1 TIMOTHI 1
1
Kelukeshü Jo
1N kenikelo n Sunggigü lo nsidyü gü Khrista Jisu au jo genyu Khrista Jisu apostel thyü kelo gü Paul le; 2khipe ketenyen kipon anyu ketsin gü Timothi tsü keshü. Sunggigü n Pvügü n Npugü Khrista Jisu no keso, shwikenjün lo nyun kebwen pe n ketsü gü thyülo.
Kenku Jün Kezo Nyu Genyu Petsülo Lotse Keshü
3Ale Makedonia nyu gun kezhü ka nka kezo hontse, ale nno Efesa nyu bin nyü bin nyo. Tsügenyu temi peha le kenku senkethyü khi sen-o me senthyü hünyo, lo nle anyugun no khela lotse khinla mvulo shvu. 4Anyugun no nduka nyu rüla kera kethyülo nbonnyu dan zan swü kethen kethyü tsü khela mvulo shvu, kechamvule tsügenyu kenyi kehü gwünzin a-melo ketenyen nyu shakelo Sunggigü kendo gü thyülo hü kemvu genyu. 5Ai n tenyen shü kela kon gü le nnyun nshünlo nkerüchün nzhülo kerokon mvuo tenyen kethyü genyu keso no binlo nrün genyu. 6Temi peha we tha hidan hi gwünzüo n mhon gü kenrun kenryü kera kethyü kipon hü tin laso. 7Temi tsüdan le anyugun le nyu zobin yo anyugun npvü anyugun jo-e sha mvu; nmvue anyugun le tha rüla sha letseo zo peche kebin güe shamvue tejvü gü pe me senkethyü nyu thyü nyü hünyo.
8Temi lihigüe tejvü gü thenlo yatselo tejvü gü le gwa tsekethyü nle shabin nyo. 9Higü hi shalo mvulo shvu, tejvü gü le temi kegwanyu genyu thyü shü mvu, ai tejvü gwünrho kehünyu, me jo zen kemvunyu, Sunggigü sha hü kemvunyu, nshün kemvunyu lo serikemvunyu, a-pvü a-jvünyu dushvu kehünyu. 10Keyüla nyu, pechenyu le pechenyu zen-o kejo kemvu tho thyü kehünyu, temi rühulo la kehünyu, kenku nyu, nkuo swe kehünyu, lo thakecha lihi-e senkethyü jo kenjü gü seri kebin dan genyu thyü shü le. 11Senkethyü jo tsügüe atenyen kela kegwa tsingü Sunggigü jolokegwa zankechwi kethyü gü zen kerhün le.
Sunggigü Shwikenjün Genyu Chenkeno
12Khrista Jisu ngun Npugü, athyü nko shü kehü gü, a-le arüchün ngwao ano a-lo thyülo tseo akejü kelo genyu ale a-cheno hünyo. 13Ale nduka a-zo nshvu lo a-nshwen nyhün hü. Ai ale tenyen kemvu ka ale nyu thyü hü yo shamvuo tsü thyü gunkeryü genyu Sunggigü le ashwi njün shü. 14Lo Npugü le shwikenjün run pe akesü kela kethyü thyüshü, lo Khrista Jisu nyu ketenyen lo keso khipe atsüshü. 15Khrista Jisu le kemunyu dan kenilo titseo kazü nyu tsüryü le, tsekethyü jo higü hile ketsin le, lo temi lihigüe lopen lo tenyen lozü le. Lo kemunyu tsüdan dan nyu ale kemu tsin gü le. 16Ai a-le ashwinjün kela le kechamvule siki a-tenyenlo-o kethonthen kerhün hyulo nrün dan no Khrista Jisu le akemu tsin gü ge a-nyun thonsa kethyü pe me hishü nrün genyu ashwi njün chon shüle. 17Lo kethonthen raja, sila lo keho, lo n yhütyü pe hyulo keho a-nyeki kecha kendi Sunggigü no kethonthen teshwen lo zankechwi gü thyülo! Amen.
18A nyugü Timothi, himhundyü ki sidyükeshanyu dan le zo kenjü tsin pe nzen keshü hontse, ale johokeshü higü hi pe ntenyen shübin nyo. Nle me zen-o kenren kethyü ka jo hidan hi lope nronye thyü pvü binlo. 19Ketenyen lo nnyun kenjü gü sen binlo. Temi peha le a-nyunki a-nthon kebin khwen gü sha kemvu genyu anyugun ketenyen nke shü laso. 20Tsüdan dan nyu Hamenia lo Alekjender hvue sin; tsühvu no Sunggigü zo nshwe loshvu tsekethyü shalo nrün genyu ale khepe Satan ben nyu shü laso.
Currently Selected:
1 TIMOTHI 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
