1 TIMOTHI 4
4
Ketenyen Nyu Ranila Nrün
1Kapugü le zo tsentsü shü kethyü le hisiki temi paha le ketenyen gü khela ti; tson-o kenku kapu dan lo satan senkethyü jo zen tinla ti. 2Kenku senkethyü jo hidan hile temi ketsin nyu rothyü kehü, nku kehü lo anyugun nyun ge-e tegi ronye pe vükela hontseo a-tho thyü gunryü ti. 3Temi tsüdan le meno sunthyü nya lotse, lo a-ketenyen nyu ketsin gü sha kela dan no a-shwen-o tyütsü lo tse khikeshü dan-e tyü nya lo tse soti. 4Kechamvule Sunggigü le thyü keshü lihi-e gwa kü; lo a-shwen-o khilo la yatselo thame kenila kethyüi ndi. 5Kechamvule Sunggigü jo genyu lo kehi genyu tsüle nshünlo kela si genyu.
Khrista Jisu Lotho Kegwanyu
6Nle senkethyü jo hidan hi lope npvünyu ju tsü shülo yatselo nle then hü kela ketenyen jolo senkethyü jo ketsin gü le nleyi pe nno Khrista Jisu lotho kegwa nyu thyü loti. 7Kenrun kenryü lo nyun kenda kerüchün kera kethyü khwenyü nya. N npvü ketsin gü rüchün kenyelo. 8Lo thyümin ndonron kelo le a-kechwi peha le bin hünyo; ai ketsin kipon ndonron kelo we hijonka-e lo hisiki-e kerhün hyulo nrün zope tsünyu bin njü nyo. 9Jo higü hile ketsin le, lo zenlo lo tenyenlo kekü jo le. 10Tsügenyu nle hokeli lo kenjün thyü hünyo, kechamvule nle rhün kehü gü Sunggigü ge sidyü le bin kelasi genyu, a-le temi aphu kenikelo gü, ai tenyen kehünyu genyu nchon kvu.
11Jo hidan pe meno zenlo, lo pe me senthyü shülo. 12Nle selo zun letseo temi nme-e no nkhin nya, ai njo nyu, njvü nrüla nyu, keso nyu, ketenyen nyu lo nshün-o keyhun nyu tenyen kehünyu dan genyu tsinhi nme thyülo. 13Ale ryü kemvuthen, ketsin lesü swü pe mehi kethyü, lo jün kezo lo me senkethyü nyu nyhen thyü bin lo. 14Peshünyu ju le a-ben shwen pe nge shü kethyü ka, jochü pe ntsü kela sidyü jo nyu zoshwi keshü gü tsü pe tha lihi kemvu thyüla nya. 15Nle gwakenye kebin temi aphu no hyulo nrün genyu nle thatho hidan hi thyülo, lo rüchün ton lo. 16Njvü nrüla denzin metse lo nle me senkethyü denzin metse petsülo. Nle jo hidan zen binlo; kechamvule nle tsühontse binlo yatselo n-e nkenilo ti, lo njo kenyü nyu dan-e kenilo nrün genyu.
Currently Selected:
1 TIMOTHI 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
