1 TIMOTHI 2
2
Kerüshvu Jvü Zokeshü
1Ale zoshü kebin kerigü le, temi aphu genyu shwikenjün hi, lo me genyu hi-o Sunggigü shwen binlo. 2Rajanyu dan lo kekvu kesen nyu aphu genyu hibin lo, tson bin yatselo me-e n kevü keben mvuo bwenye tse yhun-o tha lihi nyue Sunggigü rüshvuo yhun njü loti. 3Kenikelo gü Sunggigü mhundyü nyu hihontse kethyü le gwa lo a-kenyü kethyü genyu. 4A-le temi aphu no kenikelo hyulo kethyü lo ketsin thakesha gü nyu ryülo kethyü le a-kenyü hünyo. 5Kechamvule Sunggigü le nme, lo Sunggigü lope temi au ja nyu kebin-e nme, a-le temi thyü keryü gü Khrista Jisu le. 6A-le a-keyhun lope temi aphu rhinhi laso; a-gwünkho toka tsü rüla jünzo shü mvulo shvu. 7Higenyu ketenyen lo ketsin nyu ano Juda kemvunyu senkethyü nme thyü titseo akejü pe ano jünkezo nyu lo apostel nyu nme thyülo laso. Lo tsüle ale ketsin zo bin nyo, ale nku mvu.
8Tsügenyu ale pechenyu no lika hika-e kehi kethyü ka a-nyun nta mvu tse lo me zen kenyi mvu tse a-ben kenshün shwen pen-o hi kethyü le akendo. 9Tsühontse tenunyu dan ko no a-nyun njüo a-ketsükela pe a-khoto thyü kethyü le akendo; tsüle a-shün ketsü pe konsin kontseryü thyü pvü lo suna nmvue kontyü nmvue phinya a-min ketsen tsin sen kethyü kemvu. 10Ai Sunggigü ketenyen nyu tenunyu le thatho kegwa gü zen-o yhun hü zü. 11Tenunyu no me hensin tsenyo-o nma tse bin kethyü jvü shalo. 12Ale tenunyu no senthyü nmvue pechenyu so kekvu sen lotse shü mvule nma tse binlo tse shübin nyo. 13Kechamvule Adam thyülo rio tsüsiki Iv thyü kelo genyu. 14Tsüntimvule Adam sala ri mvule tenugi sala-o a-no kemu thyüla. 15Ai tenunyu le a-kezü thyüo ketenyen nyu lo keso nyu bin hü yatselo nyu kenyu genyu kenikelo hyu loti.
Currently Selected:
1 TIMOTHI 2: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
