1 TIMOTHI 3
3
Kehun Kekhwenyu Rüla
1Temi lihigüe kehun kekhwen tho thyünyü kehü le thatho kegwa tsin fü hünyo tsekethyü tsü le ketsin le. 2Tsügenyu kehun kekhwenyu le meno a-nmulo kehonyu, a-nu nme nti kebin nyu, tha lihi ka-e akekheni kehünyu, a-jvü kegwa nyu lo temi kepetsü nyu, me nsin nyü kehü nyu lo me senthyülo kekü nyu mvulo shvu. 3A-le kenzeü nyu nmvue kenthü nyu loshvu, ai a-jvü kegwa nyu lo me zen kega keseri hü kemvu nyu lo seki raka tepen hü kemvu nyu mvulo shvu. 4A-le a-npvü a-ka khwün ai kekheni kegwa thyü kehünyu lo a-nyenyue a-rühvuo a-jo zen kehünyu mvulo shvu. 5Kechamvule temi nme le a-npvü a-kakhwün-e kekhenilo shamvu yatselo, a-le dihontse Sunggigü kehun nucha kegwa thyülo mon? 6A-le ketekho bin-o satan hontse Sunggigü no a-nmu kela kenshvu genyu temi keshün nyu no thyülo shvu. 7Tsüntimvule a-no tetsin pvüla nmvue satan sen ka a-minla lo kenshvu genyu tegwenkinyu mhundyü nyue meno rühvu kehünyu mvulo shvu.
Dikonnyu Rüla
8Tsühontse Dikonnyue tha rüchün ntsun kehünyu mvulo shvu, zu tsü sahü kemvunyu, kenrunnyu hon tepen hü kemvunyu mvulo shvu. 9Anyugun no a-nyun njüo ketenyen jo kentsun sen kehünyu mvulo shvu. 10Lo temi tsüdan kegwa keshvu nri shwi rio anyugun nmu mvu yatselo anyugun no Dikon tho thyülo. 11Dikonnyu nunyu ai tsühontse tha rüchün ntsun kehünyu, selü thyü hü kemvunyu, a-kekheni kehünyu, lo joketsin kezo nyu mvulo shvu. 12Dikonnyu no a-nunyu nme nti kethyünyu, anyenyu lo a-kakhwün kekheni kegwa thyü bin kehünyu mvulo shvu. 13Kechamvule dikom tho thyü kegwa thyü kehünyu le nko salo la hünyo, tson-o Khrista Jisu kipon peche sa tinla hünyo.
Jo Kentsun Kedatsin gü
14Ale nki ryü nshwen kethyü rüchün bin nyo, ai jo hidan hi thu pe ntsü shü bin nyo. 15Tson-o keshanyu laka ale ryü ntsüla-e Sunggigü ka nyu kebin nyu le njvü dihontse mvulo shvu yo tsekethyü nno shanyü; ka tsügü tsüle rhünkehü Sunggigü kehun gü, ketsin gü ketun kachon gü lo ka kehü gü le. 16Ale zo shwishü bin nyo, n gun nyünyü jo kentsun gü le, gonri ketsin, tsüle:
“A-le thyümin thyü pvüo me yhühyu thyü ryü,
kapu nyu a-le njü tsekethyü tsinshü,
lo tsangge jolonyu le a-hyu.
A-le temi aphu dan nyu jünzo shü,
kazü hinyu keyhun nyu le a-tenyen la,
lo a-zen-o tsangge küla.”
Currently Selected:
1 TIMOTHI 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
