo Sunggigü le jochü pe atsü shüti, lo a genyu temi kechon le Sunggigü shwe ti.
Paul Le A-kenjwen Kelukela
12Ale akenyü bin kehü le higü hile, ale thyümin thakesha mvu le Sunggigü ka nyu chwikeryü shwikenjün gü sen-o kazü gü mhundyü nyue lo tsünyeki-e hagun mhundyü nyu yhun nshün njü hü tsekethyü anyun le a-npvü a jünzo bin hünyo. 13Kechamvule ale thu pe hagun ketsü le hagun no swülo kegwa lo a-kon shalo kegwa nti a-me kecha ndi; a kerüchün le hagun le sha ntsenlo la se ado tse tenyen bin nyo. 14Hagun le arüla peha sha kebin hontse, Npugü Jisu Khrista jon nyü ale hagun genyu asherhün kehü hontse hagun ko no a genyu hagun sherhünlo nrün genyu.
15Ale hi sha tsentsü kebin genyu, hagun no jochü kon hvu hyu kesinlo nyüo hagun ki gunryü ri nyü so. 16Gunryü hagun shwishüo Makedonia ki gun-o Makedonia nyu rani hagun ki gunryüo hagun no a nipe Judia ki shünyü so. 17Ale hi thyünyü keso ka a nyun thyülo shamvu ado tse hü le? Sunggigü sha kemvunyu hontse a tsügwün rhikeso ka, Ele, nmvu le, tse hü ole? 18Sunggigü le jo ketsin zokehü hontse hagun ka kezo ajo-e Ele, lo nmvu le tse nimvu ketsin. 19Kechamvule Silvana lo Timothi agun le hagun ka a-jün zo kehügü Sunggigü Nyugü Jisu Khrista we Ele, lo nmvu letse hü mvu, ai a-zintse Ele, tse hünyo. 20Kechamvule Sunggigü le zo pe bin kenjü dan aphu a-ka nyu Ele, tse kethyü hyulo kehü genyu. Tsügenyu nle a-genyu Amen tseo Sunggigü zan kechwi thyüshü hünyo. 21Ai Khrista nyu alope hagun kesin-o penso keshü gü tsüle Sunggigü, lo a-le ano jünzo lotse akhikho shü laso. 22A-le a-mohor pe nge vülo laso, hakhin nme hontse a-kapugü khipe nnyun nyu shü pe ntsü laso.
23Ai ale hagun kenjün genyu nthu gwün Korint nyu gunryü nyü mvu kela le, a-ketsin tsekethyü Sunggigü le ajünzo bin nyo. 24Ale hagun ketenyen so ge npu thyü titse mvule hagun no hagun kenyülo nrün genyu hagun keche kehünyu thyü titse kehü gwünzin. Kechamvule hagun le ketenyen nyu nko kebin genyu.
Currently Selected:
2 KORINTHIANYU 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
