1 TIMOTHI 5
5
Ketenyen Nyu Ge Thyülo Mvulo Keshvu
1Kethennyu rho nya, ai tsünyu no npvünyu hontseo thu keyhun lo. Lo ponyu lope nsikezen nyu hontselo. 2Lo nnyun kenshün sen-o tenunyu kethen nyu ju khipe njvü nyu hontse lo; lo lünyu ju lope nlügi nyu hontselo.
3Tenunyu magi-e magi ketsin thyü kebin nyu ju rühvulo. 4Ai tenunyu magi-e a-nyenyu nmvue a-nyenyu nyu kebin nyu le, tsünyu no a-npvü a-kaminyu kipon ketsin jvü to gü thyülo, lo a-npvü a-pepvünyu shweshwi kelo do sha terilo. Sunggigü yhühyu nyu tsühontse kethyü le a-zü kethyü genyu. 5Lo tenunyu magi ketsin nyu, a-npvü kela gile, Sunggigü nti nrin gwünzin la hünyo, lo khensin jongwün kehi thyü bin gwünzin tinla hünyo. 6Ai tenunyu magi serimvu pe a-kenyü yhüdyü thyü tin kelanyu le rhün kebin ka nyu sila hünyo. 7Meno anyugun nkhinla mvu nrün genyu johokeshü hilo pe anyugun ka zoshü lo. 8Lo temi lihigüe a-npvü a-shvu a-nye tsüdan nyu a-kaminyu dan-e shweshwilo mvu yatselo a-le ketenyen gü nkhinla so, lo tenyen kemvunyu nyeki shvukvu laso.
9Peche nme nti zen yhun-o magi tin kelanyu kemvu we a-keyhun chen hentsero khünyu shweshwi titseo a-zan thulo nya. 10A-le me mhundyü nyue thatho kegwa genyu teshwe kepvünyu mvulo shvu, a-le ntsenyu leyi soryü, tesin nsin, kenshünnyu ju phasü, kenjün thyü kebin shweshwi, tson-o tha lihi ka-e thatho kegwa kethyünyu a-yhen thyü kehünyu mvulo shvu. 11Ai tenunyu maginyu chen hentsero khünyu we zan thulo nya; tsüdan le Khrista kendo then mvuo thyümin kenyü yhüdyü thyünyü solo anyugun le kaluni nyü soti. 12Lo tson-o anyugun jo kerigü gwünrho kela genyu mula ti. 13Tsünyeki-e anyugun le tha thyü kentsü do-e sha lati,tson-o ka aphu rün tinla ti; lo tha thyü ntsü kela ntimvule jo zozü kemvu zo-o selü thyü soti. 14N shwikerüchün nyu dan no ngun nkhinla mvu nrün genyu tenunyu magi kebin nchenyu dan we no kaluo nyu zen, a-kami shwi leyi kethyü le akendo le. 15Kechamvule temi peha le tson gwünzüo satan tson then tin kela si genyu. 16Tenunyu ketenyen nyu lihigie a-shvu a-nye tenunyu magi tsühontse kethyü le binlo kehun no a-khvü nsu nyao tsünyu shweshwilo nye; tson-o kehun no magi ketsin nyu shweshwi kelo thyülo nye.
17Kehun peshünyu ju, kehun ketsen kegwa thyü kehü ju, tsüdan nyu jolokegwa jünzo lo me senthyü kehünyu chün jünhvu pe tsüshü züle. 18Kechamvule ketsin lesü le kezo le, “Nle methu no shyenyu ketseka tha pe a-mün khenla nya,” lo, “Tha thyü kehünyu le a-chün hyutyü zü.” 19Kehun nyu peshü gü nmu soryüe mihvu mishen le sha lo hyu tsentsü la kemvu we tenyen nya. 20Kechanyue no nshvulo nrün genyu kemu thyü kelanyu kehun süda mhundyü nyu tsünyu kesü shülo.
21Ale Sunggigü lo Khrista Jisu lo tsangge jolo kejü kelonyu mhundyü nyu ale jo hidan khipe nki shübin nyo; nle tha nme ka-e temi nme-e so kecha thyü mvu tse tha hi thyü nye. 22Nnyun nyhun-o nben shwepe mege shü nya, nmvue me kechanyu kemu nyu nhüsülo nya, lo nshün binlo nye.
23Zü nti tsü bin nyao nle ho whülo lala tse kehü nginda kethyü gü genyu vain zu kesha shanyu pe ritsülo.
24Khinyu kemu we ndo pe gingvü lahü nyo lo anyugun kemu le anyugun mhundyü ki gü anyugun nmula hünyo, ai khinyu kemu we siki nyu me le sha chwiryü hünyo. 25Tsühontse thatho kegwa kethyüe gingvü la hünyo; lo tsühontse mvu yatse-e kebu binlo hü mvu.
Currently Selected:
1 TIMOTHI 5: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
