1 KORINTHIANYU 16
16
Ketenyennyu dan Keche Genyu Tha Kequen Kethyü
1Lo Kenshün nyu ju genyu tha kequen kethyü rüla. Ale Galatianyu kehun dan no thyülo tse keshü hontse, hagun ai tsühontse thyülo nye. 2Npugü jon keri tsennyü temi ligühigü ai Npugü le khipe a-tsü keshü hontse khishülo kegwa kho khikho kecha thyü binlo; tson-o ale gunkeryü ka tha kequen bin mvu kelo thyülo. 3Tson-o ale gunryülo hagun le temi ligühigü ai tenyen-o kejü keshü nyu ale lesü thupe tsünyu tsüshüo no hagun le tha khikeshü dan sen-o Jerusalem nyu gunti le. 4Lo ako no gunlo gwa nrün hontse yatselo tsüdan no azen-o gunti.
Paul Le Kenjwen Rhikethyü
5Ale Makedonia kazü pvüthü kegun rüchün bin nyo, lo ale Makedonia kazü pvüthü gun gü ti kelo sikinyu hagun ki gunryü tile. 6Tson-o ale gwüngwa hagun zen-o bin ti, tsangse gwünkho aphu hagun zen bin tinla-e shalo ho, lo tson-o ale lika hika njwen kela gü ai akeche, lo anishü nrün genyu. 7Ale ntsoka tsonne nyu hagun zen kehyu shüo tinla nyü mvu; kechamvule Npugü kendo yatselo, ale jon keshanyu hagun zen-o bin gwa kelo rüchün kebin genyu.
8Ai Pentekos jon keti we ale Efesa nyu bin ti. 9Kechamvule lotho thyülo kegwa kakhin kemhun nme khinshye pe atsü bin kela genyu, lo shwikerüchün nyu kechon ai tsü nyu bin.
10Lo Timothi le gunryülo, a-no a-nyun nkhi mvutse hagun zen bin kelo rüchünlo nye; kechamvule a-ko ahontse Npugü lotho thyü kehü genyu. 11Tsügenyu temi nme ai a-nkhin nya, tsonkethyü gü mvule a-no a-nyun bwen-o aki rani gunryülo nrün genyu a-cheshü nye. Kechamvule a-le a-pvünyu ju zen ryü nrün ale khwen bin ti.
12Ai ngun pvügü Apola we, a-no ngun pvünyu kechanyu ju zen-o hagun ki ryülo tse ale a-ka zo tenge shü le, ai a-le hizonka ryü kethyü le a-kendo mvu shüla. A-le a-gwünkho hyulo yatselo gunryü ti.
Jo Kekhin dan
13Hagun khwen binlo, ketenyen nyu tsekho binlo, peche binlo, lo nko binlo. 14Hagun tho aphu keso nyu thyü lo.
15Lo apvünyu ju, Stefana kaminyu le Akaya nyu a-nyun kelulo keri tsin nyu tsekethyü hagun le sha bin ti, lo anyugun le kenshün nyu dan keche titse kethyü anyu gwünkho hoshü laso. 16Ale hagun no temi tsühontse kethyünyu, lo kengüo lotho thyü kehünyu ligü higüe tsünyu sithenlo lotse kethyü tsinhi shü bin nyo.
17Lo Stefana lo Fortunata lo Akaika anyugun le aki keryü genyu akenyü sa bin nyo; kechamvule ale hagun nnyü kebin ka anyugun le hagun aphu sunthyü keshü genyu. 18Anyugun le anyun-e lo hagun nyun-e gwün nrhün keshü genyu. Hagun tsügenyu temi tsühontse kethyü nyu sha binlo nye.
19Asia nyu kehun dan le hagun kelushü le, Aquila lo Priskila au lo au kanyu kehun kehü dan ko tse Npugü zan nyu hagun kelushü le. 20N pvünyu ju aphu hagun kelushü le.
Kenshün nyu le kembo kehü jvü sen-o kembo-o khinyu khinyu kelushü nye.
21Ale Paul, a npvü aben pe hagun kelu keshü thu shü le.
22Temi ligühigüe Npugü sohü kemvunyu no swetsü kelanyu thyüla lo. Agun Npugü, ryülo lo!
23Npugü Jisu Khrista kanyu chwikeryü shwikenjün gü no hagun zen bin kelogü thyülo.
24Khrista Jisu nyu a-keso no hagun zen bin kelogü thyülo nye. Amen.
Currently Selected:
1 KORINTHIANYU 16: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
